Ամենևին պատահական չէր, որ Թուրքիայի արտգործնախարարի՝ միջանցքների մասին հայտարարությունից անմիջապես հետո Հայաստանի նորանկախ պատմության մեջ ամենաձախողած, թրքասեր դիվանագետը գալիս և հանդիպում է ԱԺ քաղաքական մեծամասնության հետ. ասաց ՀՅԴ Հայաստանի ԳՄ ներկայացուցիչ, ԱԺ փոխնախագահ Իշխան Սաղաթելյանը ԱԺ-ում լրագրողների հետ զրույցում։

«Հետաքրքիր է՝ ի՞նչ էր սովորեցնում իրենց Լիպարիտյանը, ով մեկ օր առաջ հայտարարել էր, որ Արցախի կարգավիճակի մասին խոսելը հղի է մեծ վտանգներով․ է՞դ էր քննարկում Ամենաձախողված դիվանագետը, ով պատերազմում ձեռք բերված հաղթանակներից հետո երկիրը տրամադրում էր պարտության, ով իր ողջ կյանքում հայտնի է իր թրքասիրությամբ»,-հարցադրում արեց Սաղաթելյանը։

Նա անդրադարձավ Լիպարիտյանի հայտարարությանը, թե բա ինչի՞ չեն մորթել Արծվիկ Մինասյանին։

«Արծվիկ Մինասյանի բախտը բերել է՝ թուրքերի ձեռքը չի ընկել՝ չեն մորթել, բայց մորթել են էն Թալիշի պապուն, բազմաթիվ հայորդիների, շուրջ 5 հազար մարդկանց, այսինքն, եթե կա մարդ, ով իրեն համարում է հայ և ասում է՝ թուրքերը մեզ չեն մորթել, ինքն ի՞նչ կապ ունի այս ժողովրդի, ազգի, պետության հետ, ինքը գործակալ է, ինքը թրքացած գործիչ է, ով մեր հասրակությանը շարունակում է տրամադրել նրան, ինչ հայտարարում է։ Այսինքն, ո՞նց նայենք՝ 15 օր առաջ, երբ Շուշիի մոտակայքում գնդակահարեցին քաղաքացիական անձանց, դա հայ մորթե՞լ էր, թե՞ չէ։ Այսինքն, ի՞նչ նպատակ են հետապնդում այս մարդիկ, ո՞ւր են տանում մեր ժողովրդին, ի՞նչ է սրանց ուզածը»,-ասաց Իշխան Սաղաթելյանը։

Նա վստահեցրեց, որ եթե Լիպարիտյանին ու նրա նմաններին թվում է, որ Հայաստանում հաղթել է այդ տեսակը, ով երկիրը տանելու է վերջնական ոչնչացման և կործանման՝ սխալվում է, այդ տեսակը Հայաստանում տեղ չունի, այս ամենը ժամանակավոր է, և մենք այս իրավիճակից դուրս ենք գալու։

Փողոցային պայքարը ոչ թե հնարավոր է, այլ անհրաժեշտ է․ նշեց Իշխան Սաղաթելյանը։

«Այս իրավիճակից միայն կարող ենք դուրս գալ համազգային դիմադրություն ձևավորելով, համաժողովրդական ընդվզում սկսելով։ Որքան շուտ հասնենք դրան, այդքան շուտ երկիրն այս վիճակից դուրս կգա․ մենք չենք համակերպվել այս վիճակին, մենք չենք ընդունելու այս պարտությունը, այս ծնկի եկած վիճակը, ավելի դժվար օրեր է մեր ժողովուրդը հաղթահարել։ Ես հավաստիացնում եմ ձեզ, որ մենք ամեն ինչ անելու ենք և ստեղծված իրավիճակից դուրս ենք գալու․ սա դատավճիռ չէ, սա ճակատագիր չէ, ինչպես իրենք են փորձում ներկայացնել, որ ամեն ինչ ավարտված է, այլևս ելք չկա, պետք է համակերպվենք այս կորուստներ հետ ու պատրաստ լինենք նոր զիջումների և կորուստների․ մենք սա չենք ընդունելու, բոլորս միասին պետք է ուժ գտնենք մեր մեջ և դուրս գանք այս իրավիճակից, մենք գտնում ենք, որ դա հնարավոր է»,-ասաց Իշխան Սաղաթեյանը։

Նա վստահեցրեց, որ ամենօրյա գործողություններով փորձում են հասնել իշխանափոխության։

«Եթե մեզ հաջողվի այս իշխանությանը վռնդել իր զբաղեցրած աթոռներից՝ աշխարհը մեզ հետ խոսելու է այլ լեզվով»,-ասաց Իշխան Սաղաթելյանը։

Նա ընդունեց՝ այսօր չունենք այդ կազմակերպվածության բարձր մակարդակը, որ անցնենք փողոցային լայնածավալ պայքարի և աշխատանքների։

«Մենք մեկ անգամ փողոց պետք է դուրս գանք՝ վերջնական դուրս գանք, շատ ավելի կազմակերպված և հանկարծ մեր ժողովրդին չտանենք հիասթափության»,-ասաց նա։

Հարցադրմանը՝ էլ ե՞րբ ե դուրս գալու, երբ Չավուշօղլուն մեր փոխարեն մեր երկրում որոշումներ է կայացնում, ի պատասխան Իշխան Սաղաթելյանը հիշեցրեց, որ ինքը դեռ մեկ տարի առաջ էր դա ասում, որ եթե այս իշխանությունները մնան՝ դա է լինելու։

Այսօր, նրա համոզմամբ, կա խնդիր փողոցային պայքարը լայնամասշտաբ ձևով կազմակերպելու։

Մանրամասն՝ տեսանյութում․

https://youtu.be/7drM9KmFItU