Երեքշաբթի, 6 հոկտեմբեր 2026-ին ՀՅԴ «Կարմիր Լեռ» կոմիտէի դաստիարակչական-քարոզչականին նախաձեռնութեամբ եւ կազմակերպութեամբ, Այնճարի ազգային Յառաջ-Գալուստ Կիւլպէնկեան քոլեճին եւ Հայ աւետարանական երկրորդական վարժարանին մէջ ոգեկոչուեցաւ յիշատակը Այնճարի արժանաւոր զաւակ Գէորգ Հաճեանին, որ 6 տարի առաջ նոյն օրը հերոսաբար նահատակուեցաւ Արցախի 44-օրեայ պատերազմին Արցախի Վարանգաթաղի բարձունքին վրայ:

Զոյգ վարժարաններուն մէջ աշակերտները առիթը ունեցան դիտելու ՀՅԴ «Կարմիր Լեռ» կոմիտէի դաստիարակչական-քարոզչական յանձնախումբին կողմէ վաւերագրական տեսանիւթ մը, որուն ընդմէջէն անոնք աւելի մօտէն ծանօթացան Գէորգ Հաճեանի կեանքին, անոր տարած ազգային եւ մշակութային բեղուն գործունէութեան եւ, վերջապէս, անոր նահատակութեան:

Ազգային Յառաջ-Գալուստ Կիւլպէնկեան քոլեճին մէջ կազմակերպիչ յանձնախումբին խօսքը արտասանեց ԼԵՄ-ական, 12-րդ կարգի աշակերտ Մեղրի Թասլաքեանը, որ աշակերտներուն ներկայացուց Գէորգ Հաճեանի կեանքն ու գործունէութիւնը, անոր նուիրումը հայ երգին, հայ դպրոցին ու հայ մշակոյթին նկատմամբ, ինչպէս նաեւ` անոր հայրենասիրական անկոտրում ոգին:

Յիշեց, որ Գէորգ Հաճեան նաեւ ուսուցիչ եղած է նոյն վարժարանին մէջ` իր գիտելիքն ու տաղանդը փոխանցելով աշակերտներուն, անոնց մէջ վառ պահելով հայ երգին ու մշակոյթին հանդէպ սէրն ու մեր ազգային արժէքները պահպանելու կարեւորութիւնը:

Մեղրի Թասլաքեան նշեց, որ Գէորգ Հաճեան այն սերունդի ներկայացուցիչն էր, որ իր գիտելիքն ու տաղանդը ծառայութեան վերածեց: Երգեց, ուսուցանեց, դաստիարակեց, ստեղծագործեց եւ իր կեանքով օրինակ հանդիսացաւ` մինչեւ այն օրը, երբ նոյնիսկ իր ամէնէն թանկագինը` կեանքը, նուիրեց հայրենիքի պաշտպանութեան: Արդարեւ, 6 հոկտեմբեր 2020-ին, արցախեան 44-օրեայ պատերազմի ծանր օրերուն, Գէորգ Հաճեան հերոսաբար նահատակուեցաւ` իր անունը դրոշմելով մեր նորօրեայ պատմութեան էջերուն:

Ան շեշտեց, որ Գէորգ Հաճեանին կեանքն ու նահատակութիւնը նաեւ կարեւոր պատգամ կը փոխանցեն աշակերտներուն, թէ նահատակներու յիշատակը միայն անցեալը յիշելը չէ, այլ` գիտակցիլ, որ նոր սերունդը եւս ունի պատասխանատուութիւն, որուն ընդմէջէն ալ` ապագային փոխանցելիք սրբազան ժառանգութիւն:

Խօսք առաւ նաեւ տնօրէն Արմէն Թաշճեան, որ լուսարձակի տակ բերաւ գիւղի զաւակ, արցախեան նահատակ Գէորգ Հաճեանի նկարագրային գիծերը, անոր նուիրումը ազգին, հայ մշակոյթին, հայրենիքին եւ անոր սրբազան հողին:

Ապա ան կամրջում մը կատարեց մերօրեայ իրավիճակին` շեշտելով, որ խաղաղութիւն պիտակին տակ եղած զիջումները, յանձնուողական քաղաքականութիւնը, զորս կը վարէ այսօր Հայաստանի իշխանութիւնը, իսկական վտանգ ու սպառնալիք են, որովհետեւ խաղաղութիւնը պէտք չէ ըլլայ ի գին մեր ազգային արժէքներուն, սկզբունքներուն եւ խորհրդանիշներուն: Արմէն Թաշճեան դիտել տուաւ, որ խաղաղութիւնը պէտք է խարսխուի` արդարութեան վրայ, արցախցիներուն տունդարձի իրաւունքի յարգումին վրայ, մեր ազգային արժէքներու պահպանման վրայ:

Հայ աւետարանական երկրորդական վարժարանին մէջ ձեռնարկի կազմակերպիչ յանձնախումբին խօսքը արտասանեց 11-րդ դասարանի աշակերտ Էլենա Ապու Ռըժէյլի, որ ըսաւ, թէ հայրենիքը այն է, ինչ որ ժողովուրդ մը կը պահէ իր հոգիին մէջ` իր լեզուով, մշակոյթով, յիշողութեամբ, պատմութեամբ եւ սերունդներուն փոխանցուած պատասխանատուութեամբ:

Իր խօսքը աշակերտներուն ուղղելով` Էլենա Ապու Ռըժէյլի ըսաւ, թէ այսօր մենք պարտաւոր ենք սորվելու մեր պատմութիւնը` գիտակցելով, որ հայրենիքը միայն զգացումով չի պահպանուիր, այլ` գիտութեամբ, կազմակերպուածութեամբ, միասնականութեամբ, աշխատանքով եւ մանաւանդ պետական մտածողութեամբ ու տեսլականով:

Աւարտին վարժարանի տնօրէն վերապատուելի Յակոբ Ագպաշարեան իր պատգամը ուղղեց աշակերտներուն` շեշտելով, որ հայրենիքի պաշտպանութիւնը կը սկսի փոխադարձ սիրով ու միասնականութեան ոգիով, ինչ որ թոյլ չի տար, որ թշնամին թափանցէ մեր հաւաքականութեան ամուր շարքերէն ներս: