Հանդիպումը կայացել է «Ազատ հայրենիք» կուսակցության գրասենյակում: Դաշնակցության պատվիրակությունը գլխավորում էր ՀՅԴ Արցախի ԿԿ ներկայացուցիչ Դավիթ Իշխանյանը, «Ազատ հայրենիք»-ի պատվիրակությունը՝ կուսակցության ղեկավար Արայիկ Հարությունյանը:

Դավիթ Իշխանյանն իր խոսքում նշել է, որ բանակցություններն ընթանալու են երկու փուլով. առաջին փուլով ձեւավորվելու է միասնական օրակարգ, որի շուրջ ակնկալում են Արցախի քաղաքական ուժերի համախմբումը:

«Ազատ հայրենիք»-ի ներկայացուցիչների կողմից նշվեց, որ Դաշնակցության առաջարկած օրակարգը համընդհանուր հարցերի շուրջ ընդունելի է եւ Արցախում գործող յուրաքանչյուր քաղաքական ուժի առաջնահերթությունն է: Ներկայացված դրույթներից շատերը մաս են կազմելու նաեւ «Ազատ հայրենիք» կուսակցության նախընտրական ծրագրին:

Արայիկ Հարությունյանը նշել է, որ հանրապետությունում սպասվող նախագահական ընտրություններին «Ազատ հայրենիք» կուսակցությունը մասնակցելու է սեփական թեկնածուով: Եվ այդ առումով դեմ է համաձայնեցված թեկնածուի գաղափարին: Հարությունյանը միաժամանակ նշեց, որ «Ազատ հայրենիք» կուսակցությունը պատրաստ է համագործակցել Դաշնակցության հետ թե ընտրությունների նախնական շրջանում, եւ թե ընտրություններից հետո՝ անկախ ընտրությունների արդյունքներից:

«Ազատ հայրենիք» կուսակցությունը եւ անձամբ ես շահագրգռված ենք, որպեսզի Դաշնակցությունը մաս կազմի իշխանությանը»,- ասել է Արայիկ Հարությունյանը:

aparaj.am