Սևան քաղաքի Սուրեն Զաքարյանի անվան մշակութային պալատի հարակից հրապարակում տեղի է ունենում Հայրենիքի փրկության շարժման հանրահավաքը։ Մասնակիցները պահանջում են վարչապետ Նիկոլ Փաշինյանի հրաժարականը։

Ընդդիմադիրները նախապես հայտարարել էին, որ մինչեւ ապրիլի 22-ը հանրապետության մարզերում հանդիպումներ են անցկացնելու իրենց կողմնակիցների հետ, որից հետո ակցիաները կվերսկսեն մայրաքաղաքում: Առաջինը Սեւանում կազմակերպված հանրահավաքն է։

Այսօր մեզ այստեղ բերել է հայրենիքի, մեր երկրի, մեր պետականության կորուստի վտանգը, եկել ենք այստեղ՝ խոսելու ճշմարտության մասին, և ցույց տալու այն բանալին, ինչով կարող ենք մեր երկիրը փրկել․ հանրահավաքի ժամանակ ասաց ՀՅԴ կամավորական շարժում կազմակերպության խորհրդի անդամ, ազատամարտիկ Իգոր Սարգսյանը:

«30 տարի առաջ ինձ համակել էր հայրենիքի պաշտպանության մղումը, պայքարեցինք հանուն հայրենիքի, Արցախի մեզնից խլած որոշ չափը հետ բերեցինք, մեր մեջքը ուղղեցինք, հայի արժանապատվությունը պահեցինք, հաղթեցինք և փորձեցինք պետականություն ստեղծել: Սակայն 2018 թվականին եկավ իշխանություն, որը քայլ առ քայլ ծրագրավորված փորձում է հանձնել մեր երկիրը թշնամուն, ով պատմության ընթացում ձգտել է ոչնչացնել մեր տեսակը, մեր հող ու ջրից կտրել մեր ժողովրդին»,-ընդգծեց նա:

Իգոր Սարգսյանը նշեց, որ 2018-ի իշխանափոխությունից առաջ այսօրվա իշխանությունները կոչ էին անում մերժել կոռուպցիան, սակայն իրենք բերեցին կոռուպցիա ու կաշառակերություն. «Նրանք եկան՝ քանդելու կրթությունը, դպրոցը, բանակը, հավատքը և այսօր էլ վերացնում են այն արժեքները, ինչը մեզ համար բարձրագույնն է ՝ ընտանիքը, էլ գենդերային հավասարությունը բերեցին, անորոշ սեռի գաղափարախոսությունը, եկել են թուրքի ծրագրով: Հավատացեք, իշխանության կռիվ չէ, հայրենիք կորցնելու խնդիր է, վտանգի մեջ ենք: Հայրենիքը կորցրեցինք, մեր այս տեսակն ենք կորցնելու»:

Ես ուզում եմ պատմել, թե ինչու եմ խորշում Նիկոլ Փաշինյանից. իր ելույթում հայտարարեց նախկին վարչապետ Հրանտ Բագրատյանը:

«Ինչու եմ բացահայտ ասում՝ սատկի պրծնենք: Ի վերջո կողքս նստած էր պառլամենտում եւ 5 տարի հետը չէի խոսում: Ինչու ենք ասում՝ ինքը դավաճան է: Մենք չենք ասում՝ անհաջող պատերազմ է ունեցել, ասում ենք՝ դավաճան է: Որովհետեւ մենք շանս ունեինք այդ պատերազմում չպարտվել: Որովհետեւ հենց առաջին օրն իրեն ասվեց՝ պայթեցրու Սարսանգը, վերացրու Մարտակերտի ռազմաճակատը: Էնտեղ հեղեղ էր լինում, եւ դու զորքերը տեղափոխի հարավային ճակատ, որովհետեւ հարավից է գալու թշնամին: Սկզբից թշնամին զրահատեխնիկայով էր ուզում գալ, 10-րդ օրը փոխեց, ինտենսիվացրեց ԱԹՍ-ներով ինձ խփելը: Մենք ասում էինք Իսկանդերով խփի նավթամուղ, գազամուղ պայթեցրու, ինքը չգիտես ինչու խփում էր Գյանջայի 5-հարկանի շենքերին: Մենք ասում էինք՝ ատոմակայանի թափոններ կան, իրենք դա չունեն, լցրու, կրակի, ստեղծի միջուկային զոնա, որ չկարողանա զորքը գա: Ոչինչ չարեց:

«Ես այսօր պարտությունից չեմ խոսի։ Մենք ունեցել ենք հզոր բանակ, ու այսօր պարտավոր ենք վերականգնել հայկական հզոր բանակի համբավը»,- հայտարարեց Սեյրան Օհանյանը;

Նա հավաքվածներին կոչ արեց ծափահարել ու ողջունել բանակում ծառայություն անցնող յուրաքանչյուր զինվորի, հրամանատարի, սպայի։

«Երբ բանակն ու ժողովուրդը միասին են, նրանք անպարտելի են»,- հայտարարեց Օհանյանն՝ ավելացնելով, որ վերջին պատերազմում պարտության պատճառներից մեկն էլ այն է, որ չկարողացանք բանակի համար ամուր թիկունք ապահովել։

Պաշտպանության նախկին նախարարի խոսքով, դժվար պահերին միշտ բանակն ու ժողովուրդը միասնական են եղել, իսկ այս իշխանությունների օրոք այդ միասնականության գաղափարը ոչնչացվեց, ջախջախվեց։

«Այս իշխանությունների ոչ գրագետ գործողությունների հետևանքով մենք չկարողացանք մոբիլիզացնել ողջ հայ ժողովրդին, մեր բոլոր ուժերը Հայաստանում, Արցախում, մարզերում, որպեսզի թիկունք կանգնենք մեր բանակին ու կարողանանք հաղթական ելք ապահովել»,- ասաց նա։

Հանրահավաքին ելույթներ ունեցան ՀՅԴ Հայաստանի ԳՄ ներկայացուցիչ Իշխան Սաղաթելյանը եւ Հայրենիքի փրկության շարժման ղեկավար Վազգեն Մանուկյանը։։

Հայրենիքի փրկության շարժման հանրահավաքից հետո՝ Իշխան Սաղաթելյանը պատասխանեց լրագրողների հարցերին։

https://youtu.be/NU-AHZxRKQY