Հրաչ Վարժապետյանը նշեց, որ Նիկոլ Փաշինյանի գլխավորած պատվիրակության հետ Ֆրանսիայի հայ համայնքն է հանդիպելու, ՀՅԴ-ի հետ առանձին հանդիպում նախատեսված չէ, բոլորի հետ նաև ՀՅԴ պատվիրակության անդամներ կլինեն։

«Արայիկ Հարությունյանի հետ հանդիպում չկա, և նույնիսկ եթե այդպիսի պահանջ ներկայացվի, տեղի չի ունենա: Պիտի մերժվի նման հանդիպումը պարզապես իր պահվածքին համար՝ «անդաստիարակ» հայտարարության համար, որովհետև «անդաստիարակը» չի վերաբերի Հայաստանի մեր ընկերներին, «անդաստիարակը» կվերաբերի յուրաքանչյուր դաշնակցականի»,- ասաց նա՝ ևս մեկ անգամ ընդգծելով, որ «դրսի ու ներսի» Դաշնակցություն գոյություն չունի, այդ թեզը Լևոն Տեր-Պետրոսյանը փորձեց շրջանառության մեջ դնել, չհաջողեց, այս իշխանությունն էլ չի հաջողելու։

Զորակցում ենք ՀԵՄ-ի ակցիաներին

ՀՀ վարչապետ Նիկոլ Փաշինյանը տիկնոջ՝ Աննա Հակոբյանի հետ աշխատանքային այցով մեկնել է Ֆրանսիայի Հանրապետություն՝ մասնակցելու Փարիզի խաղաղության երկրորդ համաժողովին և ՅՈՒՆԵՍԿՕ-ի 40-րդ Գլխավոր կոնֆերանսին։

Հայտնի է, որ նոյեմբերի 12-ի երեկոյան տեղի է ունենալու վարչապետի հանդիպումը Ֆրանսիայի հայ համայնքի ներկայացուցիչների հետ, որին հրավիրված է նաև Հայ Հեղափոխական Դաշնակցությունը:

ՀՅԴ Արևմտյան Եվրոպայի Կենտրոնական կոմիտեից հայտնում են, որ Դաշնակցությունն ընդունել է հրավերը և այդ հանդիպմանը մասնակցելու է՝ առաջնորդվելով ազգային-քաղաքական վարքագծով, որն այլ բան չէ, քան հավատարմություն ու զորակցություն պետականությանը, քանի որ հստակորեն տարբերակում և սահմանագծում է պետություն ու իշխանություն հասկացությունները:

168.am-ի հետ զրույցում ֆրանսահայ հասարակական գործիչ Հրաչ Վարժապետյանը հաստատեց տեղեկությունը՝ ասելով. «Ես երկրում չեմ, բայց մեր ընկերները հանդիպելու են և անպայման բարձրացնելու են ԿԳՄՍ նախարար Արայիկ Հարությունյանի որոշման հարցը: Նաև հստակ ասելու ենք, որ՝ այո՛, մենք զորակցում ենք ՀԵՄ-ի ակցիաներին, և հերիք եղավ դրսի ու ներսի դաշնակցական փնտրելու անիմաստ ու անպտուղ փորձերին, որովհետև չկա նման բան. կա միայն մեկ Դաշնակցություն»:

Մարիամ Պետրոսյան