Արաբերէն բացման խօսք արտասանեց փաստաբան Պայքար Թովմասեան: Ան դիտել տուաւ, որ հայ ժողովուրդը երկար տարիներու մաքառումներէ ետք, փառաշուք անցեալին ներշնչումով, նահատակներով, վրիժառու բազուկներով կերտեց իր հայրենիքն ու ձեռք բերաւ իր իրաւունքներուն մէկ մասը: Ազատ ապրելու տենչը մնաց իր շարժիչ ուժը, որ զինք մղեց աննահանջ պայքարի: Թովմասեան յայտնեց, որ ցեղասպանութենէն ճողոպրած հայ ժողովուրդը կրցաւ իր ուժերը համախմբելով վերապրիլ՝ միշտ ձգտելով իր վախճանական նպատակներու իրականացման:

Օրուան բեմավարներ Սարին Խալոյեան եւ Ներսէս Պարսումեան տեսերիզի ցուցադրութեամբ նախ ներկայացուցին Հայ Յեղափոխական Դաշնակցութեան անշեղ ուղին, անոր արձանագրած նուաճումներն ու ձեռքբերումները: Երկրորդ բաժինով անոնք յատկապէս լուսարձակի տակ առին Սուրիոյ պատերազմական տարիներուն կազմակերպութեան ժողովրդանուէր ծառայութեան հոլովոյթը, ի մասնաւորի երիտասարդութեան ունեցած մեծ ներդրումը հայկական թաղերու պաշտպանութեան եւ ժողովուրդին կենսական կարիքներուն ապահովման մէջ:

Ազգային, յեղափոխական երգերը դարեր շարունակ ժողովուրդին հիւսած պատմութեան անկեղծ արտայայտութիւնը հանդիսացած են, աւիւն ու եռանդ ներշնչելով նորահաս սերունդներուն: Այս իրականութենէն մեկնելով, Համազգայինի «Զուարթնոց» երգչախումբը քառաձայն, հնչեղ կատարումով մեկնաբանեց «Հպարտ, Անպարտ Դաշնակցութիւն», «Խնուսից Գալով», հայրենակցական երգերու շարք, «Հիմի Էլ Լռենք», «Մենք Պէտք է Կռուենք», «Քաջորդւոյն Երգը», «Սասնայ Ահեղ Կռուի» եւ «Քեզ Դաշնակցութիւն» երգերը, գեղարուեստական ղեկավարութեամբ Գայիանէ Սիմոնեան-Տէրեանի, դաշնամուրի ընկերակցութեամբ Ռուզան Պարսումեանի:

Հաւաքական աշխատանքի ջատագով կազմակերպութեան շրջանի խօսքը արտասանեց Յակոբ Քիլէճեան:

Քիլէճեան ներկաները ողջունելէ ետք ըսաւ. «ՀՅԴ-ն ռահվիրան հանդիսացաւ հայ ազատագրական պայքարի տարբեր փուլերուն: Ան կրցաւ դարերու ստրկութենէ ետք համախմբել հայ ազգին ուժերը, ազատագրել պատմական Հայաստանի հողերէն մաս մը եւ հիմնել անկախ պետականութիւն, իսկ աւելի ուշ կրցաւ աշխարհացրիւ հայութիւնը կազմակերպել գաղթօճախներուն մէջ, պահել հայուն ոգին ու սերմանել հայրենիքին սէրը: Սուրիան եղաւ այն գաղութներէն մէկը, որ գործեց 100 տարի եւ աւելի, ծաղկեցուց գաղութը՝ կազմակերպուած աշխատանք տանելով ընկերային, մշակութային եւ այլ բնագաւառներու մէջ: Սակայն վերջին տարիներուն, Սուրիոյ իրավիճակին բերումով տեղի ունեցած արտագաղթին հետեւանքով գաղութը թիւի եւ որակի նօսրացում ապրեցաւ:Այդուհանդերձ, տարիներու կազմակերպուածութեան փորձառութենէն մեկնելով, միասնական ոգիով կրցաւ յաղթահարել ծառացող բոլոր դժուարութիւնները»:

Անդրադառնալով Սուրիոյ տագնապին լուծման առնչութեամբ կազմակերպութեան մօտեցումին, Քիլէճեան յայտնեց, որ ՀՅԴ-ը ջատագովն է Սուրիոյ տարածքային ամբողջականութեան, ժողովուրդին միասնութեան եւ հաւասարակշռուած դիրքերէ հանդէս եկող, հայրենասէր բոլոր ուժերու հետ գործակցութեան:

Դատապարտելով Թուրքիոյ հիւսիսարեւելեան շրջան ներխուժումը, ան շեշտեց, որ Սուրիոյ տագնապի քաղաքական լուծումը իր բնականոն հունին մէջ կը մտնէ օտար, ապօրինի բոլոր ուժերուն դուրս մղումով եւ երկիրը սուրիական բանակին վերահսկողութեան տակ պահելով: Ապա շնորհակալութիւն յայտնեց երկրիս վսեմաշուք նախագահ տոքթ. Պաշշար ալ Ասատին, որ իր յանդուգն կեցուածքներով ու հայրենասիրութեամբ պայքարեցաւ ահաբեկչութեան դէմ ու տիրութիւն ըրաւ երկրին եւ ժողովուրդին:

Հանդիսութեան բանախօս, «Գանձասար» շաբաթաթերթի խմբագիր Զարմիկ Պօղիկեան օրուան խորհուրդը ներկայացուց, դիտել տալով որ.« 129 տարուան եռուն կեանք ունեցած, պայքարի տարողունակ խրամատներէ անցած, իր նուիրեալներու արեամբ հայրենիք կերտած, խաղաղասէր, ստեղծագործ ու աշխատունակ իր ժողովուրդին իրաւունքներուն համար աշխարհով մէկ պայքարի դրօշ պարզած կուսակցութեան մը յոբելեանի յիշատակումը յարգանքի տուրք մատուցելէն շատ աւելին կը պատգամէ մեր բոլորին»: Ապա անդրադարձաւ Դաշնակցութեան ուժի աղբիւրներուն ու ըսաւ. «Դաշնակցութեան ուժի հիմնական աղբիւրը իր շարքերուն հաւատքն էր հայ ժողովուրդի տեսիլքին իրականացման հանդէպ, ազգային մեր արժէքներուն հանդէպ։ Ուժի երկրորդ աղբիւրը իր գաղափարաբանութիւնն էր՝ ազատութեան, անկախութեան, ժողովրդավարութեան, ընկերվարութեան եւ յեղափոխութեան հիմնասիւներով»:

Պօղիկեան անդրադարձաւ ՀՅԴ պատմութեան փուլերուն, Սփիւռքի կազմակերպման ու գոյատեւման մէջ ունեցած անոր էական դերակատարութեան ու Հայաստանի անկախացումով, Արցախի ազատագրութեամբ Սփիւռքի ներուժը հայրենիք ուղղելու ջանքերուն, ինչպէս նաեւ Հայ Դատի գրասենեակներուն ճամբով եւ աւելի քան 30 երկիրներու մէջ գործող իր կառոյցներով Հայաստանի ու Արցախի շահերուն պաշտպանը հանդիսանալու նպատակին:

Ապա բարձրօրէն գնահատեց Սուրիոյ տագնապի տարիներուն Հայաստանի քաղաքական ճիշդ դիրքորոշումները տագնապի իւրաքանչիւր փուլին, ինչպէս նաեւ ՀՀ դիւանագիտական գրասենեակներու բաց մնալն ու ՀՀ մարդասիրական առաքելութեան գործունէութիւնը Սուրիոյ մէջ:

Պօղիկեան ներկայացնելով ՀՅԴ դիրքորոշումը Հայաստանի անցնցում զարգացման եւ Արցախի հարցին լուծման գծով ըսաւ. «Հայաստանի ԳՄ-ը յառաջացուց ոլորտային մասնագիտական յանձնախումբեր, որոնց միջոցով պարբերաբար հրապարակուեցաւ ու կը հրապարակուի կուսակցութեան կեցուածքը երկրի զարգացման եւ մարտահրաւէրներուն նկատմամբ:

Արցախի հարցին գծով ՀՅԴ-ն շեշտեց, որ հարցին կարգաւորումը հիմնուած պէտք է ըլլայ Արցախի ժողովուրդին՝ քանի մը անգամ արդէն արտայայտած փափաքին վրայ՝ ապրիլ Ատրպէյճանէն անկախ եւ ի վերջոյ միանալ Հայաստանի Հանրապետութեան։

ՀՀ-ը ունի կարեւոր դերակատարութիւն Արցախի Հանրապետութեան պաշտպանութեան եւ անոր ձայնը աշխարհին հասցնելու իմաստով։ Հարցի կարգաւորման բանակցութիւններուն մէջ Արցախը պէտք է ունենայ լիիրաւ մասնակցութիւն. ՀՀ-ը բանակցութիւններուն մէջ չի կրնար փոխարինել Արցախի Հանրապետութիւնը. այս բոլորը անհրաժեշտ է ամրագրել երկու պետութիւններուն միջեւ ռազմավարական համագործակցութեան պայմանագրով»։

Ապա անդրադառնալով Հայաստանի ներքաղաքական ներկայ իրավիճակին ըսաւ.

«ՀՀ ներկայ իշխանութեան վարքագիծը ընդհանուր առմամբ չ՚ընթանար այն սկզբունքներուն ուղղութեամբ, զորս ժողովուրդին մեծ մասը արտայայտած էր 2018-ի ժողովրդային շարժման ընթացքին։ Թէեւ դրական որոշ քայլեր առնուած են իշխանութիւններուն կողմէ՝ փտածութեան եւ մենաշնորհներու դէմ, շատ մը պարագաներու սակայն, անոնք կատարուած են ընտրովի. ուստի պէտք չէ ժողովուրդը անգամ մը եւս հիասթափութեան մատնել: Դատապարտելի են մեր ժողովուրդին համերաշխութիւնը վտանգող բոլոր անպատասխանատու դրսեւորումները, հարցերը լուծելու մենիշխանական մօտեցումները։ Ցանկալի է միասնական ճիգերով ամրապնդել մեր երկրի ներքին ու արտաքին անվտանգութիւնը, հասարակութեան համերաշխութիւնը, պատմութենէն դասեր քաղելով նայիլ ապագային, որպէսզի հայութեան համընդհանուր ճիգերու մէկտեղումով նոր թափ ստանայ մեր երկրին յառաջընթացը»։

Իր խօսքի աւարտին ան անդրադարձաւ սուրիահայութեան ներկայ մարտահրաւէրներուն, Թուրքիոյ Սուրիոյ հիւսիսարեւելեան շրջաններ ներխուժման հետեւանքներուն եւ կոչ ուղղեց ըլլալու զգօն եւ համահայկական ճիգերով, Հայաստան-Սուրիա յարաբերութիւններու ամրապնդումով պահպանելու սուրիահայութեան անվտանգութիւնը, նպաստելով համայնքի վերականգնումին ու անոր պատմական դերակատարութեան պահպանման, որպէս Հայոց Ցեղասպանութենէն ճողոպրած մեր ժողովուրդին կարեւոր մէկ հատուածը, պատմական Հայաստանի ժառանգութիւնը կրող ու ցեղասպանութեան վկան հանդիսացող հայութեան կարեւոր մէկ մասնիկը։

Յետ բանախօսութեան երաժշտական իւրայատուկ կատարումով ելոյթ ունեցան Լիլա Սահակեան (ջութակ) եւ Ռուզան Պարսումեան (դաշնամուր), հանդիսատեսներուն հրամցնելով հայրենասիրական հետեւեալ երգերուն երաժշտութիւնը՝ «Պիտ Պաշտպանեմ», «Պիտի Գնանք, Վաղ թէ Ուշ», «Զարթիր Լաօ», «Հսկայ Երկիր էր» եւ «Արիւնոտ Դրօշ»:

Ձեռնարկի աւարտին Դաշնակցութեան տօնը շնորհաւորեց Բերիոյ Հայոց Թեմի Բարեջան Առաջնորդ Գերաշնորհ Տէր Մասիս Եպս.Զօպուեան: Սրբազան Հայրը ողջունելով ներկաները ըսաւ.«Սովորական կազմակերպութեան մը սովորական հանդիսութեան ներկայ չենք գտնուիր, այլ կազմակերպութեան մը, որ 129 տարիներու հսկայ փորձառութեամբ, աշխատանքով, ներդրումով, նուիրումով եւ զոհողութեամբ օժտուած է: 129 տարիները սովորական չեղան հայոց պատմութեան մէջ: Այս կազմակերպութիւնը ժողովուրդին ծոցէն ծնաւ, բացուեցաւ ժողովուրդին եւ ինքզինք նուիրաբերեց հայրենիքի ազատութեան եւ անկախութեան: Այս բոլորը կ’ենթադրէի զոհողութիւն եւ նուիրում: Դաշնակցութիւնը անհայրենիք մնացած ժողովուդին թեւ-թիկունք կանգնեցաւ, եկաւ ըսելու արար աշխարհին, որ հայը տկար չէ: Այս բոլորը մէկտեղուելով դարձան զէնք, արիւն, նահատակութիւն: Դաշնակցութեան շարքերուն մէջ չկայ ընկրկում, կայ ծառայութեան ու պայքարի մշտանորոգ կամք»:

Սրբազան հայրը սուրիահայութեան մարտնչող ոգիին անդրադառնալով նկատել տուաւ, որ մեզմէ իւրաքանչիւրը հպարտ պէտք է ըլլայ յանուն մեր արժէքներուն իր մղած պայքարով եւ ձեռքբերումներով, որպէսզի նոր հորիզոններ բացուին մեր դիմաց ու թափ տանք վերանորոգման աշխատանքներու:

Հանդիսութիւնը իր աւատին հասաւ սրբազան հօր «Պահպանիչ» աղօթքով, ապա ՀՅԴ քայլերգով:

Լուսին Ապաճեան-ՉիլԱբօշեան

kantsasar.com

ԶԱՐՄԻԿ ՊՕՂԻԿԵԱՆ․ «ՑԱՆԿԱԼԻ Է ՄԻԱՍՆԱԿԱՆ ՃԻԳԵՐՈՎ ԱՄՐԱՊՆԴԵԼ ՄԵՐ ԵՐԿՐԻ ՆԵՐՔԻՆ ՈՒ ԱՐՏԱՔԻՆ ԱՆՎՏԱՆԳՈՒԹԻՒՆԸ, ՀԱՍԱՐԱԿՈՒԹԵԱՆ ՀԱՄԵՐԱՇԽՈՒԹԻՒՆԸ, ՊԱՏՄՈՒԹԵՆԷՆ ԴԱՍԵՐ ՔԱՂԵԼՈՎ ՆԱՅԻԼ ԱՊԱԳԱՅԻՆ, ՈՐՊԷՍԶԻ ՀԱՅՈՒԹԵԱՆ ՀԱՄԸՆԴՀԱՆՈՒՐ ՃԻԳԵՐՈՒ ՄԷԿՏԵՂՈՒՄՈՎ ՆՈՐ ԹԱՓ ՍՏԱՆԱՅ ՄԵՐ ԵՐԿՐԻՆ ՅԱՌԱՋԸՆԹԱՑԸ»

Հալէպի մէջ ՀՅԴ 129-ամեակի հանդիսութեան բանախօսութիւնը`արտասանուած «Գանձասար»ի խմբագիր Զարմիկ Պօղիկեանի կողմէ

129 տարուան եռուն կեանք ունեցած, պայքարի տարողունակ խրամատներէ անցած, իր նուիրեալներու արեամբ հայրենիք կերտած, խաղաղասէր, ստեղծագործ ու աշխատունակ իր ժողովուրդին իրաւունքներուն համար աշխարհով մէկ պայքարի դրօշ պարզած կուսակցութեան մը յոբելեանի յիշատակումը յարգանքի տուրք մատուցելէն շատ աւելին կը պատգամէ մեր բոլորին։

Այո՛, բոլորին, որովհետեւ դաշնակցական ըլլալ սոսկ կուսակցութեան մը շարքերուն պատկանիլ չի նշանակեր, Դաշնակցութիւնը ապրում է, հայրենիքի համար բաբախող սիրտ է, հայ մշակին, բանուորին, մտաւորականին, քաղաքական գործիչին, երիտասարդին եւ ուսանողին համահունչ պայքարին տրոփիւնն է, որ հայօրէն բաբախող իւրաքանչիւր սրտի զարկին հետ նոր աւիւն կը ստանայ։
129 տարի ապրիլն ու գործելը ինքնին կը խօսին նպատակասլաց գործունէութեան եւ մշտանորոգ կեանքի մը մասին, կեանք մը, որ մշտապէս կը սնանի մեր ժողովուրդին ազգային արժէքներու պահպանման եւ Ազատ, Անկախ ու Միացեալ Հայաստանի կերտման գաղափարով։
Դաշնակցութեան հիմնադիրները նախ եւ առաջ մտքի ռահվիրաներ էին, անոնք մեր ժողովուրդը ստրկամտութեան կապանքներէն ձերբազատելու համար հաղորդակից եղան ազատատենչ գաղափարներու, ապա այդ գաղափարներուն կեանք տուին ու ծնաւ գործը։ Անոնք Յեղափոխութեան դրօշին ներքեւ համախմբեցին ժողովուրդը ու անոր ազատագրական պայքարը առաջնորդեցին։

Հարթ չեղաւ Դաշնակցութեան ճամբան։ Ազատագրական պայքարի փուլերէն մինչեւ անկախ հայրենիքի կերտում ու պետականութեան ձեւաւորում, ներքին կազմակերպական կեանքի բիւրեղացումէն մինչեւ ապստամբութիւն բռնակալ վարչակարգերու դէմ, Սփիւռքի ձեւաւորումէն, հայ երիտասարդութեան քաղաքականացումէն ու յեղափոխականացումէն մինչեւ Հայ Դատին ու հայոց պահանջատիրութեան հետապնդում բազմակողմանի ճակատներու վրայ։

Հայաստանի խորհրդայնացումով Դաշնակցութիւնը իր հայրենիքէն դուրս գալով պետական մտածողութեամբ ու փորձառութեամբ գործեց սփիւռքի մէջ, հիմնելով ու զարգացնելով բոլոր այն կառոյցները, որոնք սփիւռքահայութիւնը պիտի դարձնէին կազմակերպ ուժ, շուրանակելով հայապահպանման իր առաքելութիւնը, Հայաստանէն դուրս փոքրիկ Հայաստան մը հիմնելով իւրաքանչիւր հայու սրտին, հոգիին ու գիտակցութեան մէջ ու մասունքի պէս փայփայելով հայոց պետականութեան խորհրդանիշները՝ եռազոյն դրօշը, քայլերգն ու զինանշանը։
Դաշնակցութեան ուժի հիմնական աղբիւրը իր շարքերուն հաւատքն էր հայ ժողովուրդի տեսիլքին իրականացման հանդէպ, ազգային մեր արժէքներուն հանդէպ։ Երկրորդ ուժի աղբիւրը իր գաղափարաբանութիւնն էր՝ ազատութեան, անկախութեան, ժողովրդավարութեան, ընկերվարութեան եւ յեղափոխութեան հիմնասիւներով։

Դաշնակցութիւնը հաւատքը գործով արտայայտեց ու ցնծութեամբ տօնեց շատ մը թերահաւատներու կողմէ անկարելի համարուող Հայաստանի վերանկախացումն ու Արցախի ազատագրումը։ Գէորգ Չաւուշներու, Սերոբ Աղբիւրներու, Արամ Մանուկեաններու հաւատարիմ ժառանգորդները այս անգամ պայքարի դաշտի վրայ պիտի յայտնուէին հայ ժողովուրդի զաւակներուն կողքին, որպէս Թաթուլ կրպէեաններ, Շահէն Մեղրեաններ եւ Պետօներ ու նոյն գաղափարներով ներշնչուած, Դաշնակցութեան դրօշին տակ պիտի կռուէին ու զոհուէին յանուն համազգային ճիգերով նուաճելի ազատութեան։

Դաշնակցութիւնը Վերընձիւղուելով Հայաստանի մէջ, պայքարեցաւ անկախ ու ինքնիշխան հայրենիքին զարգացման համար։
Դէպի երկիր կարգախօսով սփիւռքահայութեան ներուժը ուղղեց հայրենիք, հայրենի մեր երկիրը մեր բոլորին մասնակցութեամբ ծաղկած տեսնելու հեռանկարով։ Հայ Դատի իր գրասենեակներուն ճամբով եւ աւելի քան 30 երկիրներու մէջ գործող իր կառոյցներով Հայաստանի ու Արցախի շահերուն պաշտպանը հանդիսացաւ։
Հայրենիքի մէջ վերընձիւղուելով մերթ ընդ մերթ գործցակցեցաւ տարբեր իշխանութիւններու հետ, յաճախ ալ գործեց որպէս ընդդիմութիւն, միշտ սրբագրելու նպատակով մատնացոյց ընելով թերութիւնները ու լուծումներ առաջարկելով։ Իշխանութիւններու հետ գործակցութեան որպէս արդիւնք բարեփոխուեցաւ Հայաստանի սանմանադրութիւնը, ձեւաւորուեցաւ երկքաղաքացիութեան օրէնքը, անցում կատարուեցաւ դէպի երկրի կառավարման խորհրդարանական համակարգ, եւ հայ թրքական տխրահռչակ արձանագրութեան դէմ համահայկական բողոքի ալիք բարձրացաւ եւ այդ արձանագրութիւնները յետս կոչուեցան։

Այս տարողունակ աշխատանքներուն ընթացքին բնականաբար ունեցաւ բացթողումներ, զորս իր շարքերուն մէջ տիրող ազատ խօսքին եւ կառուցողական քննարկումներուն ճամբով սրբագրեց։
Այս բոլորը պսակումը չհանդիսացան տակաւին Դաշնակցութեան հեռահար նպատակներուն։
Այո՛, այս տարիներու ընթացքին մեր ժողովուրդը ունեցաւ յոյս ներշնչող ձեռքբերումներ՝
Ունեցանք երկու անկախ հանրապետութիւն
Հայաստանը նուաճեց իր պատկառելի դիրքը միջազագային ընտանիքին մէջ։

Հայաստանի Հանրապետութիւնը յառաջընթաց ապրեցաւ, ունենալով քաջարի բանակ, տնտեսական որոշակի յառաջընթաց ու տարբեր ոլորտներու մէջ արձանագրեց նկատառելի զարգացում։

Տասը միլիոնի հասնող սփիւռքը ազդեցիկ ներկայութիւն շարունակեց մնալ տարբեր երկիրներու մէջ եւ իր ներքին մարտահրաւէրներու դիմագրաւման կողքին հայեացքը ուղղեց դէպի հայրենիք։

Հայոց Ցեղասպանութեան ճանաչման ու հատուցման գծով համահայկական կեցուածք որդեգրուեցաւ։
Այս բոլորը դրական ներգործութիւն ունեցան ոչ միայն հայրենի այլեւ սփիւռքահայ զանգուածներուն վրայ։ Փաստօրէն սուրիական պատերազմի տարիներուն աւելի քան 20000 սուրիահայեր հաստատուեցան Հայաստան եւ Հայաստանի իսկ ղեկավար դէմքերուն վկայութեամբ դրականօրէն համարկուեցան հայաստանեան միջավայրին մէջ։

Այդ տարիներուն, Հայաստան Սուրիական պատերազմի ողջ տեւողութեան կառուցողական դիրքերէ հանդէս եկաւ ու օգնութեան ձեռք երկարեց Սուրիոյ եւ սուրիահայութեան։ Հայաստանի հիւպատոսութիւնն ու դեսպանութիւնը եղան միակ դիւանագիտական ներկայացուցչութիւնները, որոնք չփակեցին իրենց դռները, իսկ վերջին մէկուկէս տարուան ընթացքին յատկապէս ընդգծելի եղաւ ՀՀ Պաշտպանութեան Նախարարութեան մարդասիրական օժանդակութեան նախաձեռնութիւնը ու մեր երկիրը աշխարհին ներկայացաւ որպէս խաղաղութիւն արտահանող երկիր։

Մեր պետութիւնը անցած է բարդ ու դժուար ուղի, ու թէեւ յաղթահարած է շարք մը մարտահրաւէրներ, սակայն անհրաժեշտ է այս առիթով մատնանշել երեւելի ախտեր, որոնք յաղթահարելի կրնան ըլլալ միայն քաղաքական կամքի եւ միասնական աշխատանքի մշակոյթի գոյութեան պարագային։
2018-ի ժողովրդային շարժումով նոր էջ բացուեցաւ հայրենի մեր ժողովուրդին դիմաց։ Ժողովուրդը պահանջեց արդար հասարակարգի ձեւաւորում, տնտեսապէս հզօր ու ապահով երկրի մը նախադրեալներու հաստատում։

Դաշնակցութիւնը եւս, ընդառաջելով վարչապետի առաջարկին, պատրաստակամութիւն յայտնեց գործակցելու նոր ձեւաւորուած իշխանութեան հետ եւ նպաստելու երկրի անցնցում զարգացման գործընթացին։ Սակայն, ցաւ ի սիրտ, հասարակութիւնը դէպի բեւեռացում առաջնորդող դրսեւորումներ երեւան եկան, սեւի ու սպիտակի, յեղափոխականներու եւ հակայեղափոխականներու բաժնելով մեր հասարակութիւնը։

Իշխանութիւնները ազգային միասնական օրակարգ ձեւաւորելու փոխարէն, երկրի զարգացման նպաստող հայեցակարգային ծրագրի բացակայութեան, անցեալի սխալները տեղ-տեղ կրկնել սկսան։

Այս բոլորին կողքին պոլշեւիշմի ակունքներէն սնուած հակադաշնակցական պայքարը կրկին գլուխ ցցեց, ապականելով երկրի քաղաքական կեանքը։
Հաւատալով մեր երկրէն ներս առողջ երկխօսութեան մշակոյթին, Հայ Յեղափոխական Դաշնակցութիւնը քանիցս յայտնեց իր տեսակէտները երկրի անցնցում զարգացման ու անվտանգութեան պահպանման առումներով։

Հայաստանի ԳՄ-ը յառաջացուց ոլորտային մասնագիտական յանձնախումբեր, որոնց միջոցաւ պարբերաբար հրապարակուեցաւ ու կը հրապարակուի կուսակցութեան կեցուածքը երկրի զարգացման եւ մարտահրաւէրներուն նկատմամբ։ Տնտեսութեան եւ ընկերային քաղաքականութեան մէջ կարեւոր համարելով ընկերային արդարութիւն հաստատող մօտեցում, որ միաժամանակ մրցակցային հաւասար պայմաններ կը ստեղծէ բոլորին համար. Եւ ըստայնմ երկրի բարիքները կը հասնին հասարակութեան բոլոր խաւերուն, իսկ նուազ կարելիութիւն ունեցողները կը պաշտպանուին պետութեան կողմէ։

Արցախի հարցին գծով ՀՅԴ-ն շեշտեց, որ հարցին կարգաւորումը հիմնուած պէտք է ըլլայ Արցախի ժողովուրդին՝ քանի մը անգամ արդէն արտայայտած փափաքին վրայ՝ ապրիլ Ատրպէյճանէն անկախ եւ ի վերջոյ միանալ Հայաստանի Հանրապետութեան։

ՀՀ-ը ունի կարեւոր դերակատարութիւն Արցախի Հանրապետութեան պաշտպանութեան եւ անոր ձայնը աշխարհին հասցնելու իմաստով։ Հարցի կարգաւորման բանակցութիւններուն մէջ Արցախը պէտք է ունենայ լիիրաւ մասնակցութիւն. ՀՀ-ը բանակցութիւններուն մէջ չի կրնար փոխարինել Արցախի Հանրապետութիւնը. այս բոլորը անհրաժեշտ է ամրագրել երկու պետութիւններուն միջեւ ռազմավարական համագործակցութեան պայմանագրով։

ՀՀ ներկայ իշխանութեան վարքագիծը ընդհանուր առմամբ չ՚ընթանար այն սկզբունքներու ուղղութեամբ, որ ժողովուրդին մեծ մասը արտայայտած էր 2018-ի ժողովրդային շարժման ընթացքին։ Թէեւ դրական որոշ քայլեր առնուած են իշխանութիւններուն կողմէ՝ փտածութեան եւ մենաշնորհներու դէմ, շատ մը պարագաներու սակայն՝ անոնք կատարուած են ընտրովի. ուստի պէտք չէ ժողովուրդը անգամ մը եւս հիասթափութեան մատնել։
Ցանկալի է միասնական ճիգերով ամրապնդել մեր երկրի ներքին ու արտաքին անվտանգութիւնը, հասարակութեան համերաշխութիւնը, պատմութենէն դասեր քաղելով նայիլ ապագային, որպէսզի հայութեան համընդհանուր ճիգերու մէկտեղումով նոր թափ ստանայ մեր երկրին յառաջընթացը։
Դատապարտելի են մեր ժողովուրդին համերաշխութիւնը վտանգող բոլոր անպատասխանատու դրսեւորումները, հարցերը լուծելու մենիշխանական մօտեցումները։

ՀՅԴաշնակցութիւնը, առանց ներքաշուելու ներքին պարակտումներու կործանարար յորձանուտին մէջ, պիտի շարունակէ իր ուղին՝ ուժերու գերագոյն լարումով ծառայելու իր նպատակներուն՝
-Հայաստանի Հանրապետութեան բազմակողմանի զարգացման,
-Արցախի հարցին բարւոք լուծման,
-Ջաւախքի մեր ժողովուրդին իրաւունքներուն պաշտպանութեան
-Սփիւռքի հզօրացման
-Եւ Ազատ, Անկախ, Միացեալ Հայաստանի կերտումին։

Սիրելիներ,

Պատերազմէն տակաւ դուրս եկող Սուրիոյ հիւսիսարեւելեան շրջաններ թրքական վերջին ներխուժումը գոյութեան նոր մարտահրաւէրներու դիմաց կը դնէ սուրիահայութիւնը։ Թուրքիոյ նորօսմանեան ախորժակները կրկին գլուխ կը ցցեն՝ սուրիահայութեան եւ ընդհանրապէս Սուրիոյ անվտանգութիւնը խախտելով։ Սուրիահայութիւնը այս բոլորին մէջ գտած է իր ապրելու եւ գոյատեւելու բանաձեւը, անհրաժեշտ է, սակայն, ըլլալ զգօն եւ համահայկական ճիգերով, Հայաստան -Սուրիա յարաբերութիւններու ամրապնդումով պահպանել սուրիահայութեան անվտանգութիւնը, նպաստել անոր վերականգնումին ու պատմական դերակատարութեան պահպանման, որպէս Հայոց Ցեղասպանութենէն ճողոպրած մեր ժողովուրդին կարեւոր մէկ հատուածը, պատմական Հայաստանի ժառանգութիւնը կրող ու ցեղասպանութեան վկան հանդիսացող հայութեան կարեւոր մէկ մասնիկը։ Յատկապէս նկատի ունենալով, որ Սուրիական Հայրենիքը երկրիս վսեմաշուք նախագահին ղեկավարութեամբ ամէն ջանք ի գործ կը դնէ ու պարարտ հող կը ստեղծէ սուրիահայութեան վերականգնումին եւ երկրին աստիճանական ապաքինման համար։
Ուստի, ձեռք- ձեռքի տալով, լծուինք վերակառուցման ու համայնքի վերաշխուժացման յոյժ կարեւոր աշխատանքներուն, կանգուն պահելով մեր կառոյցները, զօրավիգ կանգնելով ու նկատառելի դեր վստահելով երիտասարդ տարրին։

Յարգանք բոլոր այն նահատակներուն, որոնք զոհուեցան Հայաստանի, Սուրիոյ եւ Արցախի հողերուն պաշտպանութեան ի խնդիր։

Կեցցէ մեր ժողովուրդը ի Հայաստան եւ ի սփիւռս աշխարհի։
Կեցցեն Հայաստանը, Արցախն ու Սուրիական Հայրենիքը։

kantsasar.com