Այսօրվա իշխանությունը, վարչապետի գլխավորությամբ, գտնում է, որ Արցախ բառն օգտագործելը դրդիչ հանգամանք է, որպեսզի նորից հակամարտություն սկսվի Հայաստանի ու Ադրբեջանի միջև։ Իրականությունն այդպես չէ։ Ընդհակառակը, Արցախի գոյությունն ամրապնդում էր Հայաստանի անվտանգային համակարգը։ Այս մասին «Փաստինֆո»-ի հետ զրույցում ասաց Արցախի Ազգային ժողովի պատգամավոր Վահրամ Բալայանը՝ անդրադառնալով միզագային հարթակներում Նիկոլ Փաշինյանի՝ Արցախի էջը փակելուն ուղղված հայտարարություններին։

«Նաև Իրանի։ Վերջին զարգացումները դրա մասին են վկայում։ Արցախի հայաթափումը, հայերի տեղահանությունը հետագայում նպաստեց, որ տարածաշրջանում պատերազմական գործողությունները նոր ծավալներ ստանան»,- ասաց Վ․ Բալայանը և նշեց, որ նման իրավիճակում Փաշինյանի հայտարարությունները վտանգում են Հայաստանի Հանրապետության անվտանգությունը։

Պատգամավորն ընդգծեց, որ Ադրբեջանի ամենաբարձր մակարդակով «Արևմտյան Ադրբեջանի» մասին խոսույթը համարժեք չէ ՀՀ իշխանությունների քայլերի ու խոսքի հետ։

«Ես կարծում եմ, որ արցախահայությունը պետք է մնա Հայաստանում, մեր հայրենիքում։ Արցախի ազատագրումը և հայությանը վերադարձը ես կապում եմ Հայաստանի Հանրապետության հզորացման հետ։ Այսինքն՝ լինի նորմալ իշխանություն, տնտեսական ու քաղաքական համակարգ։ Մենք բոլորս պիտի մեր ներուժը ներդնենք այդ համակարգերը ստեղծելու համար»,- ասաց նա։

Անդրադառնալով արցախցիների սոցիալական վատթարացող վիճակին՝ պատգամավորն ասաց, որ բազում նախաձեռնություններ կային, բայց ՀՀ գործող իշխանությունն Արցախի իշխանության գոյությունը չէր ընդունում։

«Կոնտակտ չկա, որ կարողանանք համագործակցել և որևէ հարց լուծել։ Երբեմն մեր ժողովրդի մոտ էլ է սխալ տպավորություն ձևավորվում, որ Արցախի իշխանությունները կարող են ինչ որ բան փոխել։ Իրականում մենք որևէ ռեսուրս չունենք, որ կարողանանք սոցիալական խնդիրները լուծել։ Նույնն է նաև միջազգային դոնորների դեպքում։ Պետք է ռեալ նայել իրավիճակին։ Այդ որ մի իշխանությունը կգա մեզ հետ հարց քննարկելու։ Երբ էլ որ նման թեմաների մասին ակնարկում ենք միջազգային գործընկերներին, ապա ասում են, որ Հայաստանում կա իշխանություն և նրանք պիտի նման հարցերը բարձրաձայնեն»,- ասաց Վ․ Բալայանը;