ՀՅԴ ԳՄ ներկայացուցիչն անդրադարձավ նաև Արցախի ազգային հերոս Վիտալի Բալասանյանի հայտարարությանը, թե «Իրազեկ քաղաքացիների միավորում» և «Թրանսփարենսի ինթերնեյշնլ» հասարակական կազմակերպություններին Արցախի ՏԻՄ ընտրությունները դիտարկելու ուղարկելով՝ ՀՀ կառավարությունը միջամտում է Արցախի սուվերենությանն ու Սահմանադրությանը: Նա ասաց, որ դրան մեծ կարևորություն հաղորդել պետք չէ, բայց ճիշտ չէ խորացնել ՀՀ-ԱՀ անջրպետը և վատացնել Արցախի ազատամարտի հերոսների, մեր գեներալիտետի հանդեպ վերաբերմունքը: «Ոչ մեկը չի ժխտում, որ, այո՛, եղել են գեներալներ, որոնք տարբեր պատմությունների մեջ են, հարստացել են, բայց մեկ, երկու դեպքը չի կարելի համընդհանուր դարձնել. ես ճանաչում եմ բանակի բազմաթիվ հերոսների, որոնք իրենց կյանքն են դրել այս ժողովրդի համար, և այսօր բոլորին մեկ ափսեի մեջ դնելը, նույն կերպ վերաբերվելը, լավ տեղ չի տանելու»,- ասաց Իշխան Սաղաթելյանը:

Ստեփանակերտի հրապարակում կազմակերպված հանրահավաքի ժամանակ վարչապետ Փաշինյանի վանկարկումներին անդրադառնալով՝ նա նշեց. «Արցախը պղտոր ջրոմ ձուկ բռնելու տեղ չէ: Արցախի հարցում պետք լինել շատ նուրբ և զգույշ: Այդ հանրահավաքի իրական նպատակն էլ մենք վերջը չհասկացանք, դրանով ի՞նչ էին ուզում անել: Այդ հանրահավաքը պետք է ծառայեր ոչ թե Արցախի իշխանություններին մեկ անգամ ևս հարվածելուն, այլ անկեղծ, միասնական օրակարգ ձևավորելուն»:

Իշխան Սաղաթելյանն ընդգծեց, որ այս հարցում չպետք է լինեն Դաշնակցություն, «Իմ քայլ», Ռամկավար, Հնչակյան և այլն, այս հարցը քաղաքական շահարկման և դիվիդենդներ շահելու հարց չէ:

Արցախի նախագահական ընտրություններում ՀՅԴ-ն, հավանաբար, կմասնակցի սեփական թեկնածուով: ԳՄ ներկայացուցիչն ասաց, որ առաջիկայում տեղի կունենա Դաշնակցության Արցախի Կենտրոնական կոմիտեի ժողովը, որն իր որոշումը կկայացնի և կհրապարակի: «Այս փուլում Արցախի մեր ԿԿ-ն հայտարարություն է արել և սկսել քաղաքական կոնսուլտացիաները նախագահի հավանական թեկնածուների հետ՝ դրանով չբացառելով, որ մենք ևս սեփական թեկնածուով հանդես կգանք»,- հայտնեց Իշխան Սաղաթելյանը:

https://youtu.be/SX1NJaWKG2c