ՀՅԴ Բյուրոյի տնտեսական հետազոտությունների գրասենյակի պատասխանատու, տնտեսագետ Սուրեն Պարսյանը Sputnik Արմենիայի եթերում անդրադարձել է ռուսական «Մետրոգիպրոտրանս» ընկերության նախագծին, որն առնչվում է Երևանի մետրոպոլիտենի «Աջափնյակ» կայարանի կառուցմանը։

Սուրեն Պարսյանը կարծում է, որ «Մետրոգիպրոտրանս» ընկերության մուտքը Երևանի մետրոպոլիտենի նախագիծ պետք է ողջունել ու հնարավորինս աջակցել, որ ռուսական փորձառությունը և կապիտալը գա Հայաստան։

«Հայաստանը ռուսական ընկերությունների հետ աշխատելու երկար տարիների փորձառություն ունի, և մի շարք խոշոր շինություններ կառուցվել են հայ–ռուսական համատեղ կազմակերպությունների միջոցով, միասին աշխատել են տարբեր նախագծային ինստիտուտներ։ Երևանի մետրոպոլիտենին առնչվող նման ծրագրերը շատ քիչ են, և խորհրդային ժամանակաշրջանից հետո համատեղ հայ–ռուսական խոշորագույն նախագծեր չեն եղել, ուստի տվյալ ծրագիրը կարող է ըստ էության նպաստել հին ավանդույթները վերականգնելուն` հաշվի առնելով նշված ընկերության 30 տարվա փորձը»,–Sputnik Արմենիային ասաց տնտեսագետը։

Պարսյանի խոսքով` Երևանի քաղաքապետարանի հայտարարած մրցույթը նախատեսում է մեկուկես տարվա ընթացքում նախագիծ պատրաստել Աջափնյակի մետրոկայարանի կառուցման մասով, և այդ ծրագիրն ունի մի քանի տարբերակ։ Ըստ այդմ` հայկական կողմն առաջարկել է Հրազդան գետի վրայով միայն մետրոյի կամուրջի կառուցում, մինչդեռ ռուսական ընկերությունը պատրաստ է կառուցել երկհարկանի կամուրջ և՛ մեքենաների, և՛ գնացքների համար։

«Նախագծի իրականացումը կբեռնաթափի տրանսպորտային ուղևորահոսքը` հաշվի առնելով, որ վերջին տարիներին Հրազդան գետի երկայնքով կառուցապատումը բավականին ակտիվացել է, որտեղ կան նոր շենքեր ու շինություններ։ Բացի այդ, Աջափնյակի մետրոկայարանին կից նախատեսվում է կառուցել բավականին մեծ առևտրի կենտրոն, որը կունենա տնտեսական մեծ ազդեցություն այդ հանգույցում, հետևաբար նախագիծը կյանքի կոչելու համար անհրաժեշտ են մի շարք պայմաններ, գործնական միջավայր, ՀՀ կառավարությունը պետք է փորձի արագ հնարավոր բոլոր խոչընդոտները վերացնել և պատասխան փոխանցել ռուսական ընկերությանը, որպեսզի գործընթացը մեկնարկի»,– նշեց տնտեսագետը։

Ըստ Պարսյանի` վերջին շրջանում շինարարության ծավալների նվազումը և 2020 թվականի ճգնաժամը մեզ պարտադրում են, որ նման խոշոր նախագծերն օր առաջ իրականացնենք, ինչը թույլ կտա լրացուցիչ ներդրումներ ներգրավել մեր տնտեսության մեջ, խթանել շինարարության ոլորտը, որն իր հերթին լոկոմոտիվ կդառնա մյուս բնագավառների համար, այսինքն` ռուսական ընկերության նախագծի իրականացումը մեզ կբերի բազմակի օգուտներ։ Տնտեսագետի պնդմամբ` նմանօրինակ մի քանի խոշոր նախագծերի շնորհիվ Հայաստանը կկարողանա տարեկան 7 տոկոսանոց տնտեսական աճ գեներացնել։