ՀՅԴ վաստակաշատ գործիչ, Բիւրոյի երկարամեայ ներկայացուցիչ Հրայր Մարուխեանը ժամանակին ահազանգել է Արցախի կորուստի վտանգաւոր հետեւանքների մասին, որոնց դէմ-յանդիման են կանգնելու Հայաստանն ու հայութիւնը։

Նւիրեալ ազատամարտիկ-հրամանատար Մոնթէ Մելքոնեանը եւս այդպիսի կորուստը բնութագրել էր որպէս՝ Հայոց պատմութեան վերջին էջը թերթելու նախերգանք…։

Աներեւակայելի կորուստն իրականացաւ, իսկ Հայաստանն ու հայութիւնը գտնւում են դրա քաոսային հետեւանքների դիմագրաւման ամենախոցելի պայմաններում, ըստ հետեւեալի.

– Ապազգային է ու գերապիկար՝ ՀՀ իշխանութիւնը,

– Պառակտւած է ազգն ու երբեմնի համազգային ու համահայկական ներուժը, որոնք էլ իրենց հերթին տրամաբանական հետեւանքն են միեւնոյն ապազգային քաղաքականութեան,

– Պարտւած ու առաւելեւս կապիտուլիանտ իշխանութիւնը ինքնարդարացման համար, որդեգրել է յարմարւողական կեցւածք՝ սեփական ազգի իսկական թշնամիների օգտին։

– Չյարմարւողները, սակայն, թուրք-ադրբեջանական դաշինքի կողմից համարւում են ռեւանշիստներ ու «խաղաղութեան հակառակորդներ», որոնց էլ ամէն կերպ արգելակելու-ճնշելու է դիմում նոյն «խաղաղութեան» ջատագով՝ յարմարւող իշխանութիւնը,

– Արգելակւում են հասարակաքաղաքական միաւորներն ու ազգային գաղափարախօսութիւն կրող ընդդիմադիր ներկայացուցիչները։ Բանտարկւում են թէ՛ աշխարհական, եւ թէ՛ ի զարմանս բոլորի՝ հոգեւոր դասի ներկայացուցիչներ…։

Այս վերջինների բանտարկութիւն-կալանքներն արդարացնելու համար էլ՝ իշխանաւորները հեքիաթներ են հիւսում, որոնք էլ անասելի խանդավառութիւն են ստեղծում թուրք-ադրբեջանական հայատեաց լայն հասարակայնութեան շարքերում,

– Ապազգային, յարմարւող-վախկոտ եւ ամէն գնով իշխանատենչ ապիկարները մինչեւիսկ Հայոց Հայրապետին են անւանարկում, որովհետեւ Նա եւրոպական յարգւած երկրի մայրաքաղաքում «ռեւանշիստական» կեցւածք է դրսեւորել՝ Արցախի ժողովրդի ոտնահարւած իրաւունքները բարձրաձայնելով…,

– Աթոռապաշտ իշխանութիւնը նախապատրաստւում է ինքնավերարտադրման ընտրութիւնների՝ գալիք յունիսին։ Իր յաղթաթուղթի «Բրենդ»-ը յար եւ նման «դեմըքրըսի»-ի, ոչ այլ ինչ է եթէ ոչ նոյնքան չարաշահւած ու կեղծւած խաղաղութիւնը…,

– «Խաղաղութիւն», որն Արցախի կորստեանն յանգեցրեց եւ «բրե՜նդ»՝ որ ուրւագծած ունի «արեւմտեան ադրբեջանում (իմա՝ Հայաստանում) վերաբնակեցնել 90-ականներին ժամանակի ՀՀ իշխանութիւնների կողմից բռնագաղթեցւած երեք հարիւր հազար ադրբեջանցիների, իրենց պատմական բնօրրանում»…։

– Դեռ աւելին. պարտւած-ծնկած իշխանաւորները նոյն «խաղաղասիրական» մանիպուլիացիաներով համաձայնւում են հայրենի Սիւնիքի երկայնքով ադրբեջանաթուրքական պանթուրանական միջանցք տրամադրել Արցախը հայաթափած՝ հայոց ոխերիմ թշնամիներին, կարծեցեալ «Թրամփեան թրիփի» սիրոյն,

– Եւ, յարգելի ընթերցող, վերոնշեալ ընտրութիւններին նախապատրաստւելու մեկնարկը եւս տրւեց վերջերս, երբ դրանք յաջողութեամբ պսակելու նպատակով՝ ժողովրդավա՜ր Եւրոմիութեան թիւ 1 դիւանագէտ Կայա Կալասը 15 միլիոն դոլարի ֆինանսական օժանդակութեան մասին յայտարարեց՝ Հայաստանի «ժողովրդավար» իշխանութեան միջոցով ազա՜տ ու արդա՜ր ընտրութիւններ անցկացնելու նպատակով։ Կամ՝ արդէն անթաքոյց՝ նոյնինքն թուրք արտգործնախարար Ֆիդանը օրերս էր, որ յայտարարեց 10 միլիոն դոլար օժանդակութեան մասին, իբր սոցեալ-տնտեսական բնագաւառներին ուղղւած…։

Ահաւասիկ, յարգելի ընթերցող, թուրք-ադրբեջանական տանդեմը, եւրո-արեւմտեան բլոկը եւ մէկ խօսքով՝ անգլոսաքսոնական ուժային կենտրոնները, իրենց աշխարհաքաղաքական նպատակներից մղւած՝ իրենց նախընտրութիւնն կատարել են՝ Հայաստանի քաղաքական ապագայի ու ցաւօք՝ աննախանձելի հեռանկարի հաշւին, որի համար մեծագոյն ու կորստաբեր գինը վճարելու են նոյնինքն կոտորակւած Հայաստանն ու պառակտւած հայաշխարհը…։

… Յետարցախեան կորստի հետեւանքները դիմագրաւելու եւ Հայոց Պատմութեան վերջին էջը չշրջելու ՎԱՐԴԱՆԱՆՑ ու ՍԱՐԴԱՐԱՊԱՏԵԱՆ ԿԱՄՔ-ի վերածնութեան հարկադրանքի դէմ-յանդիման է կանգնած Հայոց Աշխարհը, առաւել քան երբեւէ…։

Դերենիկ Մելիքեան