ՀՅԴ Լիբանանի Կեդրոնական կոմիտէի եւ Հայկական երեսփոխանական պլոքի ներկայացուցիչ Յակոբ Բագրատունի այցելեց խորհրդարանի նախագահ Նեպիհ Պըրրիի, որուն հետ քննարկեց այն մարտահրաւէրները, որոնք կը դրուին Լիբանանի եւ լիբանանցիներու դիմաց` իսրայէլեան շարունակուող ոճրային յարձակումներուն պատճառով:

Պըրրի ներկայացուց ներկայ փուլի վտանգները եւ այն ճիգը, որ կը ներդրէ զինադուլի հաստատման, թիւ 1701 բանաձեւի գործադրման եւ նախագահի ընտրութեան առնչութեամբ:

Բագրատունի ցաւակցելէ ետք սէյիտ Նասրալլայի նահատակութեան առիթով, բաժնեկցեցաւ խորհրդարանի նախագահի տեսակէտները` շեշտելով, որ Իսրայէլի անցեալէն եկած ախորժակները չեն բաւարարուիր միայն Լիբանանի դէմ շղթայազերծած պատերազմով, ո՛չ ալ սոսկ համայնքի մը դէմ իր կեցուածքներով:

Ան անհրաժեշտ նկատեց ներկայ փուլին լիբանանեան միասնականութիւնը եւ հաւաքաբար թշնամիին սադրանքներուն դէմ դնելու հրամայականը, շեշտելով պետութեան կայացման առաջնահերթութիւնը սահմանադրութեան գործադրութեան ծիրին մէջ, սկսելով հանրապետութեան նախագահի ընտրութենէն:

Անդրադարձ կատարուեցաւ մէկ միլիոնի հասնող գաղթականներու տագնապին եւ այս իմաստով կատարուած նախաձեռնութեանց, որոնց ծիրին մէջ Բագրատունի ներկայացուց ՀՅԴ-ի եւ հայկական տարբեր կառոյցներու աշխատանքները` թեթեւցնելու գաղթականներու տառապանքը: