ՄԱԿ-ը վերականգնել է Իրանի դեմ պատժամիջոցները։ Թեմայի շուրջ Alpha News-ը զրուցել է «Ալիք» օրաթերթի գլխավոր խմբագիր Արամ Շահնազարյանի հետ։

«Այս պատժամիջոցները նոր չեն, դրանք սահմանվել էին Անվտանգության խորհրդի կողմից 2006-2010 թթ․ ընդունված բանաձևերով։ Դրանք 10 տարով սառեցվել էին 2015 թ․ ստորագրված Համատեղ գործողությունների համապարփակ ծրագրի պայմանագրով, որը նախատեսում է դրանց ամբողջական չեղարկումը այս տարվա հոկտեմբերի 18-ին։ Հիմա եվրոպական եռյակի նախաձեռնած գործընթացի արդյունքում և ԱՄՆ անմիջական մասնակցությամբ Անվտանգության խորհուրդը վերականգնել է այդ պատժամիջոցները։ Դրանք ընդգրկում են մի շարք միջոցառումներ, որոնք նպատակ ունեն սահմանափակել Իրանի միջուկային ծրագրի զարգացումը և խթանել միջազգային ճնշումները»,- ասել է Շահնազարյանը։

Նա նշել է, որ պատժամիջոցներն ընդգրկում են 3 հիմնական ոլորտներ։ «Դրանք են՝ Իրանի նավթի և ֆինանսական միջոցների, ինչպես նաև միջուկային ծրագրերի սահմանափակումները, մարդու իրավունքների դեմ միջոցառումները»,- ասել է նա։

Շահնազարյանը հավելել է, որ այս պատժամիջոցներն ուղղակի ազդեցություն են թողել Իրանի տնտեսության վրա։ Ըստ նրա՝ այժմ Իրանի տնտեսությունը բավականին լարված վիճակում է գտնվում, և հեռանկարի հետ կապված անորոշություններ կան։