«Աշխարհում շատ քիչ ազգեր, ժողովուրդներ կան, որ արիություն են ունեցել եւ որոնց բախտ է վիճակվել սեփական պետություն ստեղծել: Իսկ մեր պետության գոյությունն այսօր վտանգի տակ է: Թե արտաքին, թե ներքին թշնամիները փորձում են կործանել մեր պետությունը՝ համահունչ, սինքրոն իրար հետ աշխատելով»,- այսօր՝ Հայաստանի Հանրապետության անկախության 34-րդ տարեդարձի օրը կազմակերպված տոնական քայլերթից առաջ Aravot.am-ին ասաց ՀՅԴ անդամ, ՀՀ ԱԺ «Հայաստան» խմբակցության պատգամավոր Արթուր Խաչատրյանը:

«Ադրբեջանցիները պահանջում են զիջումներ, Փաշինյանը բոլոր պահանջները կատարում է եւ դա փորձում է ներկայացնել, քողարկել «իրական Հայաստան» ցնդաբանության ներքո: Հայաստանը մեկն է, գալիս է դարերից, գնալու է դարեդար: Եվ թող որեւէ մեկը չփորձի պիտակավորել, չփորձի անկախ պետությունը դարձնել թուրքերի եւ ադրբեջանցիների վասալ, խամաճիկային ինչ-որ մի միավոր: Մենք կերտել ենք մեր անկախությունը եւ պարտավոր ենք պահել մեր անկախությունը: Այսօր Երրորդ Հանրապետության ծննդյան օրն է, որը ստեղծվել է Արցախյան պայքարի, հերոսամարտի արդյունքում: Այսօր Հայաստան-Արցախ փաստացի միասնական հայրենիքի ծնունդն է: Եվ անարգանք է մեր բոլոր զոհերի, հերոսների, ամբողջ ժողովրդի առաջ, երբ Երրորդ Հանրապետության ծննդյան նախօրեին Նիկոլ Փաշինյանը գուժում է Երրորդ Հանրապետության կործանման մասին:

Պետք է կանխել թե՛ ներքին, թե՛ արտաքին բոլոր թշնամիների ազգակործան նկրտումները: Շնորհավոր Անկախության օրը»,-ասաց պատգամավորը:

Մանրամասները՝ տեսանյութում