Հարկային բեռը հարուստներից տեղափոխվեց հասարակության բոլոր անդամների վրա
08 Հունվար 2020 Հունվարից ուժի մեջ են մտել եկամտահարկի փոփոխություններն, ըստ որոնց եթե նախկինում գործում էր եկամտահարկի եռաստիճան համակարգ, ապա այսուհետ թե՛ ցածր, թե՛ բարձր աշխատավարձ ստացողները վճարելու են համահարթ՝ 23 տոկոս եկամտահարկ:
Տնտեսագետ Սուրեն Պարսյանն ArmDaily.am-ի հետ զրույցում նշեց, որ եկամտահարկի համահարթեցման արդյունքում հարկային բեռը հարուստներից կամ բարձր աշխատավարձ ունեցողներից տեղափոխվեց հասարակության բոլոր անդամների վրա, քանի որ նախատեսվում է նաև հունվարի 1-ից ակցիզային մի շարք հարկատեսակների ավելացում՝ ալկոհոլ, ծխածոտ, դիզելային վառելիք, բենզին և այլն, սրանք այն ապրանքատեսակներն են, որ մարդիկ ձեռք են բերում, անկախ նրանից, որ դրանք առաջին անհրաժեշտության ապրանքների ցանկում չեն։ Միաժամանակ, տարեսկզբից 700 ապրանքատեսակների մաքսատուրքերն են ավելանալու, որը նույնպես լրացուցիչ բեռ է մարդկանց վրա։ «Արդյունքում, ունևորներին զիջված հարկերը վճարում է ողջ հասարակությունը։ Այս օրենքի արդյունքում նաև առաջանում է եկամուտների անհավասարաչափ բաշխվածության խնդիր, քանի որ սոցիալական արդարությունը հիմնված է որոշակի արժեհամակարգերի վրա, տնտեսական հաշվարկների վրա և եթե մենք ուզում ենք տնտեսական զարգացում ունենալ, պետք է եկամուտները վերաբաշխել։ Այսինքն, հարուստներից վերցնել որոշակի գումար և դրա հաշվին տարբեր հանրային բարիքներ ստեղծել, ինչպես օրինակ, անվճար ու որակյալ կրթություն, առողջապահություն, բարեկեցիկ շրջակա միջավայր և այլ։ Այսինքն, սրանք ոչ թե ինքնանպատակ են, այլ սրա միջոցով հասարակությունը ստանում է լրացուցիչ հանրային բարիքներ կենսամակարդակն ավելի բարձրանում է»,-ասաց նա։
Պարսյանն ընդգծեց նաև, որ եկամտահարկի համահարթեցման արդյունքում հարուստներն ավելի կհարստանան, աղքատները կշարունակեն մնալ աղաքատ, հարուստների և աղքատների միջև բևեռացվածությունն ավելի կխորանա։ «Դրա վառ ապացույցը Վրաստանն է, որը 2006 թ-ից ունի համահարթ եկամտային հարկի քաղաքականություն, որի արդյունքում առաջին տեղում է եկամուտների անհավասար բաշխվածության արդյունքով։ Կարծում եմ, մենք մի քանի տարի հետո կգերազանցենք Վրաստանին։ Վերջին տարիներին մի շարք երկրներ, ովքեր ունեցել են եկամտային համահարթ քաղաքականություն, ինչպես օրինակ Սլովակիան, Մակեդոնիան, հրաժարվել են այդ քաղաքականությունից՝ վերադառնալով եկամտային հարկի տարբերակմանը։ Նրանք ցույց են տվել, որ սրա արդյունքում եկամուտներն անհավասարաչափ է բաշխվում, պետությունն ավելի շատ պարտք է կուտակում։ Կարծում եմ մեզ դա սպասվում է, քանի որ մենք խնդիր ենք ունենում եկամուտների արդյունավետ բաշխվածության։ Մեզ մոտ ոչ թե եկամուտ չկա, այլ շահույթը մի քանի անձանց ձեռքում է, սրանով տնտեսությունը չի զարգանում, տնտեսական աճը ներառական չէ»,-ասաց Պարսյանը։
