Բողոքի ակցիա «Արմենիա Մարիոթ» հյուրանոցի դիմաց
08 Հունիս 2022
Այսօր, հունիսի 8-ին Երեւանի «Մարիոթ Արմենիա» հյուրանոցում մեկնարկել է «Դատական իշխանությունը՝ որպես ժողովրդավարության երաշխավոր» խորագիրը կրող երկօրյա խորհրդաժողովը, որին մասնակցում են նաեւ միջազգային կառույցների ներկայացուցիչներ։ Միջոոցառմանը հրավիրված չէ ընդդիմությունը, այն փակ է նաեւ լրագրողների համար։
Այդ կապակցությամբ «Հայաստան» եւ «Պատիվ ունեմ» խմբակցության պատգամավորները բողոքի ակցիա իրականացրեցին «Արմենիա Մարիոթ» հյուրանոցի դիմաց։
«Ընդդիմադիր պատգամավորների մասնակցությունն այս միջոցառմանը արգելված է, մուտքը միայն հրավիրատոմսերով է, որովհետև ժողովրդավարության այն փուչիկը, որը ամեն օր տարբեր տեղերում փորձում է փչել Փաշինյանը և իր խունտան, հանկարծ կարող է պայթել: Այն վաղ թե ուշ պայթելու է: Իսկ թե ինչ իրավիճակում է դատական իշխանությունը, ինչպես են գործեր կարվում, սա նույնիսկ զանգով արդարադատություն չի, կնոպկայով արդարադատություն է»,-Հանրապետության հրապարակում բողոքի ակցիայի ժամանակ ասաց ԱԺ «Պատիվ ունեմ» խմբակցության պատգամավոր Հայկ Մամիջանյանը:
«Հայաստան» խմբակցության պատգամավոր Արամ Վարդեւանյանը զարմանք հայտնեց, որ այս քննարկումը փակ է անցկացվում, այդ թվում ընդդիմադիր պատգամավորների համար:
«Մի քանի ոստիկան գուցե որոշեին ներկայցնել ոստիկանների կողմից քաղաքացիներին ծեծելու նոր մարտավարությունը: Դա ժողովրդավարական մարտավարություն է, որը Հայաստանում իրացվում է եւ կարող է արտահանվել»,-հեգնանքով ասաց նա։
«Հայաստան» խմբակցության պատգամավոր Քրիստինե Վարդանյանը լրագրողների հետ զրույցում ասաց․ Այս իշխանության ամենամեծ ունեցվածքը իշխանությունն է, որը ատամներով, ամեն գնով, նույնիսկ հայրենիքը տալու գնով պահում են և վախենում են դրա կորստից։
«Այս մարդիկ սեփականաշնորհել են շատ կարևոր հասկացություններ՝ ժողովրդավարություն, մարդու իրավունքների պաշտպանություն, իրենց դիրքավորել են իբրև այդ արժեքների կրողներ, մինչդեռ իրենք այդ արժեքների ամենամեծ դավաճաններն են։ Ժողովրդավար լինելու համար պետք է պահպանել մարդկանց իրավունքները, մարդու ամենամեծ իրավունքը կյանքի իրավունք է, պետք է այդ իրավունքը պաշտպանել։ Չկա ժողովրդավարություն, երբ դու չունես պետականություն, չկան մարդու իրավունքներ, եթե չկա պետությունը, որը կարողանա պաշտպանել այդ իրավունքները։ Այս մարդիկ ոչ միայն կապ չունեն ժողովրդավարության և մարդու իրավունքների հետ այլ ամենամեծ վտանգն են այս երկու հասկացությունների համար ընդհանրապես»,-ասաց նա։
Մանրամասները՝ տեսանյութում
