Իշխանությունը կրկին չի դիմում ՀԱՊԿ-ին 4-րդ հոդվածով եւ չի խոսում թաքնված խնդիրների մասին. այսօր՝ սեպտեմբերի 13-ին, ԱԺ-ում լրագրողների հետ զրույցում ասաց ՀՅԴ Բյուրոյի քաղաքական ներկայացուցիչ, «Հայաստան» խմբակցության պատգամավոր Արմեն Ռուստամյանը։

«Բայց ՀԱՊԿ-ի իմաստը հենց դա է։ Եթե ​​հիմա էլ չի արձանագրվում, որ Հայաստանի վրա հարձակում է իրականացվում, ապա ե՞րբ է այս դեպքում արձանագրվելու հարձակման փաստը։ Ռուսաստանի հետ համագործակցության պայմանագրային հիմքերը նման խնդիրների լուծման եւ ագրեսիան ետ մղելու համար բավականին լավ է ապահովված, սակայն Հայաստանի իշխանությունը դարձյալ անհասցե եւ անդեմ կոչ է արելին ՀԱՊԿ-ին այն նույն տրամաբանությամբ, ինչ եղավ անցած տարվա մայիսին Սեւ լճի տարածք Ադրբեջանի ներխուժման ժամանակ»,-նշեց պատգամավորը։

Հիշեցնենք, որ 4-րդ հոդվածի էությունն այն է, որ եթե մասնակից պետություններից որեւէ մեկը ենթարկվի ագրեսիայի որեւէ պետության կամ պետությունների խմբի կողմից, ապա դա կդիտվի որպես ագրեսիա ՀԱՊԿ անդամ բոլոր երկրների դեմ։

«Իշխանության քաղաքականությունը հիմնված է այն թեզի վրա, որ Ադրբեջանը պետք է ընդունի խաղաղության դարաշրջանի գաղափարը։ Սա նշանակում է, որ մեր խաղաղությունը կախված է միայն Ադրբեջանից։ Սա, իր հերթին, նշանակում է խաղաղություն մուրալ»,- հավելեց նա։

«Միակ ելքը պաշտպանունակության ավելացումն է եւ եթե չլուծենք ​​ներքաղաքական խնդիրը, ապա կրկին կհայտնվենք անպաշտպան վիճակում, Ադրբեջանը նորից կհարձակվի։ Քանի դեռ մենք պատրաստ չենք ինքներս մեզ պաշտպանել, մեզ ոչ ոք չի պաշտպանի»,-ասաց պատգամավոը:

Ակնհայտ է, որ Բաքվի ագրեսիան կշարունակվի, քանի դեռ չի դատապարտվել Շուշիի հռչակագիրը, որը կնքվել է Թուրքիայի եւ Ադրբեջանի միջեւ։ Հայաստանի իշխանության համար այդ թեման դեռեւս տաբու է մնում:

«Մենք խոսում ենք դիվանագիտության եւ բանակաշինության ոլորտներում քաղաքականության վերանայման անհրաժեշտության մասին, քանի որ այդ ոլորտներում կան բացթողումներ։ Ադրբեջանը հարձակվում է՝ հաշվի առնելով այն, որ մենք դիվանագիտական եւ ռազմական ուժի առումներով թույլ ենք։ Սակայն ՀՀ իշխանությունը չի ցանկանում ընդունել ձախողման փաստը»,-հավելեց Ռուստամյանը։

Նրա խոսքով՝ իրավիճակը լարված է, իսկ ստացվող տեղեկատվությունը՝ ոչ լիարժեք։

«Այն, ինչ տեղի է ունեցել, սարսափելի է։ Ադրբեջանը բոլորին եւ առաջին հերթին մեր հասարակությանը ցույց տվեց իր իրական դեմքը։ Կարեւոր է ճիշտ եզրակացություններ անել, դասեր քաղել եւ լուծել գլխավոր խնդիրը, որն է՝ կանխել նման միջադեպերի կրկնությունը։ Մենք ասում ենք, որ կգանք ԱԺ մեր օրակարգով, իսկ իշխանության այն հայտարարությունը, թե մենք չենք մասնակցել նիստին, մանիպուլյացիա է։ Մենք արել ենք ամեն ինչ, որպեսզի խորհրդարանն իրական հայտարարությամբ հանդես գա։ ԱԺ-ի ընդունած հայտարարությունը նախորդ հայտարարությունների կրկնությունն է։ Խորհրդարանը պետք է հիմնական ուղերձը հղեր առ այն, որ հենց մենք ենք հետագայում բացառում նման դեպքերը։ Հենց դա է մեզնից սպասում սահմանին կանգնած զինվորը։ Նա սպասում է անվտանգության ամրապնդման։ Հենց դրան պետք է ուղղված լիներ հայտարարությունը»,-շեշտեց Ռուստամյանը։