Հայ քաղաքական կուսակցութիւններու ներկայացուցիչներու հանդիպումը տեղի ունեցաւ շաբաթ, 27 սեպտեմբերին, «Թէքէեան» կեդրոնին մէջ։

Ժողովականները նախ քննարկեցին շրջանային խնդիրները, ստեղծուած թէժ իրավիճակները, յատկապէս Կազայի ժողովուրդին նկատմամբ կիրարկուած ցեղասպանական քաղաքականութիւնը, ընդգծելով, որ նման վարքագիծ չի կրնար առաջնորդել իսկական խաղաղութեան։

Անդրադառնալով Իսրայէլի վարչապետին Հայոց ցեղասպանութեան մասին կատարած հաստատումներուն՝ ժողովը նկատեց, որ ցեղասպանութեան թեման կը շահագործուի յատկապէս Անգարայի հետ լարուած յարաբերութիւններու ընթացքին, եւ ճանաչումը չի մեկնիր արդարութեան ու ճշմարտացիութեան սկզբունքներէն։

Կուսակցութիւններու ներկայացուցիչները քննարկեցին նաեւ տարածաշրջանի իրադարձութիւններուն հաւանական հետեւանքները Լիբանանի վրայ՝ նկատելով ընդհանուր միտում Իսրայէլ-Լիբանան յարաբերութիւններու հաստատման առաջնորդող։ Ժողովը անհրաժեշտ նկատեց քննարկումներ ունենալ գալիք հաւանական իրավիճակներու լոյսին տակ՝ լիբանանահայ համայնքի քաղաքական եւ հասարակական կեանքին ուղղութեամբ։

Հայ քաղաքական կուսակցութիւնները ընդգծեցին, որ համալիբանանեան ակնկալուած համախոհութեան չեն նպաստեր լարուածութիւն եւ գրգռութիւն յառաջացնող յայտարարութիւններն ու քայլերը։

Ժողովի օրակարգին մաս կը կազմէին յառաջիկայ խորհրդարանական ընտրութիւնները։ Հաստատուեցաւ, որ գործող օրէնքը չի նպաստեր համայնքներու իրողական ներկայացուցիչները խորհրդարան հասցնելու առաջադրանքի իրականացման։ Ժողովականները հաստատեցին, որ հրամայական է համայնքի իրողական ներկայացուցչութեան ապահովումը ինչպէս խորհրդարանական ընտրութիւններուն, այնպէս նաեւ պետական կառոյցներու մէջ կատարուող նշանակումներուն։

Հայ քաղաքական կուսակցութիւնները քննարկեցին նաեւ համահայկական օրակարգեր։ Դատապարտելով Պաքուի իշխանութիւնները, որոնք ապօրինաբար կը շարունակեն բանտարկուած պահել հայ ռազմագերիներն ու պատանդները, ժողովականները յատուկ կերպով անդրադարձան անոնց շարքին գտնուող եւ հացադուլի դիմած Վիգէն Էօլճէքեանի պարագային։

Ժողովը որոշեց հերթական դրութեամբ շարունակել գումարել միջկուսակցական նիստերը