Թադևոս Ավետիսյանի դիտարկմամբ`առկա է նաև այն մտահոգությունը, որ ապագայում կարող են լինել նաև սահմանափակումներ` կապված արտահանվող ապրանքների սանիտարահիգիենիկ վիճակի հետ, ինչը կառաջացնի լրացուցիչ դժվարություններ։ Մյուս մտահոգությունն առնչվում է տրանսպորտային սահմանափակումներին, որոնք կառաջացնեն տրանսակցիոն բարդություններ նույն արտահանման ոլորտում տեղափոխման ծախսերի թանկացման առումով։

«Արտագնա միգրանտների տեղաշարժի սահմանափակումների պարագայում մենք արդեն իսկ ունենք առարկայական դժվարություններ, որովհետև այստեղ շատ կարևոր է ժամանակային հատվածը։ Միգրանտները սովորաբար սեզոնային աշխատանքներ կատարելու համար Ռուսաստան մեկնում են փետրվարին, այսինքն` նրանք արդեն իսկ պետք է մեկնած լինեին։ Սեզոնը սկսվել է, բայց նրանք այնտեղ չեն, և յուրաքանչյուր օրը կրճատում է նրանց աշխատանքային պլաններն ու ծրագրերը` չեղարկելով այն եկամուտները, որոնք ակնկալվում էին արտագնա աշխատանքից»,– նշում է տնտեսագետը։

Թադևոս Ավետիսյանի համոզմամբ` նշված խնդիրն իր հետ անպայման կբերի Ռուսաստանից դրամական փոխանցումների էական նվազման։ Բացի դրանից, Ռուսաստանում կեցության իրավունք ստացած ՀՀ քաղաքացիների համար զգալի խնդիրներ են առաջացել հենց այդ երկրում առկա տնտեսական դժվարությունների պատճառով։ Նրանցից ակնկալվող աջակցությունը նույնպես կրճատվում է։

Տնտեսագետի կարծիքով` զգալիորեն տուժում է նաև տուրիզմը, որովհետև ամեն տարի Հայաստան են ժամանում մեծ թվով ռուսաստանցի զբոսաշրջիկներ, և ոչ ոք չգիտի, թե որքան կարող են տևել տեղաշարժի հետ կապված սահմանափակումները։ Ըստ նրա` ժամանակային անորոշությունը թույլ չի տալիս հստակ հաշվարկել տնտեսվարող սուբյեկտների ճշգրիտ կորուստները, որոնք կարող են շարունակվել համաճարակի տևողության պատճառով։