Այսօր, Սեպտեմբերի 27-ին` 44-օրյա պատերազմի 5-րդ տալելիցի օրը, ՀՅԴ Հայաստանի ԳՄ անդամներն ու «Հայաստան» խմբակցության պատգամավորներն այցելել են Եռաբլուր պանթեոն:

Նրանք ծաղիկներ են խոնարհել Եռաբլուրում՝ ի հիշատակ նահատակ հայորդիների, որոնք անմնացորդ նվիրվեցին հայրենիքի ազատագրության պայքարին։

Լեռնային Ղարաբաղի հարցը փակված չէ. լրագրողների հետ զրույցում ասել է ԱԺ «Հայաստան» խմբակցության ղեկավար Սեյրան Օհանյանը։

«ՀՀ Զինված ուժերն ու Արցախի պաշտպանության բանակն ունեցել են այնպիսի իրավիճակ, որ ի վիճակի էին հասնել հաջողությունների, եթե չհաղթել էլ, ապա իրենց առջեւ դրված խնդիրը պաշտպանությունում իրականացնել, մանավանդ այն հատվածում, որտեղ հակառակորդը մեկ արահետով մխրճվել եւ հասել էր Շուշի եւ ՀՀ սահմաններ։ Իսկ Հայաստանի իշխանությունները վատնեցին տարիների ընթացքում կուտակված բանակցային ռեսուրսները, ինչը հանգեցրեց Լեռնային Ղարաբաղի կորստին։ 2019 թվականին մերժեց միջնորդական առաջարկները և իր անհասկանալի հայտարարություններով արագացրեց 44-օրյա պատերազմը»,– ասել է նա։

Պաշտպանության նախկին նախարարի կարծիքով, Ադրբեջանն իր գործողություններով ավելի է սրել հակամարտությունը, իսկ տեղի ունեցածի պատասխանատուն Հայաստանի իշխանություններն են։

ՀՅԴ անդամ, «Հայաստան» խմբակցության պատգամավոր Արթուր Խաչատրյանը լրագրողների հետ զրույցում ասաց. «Այս իշխանությունները ամեն ինչ անում են, որ արցախցիները ոչ միայն չկարողանան վերադառնալ հայրենիք, այլև լքեն Հայաստանը»:

ՀՅԴ անդամ, «Հայաստան» խմբակցության պատգամավոր Գառնիկ Դանիելյանի խոսքով՝ իշխանություն կոչվածները որևէ պատասխանատվության զգացում չունեն։ «Այս իշխանությունն ամեն ինչ անում է, որ մոռացության մատնի մեր հերոս նահատակների փառքի ուղին, որ ջնջեն մեր պատմությունն ու հիշողությունը»,- լրագրողների հետ զրույցում ասել է նա:

ՀՅԴ Արցախի ԿԿ ներկայացուցիչ Արա Պուլուզյանն իր հերթին նշել է. «ՀՀ իշխանությունները չեն կարող փակել Արցախի էջը, ես հավատում եմ ժողովրդի ուժին, դեռ շատ նվաճումներ կունենանք»:

Եռաբլուր էին այցելել նաեւ Արցախի նախագահ Սամվել Շահրամանյանը, Արցախի թեմի առաջնորդը, ԱՀ ԱԺ նախագահ Աշոտ Դանիելյանը, Արցախի ԱԺ պատգամավորներ, քաղաքական գործիչներ:

Մանրամասները՝ տեսանյութում