Դեկտեմբերի 23-ին Հրապարակ TV առցանց հեռուստաալիքի հյուրն էր ՀՅԴ Հայաստանի Գերագույն մարմնի անդամ Բագրատ Եսայանը: Քննարկման թեման վերջին շրջանում Հայաստանի տեղական ինքնակառավարման մարմինների ձևավորման գործընթացներում տեղ գտած ապօրինություններն էին: Բագրատ Եսայանի կարծիքով՝ Երևանի քաղաքապետի պաշտոնանկությունը ևս պետք է դիտարկել ՏԻՄ-երում կենտրոնական վարչախմբի դիրքերի ամրապնդման և միահեծան իշխանություն ապահովելու համատեքստում:

«Երևանի քաղաքապետի պաշտոնանկությանը չի կարելի վերաբերվել զուտ որպես Երևանին վերաբերող հարցի: Դա մի գործընթաց է, որ սկսվել է 2018թ. այսպես կոչված հեղափոխության արդյունքում և անընդհատ խորանում է: Վարչապետի պաշտոնը զբաղեցնող անձը հետևողականորեն զավթում է ամեն ինչ… Սկզբում բռնազավթում էր օրենսդիր իշխանությունը՝ հիշենք հոկտեմբերի 2-ին ԱԺ ներխուժելը, դրանից հետո դատարանների շրջափակումը և այլն: Երկրում ամեն ինչ բռնազավթելու այս գործընթացը շարունակվում է արդեն ՏԻՄ ընտրություններով: Չնայած որ այդ անձնավորությունը ընտրություններից հետո գրում է ազատ, արդար ընտրությունների մասին, բայց ընտրություններից հետո ապօրինի գործերով հետապնդումների է ենթարկում ընտրված համայնքապետերին, որոնք հաղթել էին Քաղպայմանագրի թեկնածուներին»,- նշել է Բագրատ Եսայանը:

Նա խոսել է նաև «հեղափոխական» ձախողված թիմի ներսում տիրող անառողջ մթնոլորտի մասին, որ ոչ այլ ինչ է, եթե ոչ հեղափոխություններին հաջորդող ժամանակաշրջանին բնորոշ երևույթ:

Մանրամասները՝ տեսանյութում: