Ռուսական ռուբլու արժեզրկման ֆոնին պետք չէ, որ հանրության շրջանում ցայտնոտային տրամադրություններ ստեղծվեն։ Հասկանալի է, որ մարդիկ օբյեկտիվորեն անհանգստացած են, հատկապես նրանք, ովքեր ռուբլիով խնայողություններ ունեն բանկերում կամ իրենց հիմնական եկամուտները ռուբլիով փոխանցումների ձևով է կատարվում։ Tert.am-ի հետ զրույցում, անդրադառնալով Հայաստանի տնտեսության վրա ռուսական ռուբլու արժեզրկման հնարավոր հետևանքներին, ասաց ՀՅԴ անդամ, ԱԺ պատգամավոր, տնտեսագետ Թադեոս Ավետիսյանը։

«Դեռևս պարզ չէ, թե ինչքան երկար կտևի այս գործընթացը։ Ակնհայտ է, որ ներկայիս աշխարհաքաղաքական լարումը և ՌԴ-ի դեմ կիրառվող սանկցիաները հարվածելու էին ռուսական տնտեսությանը և ազգային արժույթին։ Քանի դեռ որոշակի անորոշություն կա և պարզ չէ, թե ինչքան երկար կտևի այս գործընթացը, պարզ չէ նաև, թե որքան և ինչ ծավալ կունենան այդ բացասական հետևանքները։ Տարբեր սցենարներ կան։ Եթե արագ գտնվեն աշխարհաքաղաքական լուծումներ, և պատերազմը ավարտվի, կարծում եմ հնարավոր կլինի արագ դուրս գալ ստեղծված իրավիճակից, բայց կա նաև վատատեսական սցենարը, որը տևական ժամանակ բացասական ազդեցություն կարող է բերել տնտեսության վրա»,- ասաց Ավետիսյանը։

Վերջինս շեշտեց, որ մեր պարագայում կարևոր անելիքը պատկանում է կառավարությանը, որպեսզի գտնեն կանխարգելիչ լուծումներ. «Շատ ՀՀ քաղաքացիների դեպքում իրական եկամուտների նվազում է դիտվում, սա առաջացնելու է սոցիալական խնդիրներ, այս ուղղությամբ կառավարությունը և դրամական իշխանությունները արդեն պետք է լրջորեն զբաղվեն։ Հայաստանի տնտեսությունը ինտեգրման բարձր աստիճան ունի ՌԴ տնտեսության հետ և հետևաբար այդ բացասական երևույթները անցնելու են նաև մեր տնտեսությանը»։

Ավետիսյանը մտահոգություն հայտնեց նաև դեպի ռուսական շուկա հայկական արտահանումների հետ կապված. «Ռուբլու արժեզրկման ֆոնին ռուսական շուկայում հայկական ապրանքները կթանկանան, և այս գործընթացների շարունակականության պարագայում ռուսական շուկայում կունենանք հայկական ապրանքների պահանջարկի նվազում։

Բացի այդ, ռուսական շուկայից ներկրվող ապրանքը դառնալու է ավելի մրցունակ գնանկման արդյունքում, և այստեղ առաջանալու է ներքին արտադրողներին պաշտպանելու խնդիր։ Պետք է հասկանալ` ինչպիսի սցենարներով կընթանան իրադարձությունները։ Ռուս վերլուծաբանները արդեն առաջ են քաշել մի քանի սցենարներ և ունեն որոշակի գնահատումներ, գոնե դրանք օգտագործելով՝ մենք պետք է տեսնենք, թե ինչ բացասական հետևանքներ կունենա Հայաստանի տնտեսությունը։ Միայն հանգստացնող կոչերով և առանց հակաճգնաժամային կոնկրետ քայլերի մենք չենք կարողանալու դուրս գալ այս վիճակից, որովհետև առանց համապատասխան միջոցառումների հնարավոր չի լինելու նվազագույն կորուստներով հաղթահարել այս ճգնաժամը»,- ասաց նա։

Անդրադառնալով ՀՀ քաղաքացիների կողմից ռուբլու արժեզրկման ֆոնին դրամով ռուբլի գնելուն, Ավետիսյանը այն ռիսկային համարեց։

«Դա ռիսկ է, որին դիմում են, տնտեսագիտության մեջ դա հայտնի է որպես սպեկուլյացիա, գնում են էժան, հույս ունենալով, որ հետագայում կարող են վաճառել։ Ռիսկը իրենցն է, հնարավոր է ստանան գերշահույթ, բայց հնարավոր է նաև ունենան կորուստներ, ապահովագրված երաշխիքներ չկան այս պահին։ Սա կազինոյում խաղադրույք անելու պես մի բան է»,- ասաց տնտեսագետ Թադևոս Ավետիսյանը։

Հեղինակ Անի Հակոբյան