Մայիսի 15-ին Հրապարակ TV-ի Հինգշաբթի հաղորդաշարի հյուրն էր ՀՅԴ անդամ, ՀՀ ԱԺ «Հայաստան» խմբակցության պատգամավոր Արթուր Խաչատրյանը: Քննարկվել են ներքաղաքական հարցեր, անդրադարձ է կատարվել ՀՀ իշխանությունների վարած քաղաքականության ձախողումներին գրեթե բոլոր ոլորտներում, տրվել քաղաքական դաշտում նկատվող նախընտրական վերադասավորումների ընդհանուր պատկերը:

Խոսելով վերջին քառօրյայի ընթացքում ԱԺ-ում ուժային կառույցների ղեկավարների զեկույցների շուրջ քննարկումների բացահայտ տապալման մասին, Արթուր Խաչատրյանը դա բացատրել է առաջին հերթին իշխանությունների՝ ընդդիմության հարցերին պատասխան չունենալով և ՀՀ կառավարության ծրագրից ակնհայտ շեղումներով: «Իրենց իշխանության 8-րդ տարում նրանք արդեն պետք է զեկուցեին, որ այս, այս, այս բաներն ենք արել, մինչդեռ շարունակում են խոսել ապառնի ժամանակով՝ այս, այս, այս բաներն ենք անելու և հրապարակում են թվեր, որոնց բացատրությունն իրենք էլ չգիտեն: Օրինակ՝ խոսում են հանցավորության աճից, թմրամոլության սարսափելի վիճակից, իսկ թե ինչու են աճել հանցավորությունն ու թմրամոլությունը՝ բացատրություն չկա: Ո՞ւր են մնացել Արցախի ապագա կարգավիճակի մասին և արցախահայությանը տված այս իշխանությունների խոստումները: Ոչինչ չեն արել: Այսօր նրանց հույսը մի թղթի կտոր է, որի վրա գրված կլինի «խաղաղության պայմանագիր» և որով գուցե կարողանան բացատրել Արցախի հանձնումն ու հայաթափումը»,- նշել է Արթուր խաչատրյանը:

Անդրադառնալով հարցին, թե ինչո՞ւ խորհրդարանում երկխոսություն չկա իշխանությունների և ընդդիմության միջև՝ Արթուր Խաչատրյանը, ի թիվս մի շարք այլ պատճառների, առանձնացրել է նաև ՀՀ թուրքամետ իշխանությունների և ընդդիմության դավանած արժեհամակարգերի տարբերությունը: «Ի՞նչի շուրջ երկխոսենք մի իշխանության հետ, որ հերքում ու կասկածի տակ է դնում Հայոց ցեղասպանությունը»,- ասել է նա:

Խոսվել է նաև Նիկոլ Փաշինյանին իմպիչմենտի ենթարկելու գործընթացի մասին, որի նախաձեռնողները, ըստ Արթուր Խաչատրյանի, հաշվի չեն առնում ակնհայտ խոչընդոտները, ինչից տպավորություն է ստացվում, որ նրանք սպասարկում են որոշակի քաղաքական շրջանակների շահերը: «Մեզնից ոչ ոք ավելի շահագրգռված չէ Նիկոլ Փաշինյանին իշխանությունից հեռացնելու հարցում, մեզնից ոչ ոք ավելի շատ չի պայքարել դրա համար (փողոցից մինչև խորհրդարան), վերջապես մենք ենք առաջինը խոսել Փաշինյանին անվստահություն հայտնելու մասին և բոլորից էլ լավ ենք հասկանում այդ գործընթացի ողջ սպեցիֆիկան»,- ասել է Արթուր խաչատրյանը:

Մանրամասները՝ տեսանյութում