Մայիսի 8-ին «Անի Պլազա» հյուրանոցի «Անի» սրահում տեղի ունեցավ Շուշիի ազատագրման օրվան նվիրված ՀՅԴ ՆԱՈՒՄ-ի միջոցառումը՝ «Շուշի. Վերադարձ լինելու է» խորագրով։

Միջոցառմանը ներկա էին ՀՅԴ Բյուրոյի և Հայաստանի Գերագույն մարմնի անդամներ, ՀՀ Ազգային ժողովի «Հայաստան» խմբակցության պատգամավորներ, Արցախի Հանրապետության պետական պաշտոնյաներ, ինչպես նաև հասարակական-քաղաքական ու հանրային գործիչներ։

Միջոցառումը մեկնարկեց մեկ րոպե լռությամբ, ներկաները հարգեցին հայրենիքի պաշտպանության սուրբ գործին իրենց կյանքը նվիրաբերած հերոսների հիշատակը: Այնուհետև հնչեցին Հայաստանի և Արցախի Հանրապետությունների օրհներգները։

Ելույթներով հանդես եկան ՀՅԴ Հայաստանի Գերագույն մարմնի ներկայացուցիչ, ՀՀ ԱԺ «Հայաստան» խմբակցության պատգամավոր Իշխան Սաղաթելյանը, Արցախի Հանրապետության Գերագույն խորհրդի նախկին նախագահ, ԱՀ նախկին արտգործնախարար, ՀՅԴ Արցախի կենտրոնական կոմիտեի անդամ, Հայ Դատի Արցախի գրասենյակի պատասխանատու Գեորգի Պետրոսյանը, ՀՅԴ «Նիկոլ Աղբալյան ուսանողական միության» անդամ Վարդան Գալստյանը, ՀՅԴ «Նիկոլ Աղբալյան» ուսանողական միության վարչության ներկայացուցիչ Տարոն Ղազարյանը :

Իր խոսքում Իշխան Սաղաթելյանն ասաց. «Հրաժարվել Արցախից, նշանակում է հրաժարվել ծնողից, զավակից, ինքնությունից, արմատներից: Հետեւաբար, որքան էլ պարտադրեն, որքան էլ փորձեն այս ուրացման քաղաքականությունը իրականացնել, միեւնույն է, չեն հաջողելու: Մենք ունենք ազգային երիտասարդություն, ովքեր տեր են հայ ժողովրդի հավաքական իրավունքներին, ովքեր իրենց գիտելիքներով, իրենց հայրենասիրությամբ, պատրաստակամությամբ, այո, պայքարելու են վերադարձի իրավունքի, պայքարելու են ուժեղ, հզոր Հայաստան ունենալու համար»:

Իշխան Սաղաթելյանը մեկ անգամ եւս կարեւորելով Շուշիի օրը՝ բոլորին մաղթեց կամք, վճռակամություն. «Արցախահայության վերադարձը մեզ համար ազգային նպատակ է: Ամեն ինչ անելու ենք մեր վերադարձի համար»,- նշեց նա:

Վարդան Գալստյանն իր ելույթում նշեց, որ Շուշիի ազատագրման և զարգացման գործում իր մեծ ներդրումն է ունեցել ՀՅԴ աշխարհասփյուռ կառույցը. «Շուշիի ազատագրմանը մասնակցել են ՀՅԴ անդամներ աշխարհի տարբեր երկրներից: Հարսանիք լեռներում» գործողության իրագործումը հնարավոր դարձավ շնորհիվ այն անձանց, ովքեր ոչ միայն մարտի դաշտում, այլև պետականաշինության գործում ունեցան իրենց հսկայական ներդրումը։ Նրանց ջանքերով է, որ շուրջ 3 տասնամյակ Անառիկ բերդաքաղաքը եղել Արցախի կրթական և մշակութային կենտրոնը»:

Այն ինչ այսօր կատարվում է ժամանակավոր է, որովհետև չարիքը չի կարող հաղթել, ուշ թե շուտ, դա լինելու է, մեր գործը դրան նախապատրաստվելն է» – իր խոսքում ասաց Գեորգի Պետրոսյանը:

Միջոցառման ընթացքում ցուցադրվեց փաստավավերագրական ֆիլմ՝ նվիրված Անկախության շարժմանը եւ Շուշիի ազատգրման գործողությանը:

«Շուշին՝ մեր ոգու, մեր պատմության ու պայքարի խորհրդանիշն է։ Շուշիով ուժեղ էինք, առանց Շուշի նույնը չենք, պետք ձգտենք դառնալ նույնը»,- իր ելույթում նշեց Տարոն Ղազարյանը:

Միջոցառման ավարտին Իշխան Սաղաթելյանը հավաստագրեր հանձնեց «Վահան Հովհաննիսյան» ազգային-քաղաքական դպրոցի շրջանավարտներին: