Նրա խոսքով՝ նման բանաձեւ կա Սենատում, իսկ հետագա քաղաքականությունը կախված կլինի ներկա եւ ապագա նախագահներից։ «Ցանկացած պարագայում, դա կլինի Սպիտակ տան որոշումը։ Սպիտակ տունն անկախ է վարում քաղաքականությունը»,- ընդգծել է Մանոյանը՝ ավելացնելով, սակայն, որ նա եւս պետք է հաշվի առնի համատեքստը։ «Օրենսդիր մարմինը չի կարող ստիպել Սպիտակ տանը։ Դա քաղաքական քայլ էր, քաղաքական հաղթանակ, եւ գործընթացը պետք է շարունակել։ Հարցը վերաբերում է ոչ միայն Հայոց ցեղասպանության ճանաչմանը, այլեւ ցույց է տալիս ԱՄՆ հայկական համայնքի ուժը»,- նշել է ՀՅԴ Բյուրոյի անդամը։ Նա նաեւ հիշեցրել է, որ այսօր եւս Կոնգրեսի շենքում տեղի կունենա ամենամյա միջոցառում՝ նվիրված Արցախին։ Դրան կմասնակցի Արցախի ԱԳՆ ղեկավարը։

Ինչ վերաբերում է ցեղասպանության ժխտումը քրեականացնելուն, ապա Կիրո Մանոյանը նկատել է, որ ԱՄՆ-ում չկա եւ հազիվ թե երբեւէ կընդունվի օրենք ժխտումը քրեականացնելու մասին՝ հաշվի առնելով, որ ամերիկացիները պլյուրալիզմի կողմնակիցներ են։ Այդ հարցին նրանք այլ կերպ են մոտենում եւ կարող են նման գործողություններն անվանել ատելության սերմանում, ավելացրել է Մանոյանը։

Խոսելով Թուրքիայի հետագա գործողությունների մասին՝ Մանոյանը նշեց, որ այդ երկիրը կփորձի պառակտել հայերին։ «Եվ այդ քաղաքական մարմնամարզությունը բացասաբար կանդրադառնա հենց թուրքական հասարակության վրա։ Երդվյալ մերժողները կմնան իրենց կարծիքին, իսկ մտածող մասը էլ ավելի շատ կմտածի»,- ամփոփել է Կիրո Մանոյանը։