Այսօր, մարտի 11-ին Կոնդի Սուրբ Հովհաննես Մկրտիչ եկեղեցում տեղի ունեցավ գրող, հրապարակախոս, ՀՀ մշակույթի վաստակավոր գործիչ, ՀՀ Պատվո շքանշանակիր Ալվարդ Պետրոսյանի հոգեհանգիստը։

«Մտավորական էր բառի ամբողջական իմաստով, ազգային նկարագրի տեր»,- ասաց ՀՅԴ անդամ, ՀՅԴ Բյուրոյի երկարամյա ներկայացուցիչ, «Կամավորական շարժում» ՀԿ նախագահ Հրանտ Մարգարյանը։

Հրանտ Մարգարյանի խոսքով ինքն առնչվել է Ալվարդ Պետրոսյանի հետ՝ Ղարաբաղյան պայքարի առաջին իսկ օրերից։

«Իր տեսակով համարձակ էր և հենց այդ համարձակութունը պարտավորեցնում էր, որ հարգես իրեն»,-ասաց Հրանտ Մարգարյանը։

«ԱԺ առաջին և երկրորդ շրջանի պատգամավոր էր, բայց կան մարդիկ, որ ընտրվում են, թե չեն ընտրվում՝ ժողովրդի ձայնն են, ժողովրդի պատգամավոր են։ Ինքն այդպիսին էր։ Ինքը ժողովրդի տրամադրությունը, կամքը, խիղճը ներկայացնող անձ էր։ Ինքը մտավորական էր բառիս ամբողջական իմաստով, բայց պասիվ տեսակը չէր՝ ինքն ակտիվ տեսակն էր, կռվող տեսակ էր, մարտնչող տեսակ էր, և դա է, որ ինձ համար ամենակարևորն էր։ Ինքը մտածում էր և իր արժեքների, իդեալների համար կռիվ տալու ընդունակ անձ էր»,-ասաց Հրանտ Մարգարյանը։

Մեր հասարակության մեջ ամենից շատը դրա կարիքն ունենք, ասաց նա, որովհետև մեզ մոտ մտածողները քիչ չեն, որոնք կարողանում են գնահատել իրավիճակը, տեսնել մեր կյանքի վատ ու ծուռ կողմերը, բայց քչերն են, որ պատրաստ են կռվել։ Ինքը կռվող տեսակն էր։

Լրագրողների հետ զրույցում Հրանտ Մարգարյանն անդրադարձել է նաեւ Արցախում այսօր տիրող իրավիճակին․ Բավական է մի քիչ կազմակերպվածություն, մի քիչ ճիգ, բավական է առաջին օրինակ և հեղեղի նման այդ նոր ազատամարտիկները ասպարեզ են դուրս գալու և մենք ազատագրելու ենք Արցախը։

«Բայց քանի դեռ չենք արել՝ այդ ամոթը ամենքս էլ ապրում ենք։ Ով որ չի ապրում՝ անամոթ է»,-ասաց նա։

Հրանտ Մարգարյանն ասաց՝ մենք էլ ենք զղջում, ամաչում, որ մեր ընկերներն ընկան Ղարաբաղի համար, կռվեցին, իրենց կյանքը տվեցին, բայց դեռ չենք կարողանում իրենց գործը շարունակել։

«Պետք է կարողանանք շարունակել․ դա մեր պարտքն է։ Թշնամին ինչքան էլ ուզում է թվացյալ հզորություն ունենա՝ ամենամեծ հզորությունը կամքն է, հավատքն է, որ այդ կռվող տղերքը ունեին, և ես հավատում եմ, որ մեր ժողովրդի մեջ շատ-շատերը կան, որ այդ կամքը, վճռականությունն ունեն»,-ասաց Հրանտ Մարգարյանը։

Մանրամասները՝ տեսանյութում․