Այսօր Հայաստանը գտնվում է Թուրքիայի եւ Ադրբեջանի աննախադեպ ճնշման ներքո։ Այս մասին դեկտեմբերի 14-ին լրագրողների հետ զրույցում ասաց ՀՅԴ անդամ, «Հայաստան» խմբակցության պատգամավոր Թադեւոս Ավետիսյանը։ Պատգամավորի խոսքով՝ Հայաստանին պարտադրվում է այսպես կոչված «խաղաղության օրակարգ», որը ենթադրում է Երեւանի կողմից հավելյալ զիջումներ։ «Սա ավելի շատ ոչ թե խաղաղություն է, այլ սրընթաց անցում նոր պատերազմի։ Այս դեպքում չի կարող լինել տարածաշրջանային խաղաղություն, երբ անտեսվում են կողմերից մեկի շահերը, իսկ օրակարգը թելադրվում է ուժի կիրառմամբ, ընդ որում, հաշվի առնելով տարածաշրջանի այլ երկրների շահերը»,-պարզաբանեց Ավետիսյանը։

Նրա կարծիքով՝ նման գործընթացը շուտով կարող է հանգեցնել Հայաստանի անկախության եւ ինքնիշխանության կորստի։

Ավետիսյանի խոսքով, իշխանությունները «մանիպուլյացիա» են անում՝ տարածաշրջանային տնտեսական ինտեգրումները հակադրում են այն իրողություններին, որոնք այսօր ունենք. «Տարածաշրջանային ինտեգրացիան շատ կարեւոր է, տնտեսությունները տարածաշրջանում փոխադարձ կապերը զարգացնելով կարող են ունենալ տնտեսական լրացուցիչ արդյունքներ, բայց դա չի վերաբերում այսօրվան եւ մեր տարածաշրջանին, քանի որ, դեռեւս լուծված չեն բազմաթիվ աշխարհաքաղաքական հարցեր մեր տարածաշրջանում»: Նրա խոսքով, այսօր Արցախի հանրապետությունը գտնվում է ծանր իրավիճակում, Հայաստանի ինքնիշխան տարածքում գտնվում են ադրբեջանական զինվորները եւ, բացի այդ, լուծված չէ Արցախի կարգավիճակի հարցը. «Եվ, այդ անորոշությունների ֆոնին գումարվում է նաեւ Հայաստանի տնտեսական հյուծումը: Այս իրավիճակում նման օրակարգը, փաթեթավորված որպես տարածաշրջանային խաղաղություն, իշխանությունները հրամցնում են, որպես միակ այլընտրանքը»:

Թադեւոս Ավետիսյանը հիշեցրեց Ադրբեջանի եւ Թուրքիայի՝ նրա խոսքով ասած՝ «լկտի պահվածքը», որոնք Գորիս-Կապան ճանապարհներին, այսինքն՝ մեր երկրի տարածքում ադրբեջանական մաքսակետեր են տեղադրել եւ հարկում են մեր քաղաքացիներին ու գումարը լցնում Ադրբեջանի բյուջե:

Մանրամասները՝ տեսանյութում