«Դիմադրություն» շարժումը ապակենտրոն եւ ցանցային պայքարի միջոցով մեծացնելու է գաղափարական եւ քարոզչական աշխատանքների դերը, որպեսզի պայքարի դուրս եկած ցանկացած քաղաքացի հասկանա, թե հանուն ինչպիսի Հայաստանի է պայքարում: Այս մասին NEWS.am-ի հետ զրույցում ասաց ՀՅԴ ԳՄ անդամ, ԱԺ «Հայաստան» խմբակցության քարտուղար Արծվիկ Մինասյանը:

«Դիմադրություն» շարժումը մարզերում պետք է ունենա տարբեր ուղղություններով ինստիտուտներ՝ քաղաքական, քարոզչական, մասնագիտական, առանձին ուղղություն, որը կպայքարի քաղբանտարկյալների իրավունքների պաշտպանության հարցով եւ այլն: Երեւանում եւ մարզերում լինելու են համախմբման գործողություններ, որովհետեւ արթնացման փուլն արդեն եղավ: «Դիմադրություն» շարժման դրական էներգետիկան հսկայական է: Նա, ով թեկուզ մեկ անգամ մասնակցում է շարժման ակցիային, գալիս է նաեւ հաջորդ անգամները: Շատ կարեւոր է, որ այս էներգետիկան տարածվի նաեւ մարզեր, բոլորի տներ»,- ասաց Արծվիկ Մինասյանը:

Ըստ նրա՝ դրանից հետո շարժումը կգա նոր հանգրվանի, երբ գաղափարական հենքի վրա բազմապատկվի շարժման մասնակիցների թիվը եւ հնարավոր կլինի իրականացնել սահմանադրական նորմը՝ խորհրդարանի միջոցով ընտրել նոր վարչապետ:

«Դրա համար անհրաժեշտ է, որ մեր ժողովրդի քանակն ավելանա եւ ՔՊ-ի մի շարք պատգամավորներ հասկանան, որ կարող են պատասխանատվությունից դուրս գալ, եթե ընդունեն համաժողովրդական պահանջը: Այս հնարավորությունը կլինի օգոստոսի 2-ից հետո՝ երբ Նիկոլ Փաշինյանի պաշտոնավարման մեկ տարին կլրանա եւ Նիկոլ Փաշինյանի հեռացնելու այս ճանապարհը եւս բացվում է: Սա չի նշանակում, որ մենք հրաժարվում ենք մյուս ճանապարհից՝ Նիկոլ Փաշինյանն ինքը հեռանա»,- ընդգծեց պատգամավորը։

Արծվիկ Մինասյանի խոսքով՝ շարժումը կրկին վերադառնում է ապակենտրոն պայքարի գաղափարին՝ այս անգամ ցանցային գաղափարն առավել ուժեղացնելով: Եթե նախկինում ապակենտրոնությունը հիմնված էր միայն ակցիաների վրա, ապա հիմա նաեւ գաղափարական եւ քարոզչական աշխատանքներն են մեծ դեր ունենալու:

«Քաղաքացուն մենք պետք է բերենք գիտակցված ընտրության: Պայքարի կարեւոր ուղղություններից է, որ մարդը մտածի, որ ինքը դուրս է եկել ոչ թե ինչ-որ մեկին իշխանության բերելու, այլ իր ապագայի համար: Այս ցանցային պայքարը բերելու է նրան, որ յուրաքանչյուր քաղաքացի հնարավորություն ունենա հասկանալու, թե հանուն ինչպիսի Հայաստանի է դուրս գալիս, որովհետեւ միայն էմոցիան քիչ է»,- նշեց Արծվիկ Մինասյանը:

Պատգամավորի խոսքով՝ այս իշխանությունը մեր հասարակության մեջ այնքան է ատելություն ներարկել, որ մարդը դադարել է մտածել այս ամենի մասին: «Երբ Արցախի եռագույնը մարդիկ վնասում են, ես չեմ մտածում, որ իրենք գենետիկորեն հայի հետ կապ չունեն, ես մտածում եմ, որ իրենք մարդու մեջ այնքան են ատելություն սերմանել, որ այս մարդը մտածում է, թե Արցախի դրոշն ընդդիմությունն է: Շատերը էմոցիանալ մակարդակի վրա հասկանում են, որ Հայաստանը եւ Արցախը վտանգի մեջ են, սակայն դուրս չեն գալիս»,- ասաց ընդդիմադիր գործիչը։

Արծվիկ Մինասյանի դիտարկմամբ՝ Նիկոլ Փաշինյանի իշխանությունը, ավերելով խորհրդարանական կառավարման համակարգը, մարդկանց մոտ տպավորություն է ստեղծել, թե կարեւորը անձն է, որը կա՛մ փրկիչ է, կա՛մ ոչ:

«Ես համաձայն եմ, որ մարդիկ պետք է տեսնեն, թե ում հետեւից են գնալու, բայց դա յուրաքանչյուր քաղաքացու ոչ թե պետք է պարտադրես, այլ ինքը պետք է ընտրությունը կատարի: Դրանով է պայմանավորված, որ այսքան ժամանակ մենք հրաժարվել ենք այդպիսի բանից, որովհետեւ դա նշանակում է կատարել իշխանության ցանկությունը՝ ընտրել անձ եւ թիրախավորել ու նսեմացնել նրան՝ պայքարի գաղափարը: Շարժման ամենակարեւոր գաղափարներից մեկն այն է, որ յուրաքանչյուր քաղաքացի գիտակցված մասնակից լինի որոշումների կայացման հարցում: Եթե այս համոզվածությամբ եկած մարդկանց անհրաժեշտ քանակը լինի, համոզված եմ, որ այս աշնանը մենք կունենանք ցանկալի արդյունքը՝ իշխանափոխությունը: Հակառակը նշանակում է Հայաստանի եւ հայ ժողովրդի կործանում»,- նկատեց նա:

Ըստ Մինասյանի՝ «Դիմադրություն» շարժումը բացառում է անձի պաշտամունք եւ անհատի միանձնյա որոշում, եւ հենց այս սկզբունքի վրա է հիմնվելու անցումային կառավարությունը: Անցումային կառավարության երկրորդ կառավարության առաքելությունը հասարակությանը նոր ընտրություններին գաղափարապես պատրաստելը կլինի: Մարդիկ պետք է հասկանան, որ ոչ թե անձ են ընտրում, այլ ծրագիր եւ թիմ:

«Վարչապետի թեկնածուն չի լինելու այսօրվա վարչապետի լիազորություններով, նա կատարելու է կառավարության եւ Անվտանգության խորհրդի միաձայնորեն ընդունված որոշումները եւ լինելու է նրանց միասնական ներկայացուցիչը: Մարդիկ դուրս չեն գալիս, որովհետեւ մտածում են, որ պարզ իշխանափոխության հարց է լուծվում: Մեկն այս սխալ պատկերացումն է, որը մենք պետք է փոխենք։ Եվ երկրորդ՝ ցույց տանք, թե հանուն ինչպիսի Հայաստանի է դուրս գալիս պայքարի: Սրա համար անհրաժեշտ է, որ յուրաքանչյուր մարդու հետ հավուր պատշաճի քննարկում տեղի ունենա, որ մարդը հասկանա, որ ինքն է որոշողը, թե ով է լինելու նոր իշխանությունը եւ ինչ ճանապարհային քարտեզով է Հայաստանը դուրս բերելու այս վիճակից»,- ընդգծեց պատգամավորը:

Արծվիկ Մինասյանի խոսքով՝ թեպետ իշխանական պատգամավորները պնդում են, թե երկրում չկա քաղաքական ճգնաժամ, սակայն այն չի էլ վերացել 2021 թվականի արտահերթ ընտրություններով, որովհետեւ պատճառները թաքնված են իշխանության գործողություններում:

«Երբ որ դու ունես հանրություն, որտեղ մի ստվար զանգված ընդդիմանում է քո վարած քաղաքականությանը, մատնացույց է անում քո կեղծիքները, այստեղ ոչ միայն քաղաքական նաեւ հոգեբանական ճգնաժամ կա: Քաղաքական ճգնաժամի ցուցիչը կա. անկախ նրանից ընդդիմությունն ունեցել է վարկանիշի աճ թե՝ ոչ, ակնհայտ է, որ Նիկոլ Փաշինյանի վարկանիշը շեշտակի անկում է ապրել ե՛ւ Հայաստանում, ե՛ւ սփյուռքում, ե՛ւ միջազգային հարթակում: Նրա ժողովրդավարական կերպարը փլուզվել է նաեւ միջազգային հանրության համար: Ճգնաժամի պարագայում կա՛մ իշխանությունն ինքը պետք է վերափոխվի, ինչն այս պարագայում անհնարին է, որովհետեւ Նիկոլ Փաշինյանի մեջ է նստած «Մարտի 1» կազմակերպող մարդու էությունը, կա՛մ հեռանա»,- ասաց Արծվիկ Մինասյանը:

Արծվիկ Մինասյանի դիտարկմամբ՝ եթե «Դիմադրություն» շարժումը չլիներ, այս իշխանությունն արդեն ստորագրել էր կապիտուլյացիոն նոր փաստաթղթեր՝ վերջնականապես թաղելով հայ ժողովրդի նպատակները:

«Վտանգը վերջնական վերացված չէ, սակայն գործողությունը կասեցված է: Իսկ դեմարկացիայի եւ դելիմիտացիայի հանձնաժողովը շարժման գործողությունների արդյունքում իսկզբանե համարվում է ապօրինի, որովհետեւ այն չի արտահայտում հայ ժողովրդի իրական կամքը եւ հիմնված չէ իրավական կոնկրետ լիազորությունների վրա: Ամբողջական վերացումը կլինի այն ժամանակ, երբ այս իշխանությանն ուղարկենք տուն, իսկ հետո՝ համապատասխան քրեակատարողական հաստատություններ: Նիկոլ Փաշինյանը, ըստ էության, վերադարձել է 2020 թվականի նոյեմբերի կարգավիճակին»,- ամփոփեց Արծվիկ Մինասյանը:

Մանրամասները՝ տեսանյութում