Տնտեսագետը նշեց, որ իշխանության ներկայացուցիչների հաջորդ հիմնավորումն այն էր, որ էժան վարկը վերցնելու են՝ վաղն ավելի թանկ վարկը փակելու համար: «Սրա անունը վարկի վերաֆինանսավորում է, եթե վարկի վերաֆինանսավորում ենք անում, ավելի անկեղծ ու ճիշտ է, որ դրա մասին խոսենք, որովհետև դրանով ամբողջ տրամաբանությունը փոխվում է: Մենք 2020 թվականի բյուջեով ունենք 20 տոկոս դեֆիցիտի աճ և վախեր ունենք, որ կարող է մենք այդ դեֆիցիտը չկարողանանք փակել: Այդ պատճառով էլ մտածել են՝ քանի 2019 թվի բյուջեով նախատեսված ունենք այս վարկը, եկեք վերցնենք, որ 2020 թվականի բյուջեի այդ հարցը կարողանանք լուծել: Այսինքն՝ իշխանությունը մտածում է՝ չենք կարող այդքան հարկային եկամուտներ ապահովել: Սա լրիվ այլ խոսակցություն է և նշանակում է, որ 2020 թվականի բյուջեն չսկսված արդեն ձախողված է գնահատվում»,- բացատրեց նա:

Արմեն Գրիգորյանը նախ նշեց, որ ստացվում է՝ մենք վարկը վերցնում ենք 2019 թվականի բյուջեով ու պահում ենք այդ գումարը: Նա հիշեցրեց, որ վարկերի նախագծերն ԱԺ-ում զեկուցող ֆինանսների փոխնախարար Արմեն Հայրապետյանն ասում էր, որ պետք է այդ գումարը, որովհետև կանխատեսում են, որ հարկային մուտքերը չեն ապահովվի, քանի որ ավտոմեքենաներից գանձվող հարկերը 2020 թվականին չեն լինելու. «Է թող բյուջեն այդ տրամաբանությամբ կառուցվեր, ի՞նչ իմաստ ունի պետական պարտքն ավելացնելու: Մենք, որ այս բյուջեին քննադատում և ասում էինք, որ այն հեղափոխական չէ, մեկ անգամ ևս փաստվեց: Չի կարելի այս տարի պարտք վերցնել հաջորդ տարվա բյուջեի կատարման համար, չի կարելի այս տարին դեկտեմբերի 31-ով փակել իրենց հայտարարած 7 տոկոս տնտեսական աճով, բայց մեկ օր հետո՝ հունվարի մեկից կանխատեսել 4,9 տոկոսի ընթացք ամբողջ տարվա համար: Նման բաները չեն կարող հեղափոխական կոչվել»,- ընդգծեց նա:

Նա հավելեց, որ ընդամենը պետք էր անկեղծ լինել ու ասել՝ քանի հնարավորություն կա այս վարկը վերցնում ենք, որ հետո մեծ խնդիրների առաջ չկանգնենք, քան ասել, որ 132 մլն եվրոյի վարկ ենք վերցնում, որովհետև մեր վարած քաղաքականությունը հավանել են դոնոր կազմակերպությունները և որ դա քաղաքականությամբ պայմանավորված վարկ է:

«Այսինքն, մենք կրթության կամ առողջապահության ոլորտի հետ կապված ի՞նչ քաղաքականություն ենք վարում, որ դոնոր կազմակերպություններին դուր է եկել ու դրա համար մեզ էժան փող են տալիս: Կարո՞ղ է իրենց ուզած քաղաքականությունն ենք վարում, դրա համար: Ես իրենց հիմնավորումներն եմ ասում, չեմ հորինում. վարկի անունն է այդպես: Օրինակ՝ մեկ վարկի անունը՝ առողջապահական ոլորտի քաղաքականության համար տրվող վարկ է, իսկ առողջապահության նախարարը թմբկահարում է գարդասիլը, մեկը, մյուսը… և ես չգիտեմ, թե դա ինչ քաղաքականություն է: Իսկ քաղաքականության մասին բովանդակային քննարկում ԱԺ-ում տեղի չունեցավ»,- հայտարարեց տնտեսագետը:

Նա հիշեցրեց, որ խորհրդարանական ընդդիմության կողմից բովանդակային հարցեր հնչեցվեցին, որոնք մնացին անպատասխան, թե ի վերջո նպատակը ո՞րն էր, ինչի՞ համար են վերցնում վարկը. տաբեր գործիչներ տարբեր բացատրություններ տվեցին, սա անթույլատրելի բան է:

Անդրադառնալով ԱԺ նախագահ Արարատ Միրզոյանի այն դիտարկմանը, թե ընդդիմադիրների քննադատությունները պետք է այսպես թե այնպես լինեն, բայց միջազգային կառույցները վստահում են իշխանություններին, դրա համար էլ էժան վարկ են տալիս, նա ասաց. «Այն, որ նշվեց, թե սովորական բան է, որ ընդդիմությունը պետք է քննադատի իշխանություններին, դա սխալ թեզ է: Մեր քաղաքական ուժը տարբեր ժամանակներում՝ ընդդիմություն լինելով հանդերձ, որը դրական է եղել, ասել է՝ դրական է: Հիմա էլ ենք ասում, որ օրինակ ստվերի դեմ վարվող պայքարը լավ է, լավ է որ նվազագույն աշխատավարձը հավասարեցվել է նվազագույն կենսաապահովման զամբյուղին. այդ անատամ քննադատությունները, որ եթե ընդդիմություն են, ուրեմն պետք է քննադատեն, անիմաստ է: Նա (Արարատ Միրզոյանը) նույնիսկ ասաց, որ եթե իրենք լինեն ընդդիմություն, իրենք էլ այդպես կանեն, դա ոչ մի տեղ չտանող քաղաքական կուրս է»:

Իսկ ինչ վերաբերում է նրան, որ իրենց վստահում են, դրա համար են վարկ տալիս, Գրիգորյանն ասաց՝ ինչի՞ն են վստահում: «Տարբեր ժամանակներ էլ վարկեր են տվել, ուրեմն նախորդ իշխանություններին էդքան վստահե՞լ են, որ պարտքը հասել է 7 միլիարդ. եթե վարկ տալը վստահության նշան է, ուրեմն նախորդ իշխանություններին ավելի շատ են վստահել, էդ տրամաբանությունը ոչ մի տեղ չի տանում: Դեկտեմբերի վերջում պրոֆիցիտով փակվող բյուջեի դեպքում դեֆիցիտի հիմնավորմամբ վարկ են վերցնում, դա աբսուրդ է, ավելի լավ է ասեն՝ վերցնում ենք հաջորդ տարվա համար, որովհետև հունվար, փետրվար, մարտ ամիսներին դժվար է լինելու, կամ ապրիլին գազը թանկանալու է, փորձելու են մեղմել ճնշումը հանրության վրա, ես հուշեմ, գոնե թող այսպես ասեն, դա ավելի անկեղծ կլինի: Արտաքին պարտքն ավելացնելով` մենք ոչ մի լավ տեղ չենք գնա»,- շեշտեց նա:

Ինչ վերաբերում է ֆինանսների փոխնախարար Արմեն Հայրապետյանի այն հայտարարությանը, որ սա վերջին բյուջետային աջակցության վարկը կլինի, որ ՀՀ-ն կվերցնի, հաջորդիվ ծրագրային վարկեր ենք վերցնելու, Գրիգորյանը հույս հայտնեց, որ խոսքը կպահեն: «Հույս ունեմ, որ 2020 թվականի վերջին չենք հասնի մի վիճակի, որ ասվի՝ մեզ մոտ սպառումը ընկել է, որովհետև եկամտահարկը համահարթեցրել ենք, իսկ փոխարենը անուղղակի հարկերն ենք ավելացրել, սրան գումարվել է նաև ԵԱՏՄ հիմնական ապրանքների մաքսատուրքի բարձրացումը, սպառումն ընկել է, իրացումը պակաս է, ուրեմն հարկային հավաքագրումները նույնպես պակաս են, ուրեմն մենք բյուջետային աջակցության վարկի պակաս ունենք ու պետք է վերցնենք: Աստված տա, չունենանք այս խնդիրները, ես կողմ եմ, որ ծրագրային վարկեր լինեն»,- եզրափակեց նա:

Հեղինակ Ամալյա Առաքելյան