ՀՅԴ Բյուրոյի նախաձեռնությամբ՝ հոկտեմբերի 30-31-ը տեղի ունեցավ ՀՅԴ ուղեկից միությունների` Համազգայինի, ՀՕՄ-ի եւ ՀՄԸՄ-ի կենտրոնական վարչությունների առցանց խորհրդաժողով:

Բացելով այն` ՀՅԴ Բյուրոյի ներկայացուցիչ Հակոբ Տեր-Խաչատուրյանը կարեւորեց այն աշխատանքը, որը մեր նորագույն պատմության ամենադժվարին օրերին, հակառակ բոլոր դժվարություններին, կատարում են ուղեկից միությունները` մնալով պատնեշի վրա, հավատարիմ իրենց մշակութային, մարդասիրական, մարմնակրթական առաքելությանը:

Ընդգծվեցին այն բազմաթիվ մարտահրավերները, որոնց այսօր դիմագրավում են ՀՅԴ ուղեկից միությունները, մասնավորապես` միությունների երիտասարդացում, արդիականացման մարտահրավերիներին ընդառաջ գործունեության նոր ոլորտների որդեգրման հարկադրանք, միությունների աշխատանքների համադրման եւ համակարգման անհրաժեշտություն, ինչպես նաեւ միությունների շրջանավարտությունից հետո արդեն նախկին միութենականներին դեպի ազգային գործունեության դաշտի մղում:

Ուղեկից միությունների ներկայացուցիչներ Նաիրի Տերտերյանը, Մկրտիչ Մկրտիչյանը եւ Վաչե Նաջարյանը, համապատասխանաբար, ներկայացրեցին ՀՕՄ-ի, Համազգայինի եւ ՀՄԸՄ-ի համահայկական կառույցների աշխատանքային հարթակները, վերջին տարիներին իրականացրած ծրագրերը եւ դիմագրաված դժվարությունները:

Խորհրդաժողովի մասնակիցները քննարկեցին նաեւ ՀՅԴ ուղեկից մարմինների եւ ՀՅԴ Հայ դատի գրասենյակնների, Հայրենիք-Սփյուռք համագործակցության հեռանկարները: