«Էմ. Թի. Վի.» պատկերասփիւռի կայանը երէկ երեկոյեան իր լուրերուն մէջ անդրադարձաւ Պուրճ Համուտի մէջ ուրբաթ երեկոյեան տեղի ունեցած դէպքին` նշելով, որ անիկա սկսած է` իբրեւ անձնական դէպք, որուն լուծման համար միջամտած են ՀՅԴ շրջանի ակումբէն տղաք, եւ երկու անձերը իրարմէ բաժնած:

«Էմ. Թի. Վի.»-ն այս ծիրին մէջ զրուցեց ՀՅԴ Լիբանանի Կեդրոնական կոմիտէի ներկայացուցիչ, երեսփոխան Յակոբ Բագրատունիի հետ, որ յայտնեց, թէ շուրջ 60-70 անձերէ բաղկացած խումբ մը եկան ՀՅԴ-ի ակումբին առջեւ եւ սկսան համայնքային կարգախօսներ բացագանչել ու փորձել մուտք գործել:

Ան բացատրեց, որ գոյութիւն ունի խմբակ մը, որ այդ մէկ-երկու թաղին մէջ կը զբաղի ապօրինի տուրքեր գանձելով, ելեկտրականութեան շարժակներ բանեցնելով, աղբահաւաքութեամբ եւ այլ հարցերով:

«Ժողով գումարեցինք Ամալ շարժումի բարձրագոյն ղեկավարներուն եւ Հըզպալլայի հետ, եւ ի յայտ եկաւ, որ այդ խմբակը ո՛չ շարժումին հետ կապ ունի, ո՛չ ալ կուսակցութեան: Անոնք անկարգներ են: Թող երթան եւ այլ շրջանի մէջ անկարգութիւն ընեն», ըսաւ Բագրատունի: