– Ինչպե՞ս կգնահատեք ԵԽԽՎ Հայաստանի հարցով մոնիտորինգի համազեկուցողների արձագանքը Հայաստանում տեղի ունեցող իրադարձություններին: Մասնավորապես նրանք անհանգստություն են հայտնել Կառավարության և Սահմանադրական դատարանի միջև առկա լարվածության կապակցությամբ:

– Կառավարության և Սահմանադրական դատարանի միջև առկա լարվածության համատեքստում Հայաստանում տեղի ունեցող իրադարձությունների կապակցությամբ ԵԽԽՎ մոնիթորինգի հանձնաժողովի Հայաստանի հարցով համազեկուցողների արձագանքը իրականության արտացոլումն է առ այն, որ օրենսդիր և գործադիր մարմինները իրավունք չունեն որևէ կերպ ճնշում գործադրելու դատական մարմինների՝ Սահմանադրական դատարանի, Սահմանադրական դատարանի նախագահի, Սահմանադրական դատարանի դատավորների և ընդհանրապես դատավորների վրա, որ նրանք պարտավոր են գործել Սահմանադրությամբ իրենց տրված լիազորությունների շրջանակում և դրանից դուրս յուրաքանչյուր քայլ դատապարտելի է ու հակասում է ժողովրդավարական երկրի գաղափարախոսությանը: Մեծ հաշվով` ԵԽԽՎ մոնիթորինգի հանձնաժողովը դեղին քարտ է ցույց տվել իշխանություններին և դիմել «լրջացե՛ք» կոչով: Ես հույս ունեմ, որ օրվա իշխանությունը չի տառապում քաղաքական դալտոնիզմով և հաջորդիվ մեր երկրին չի արժանացնի միջազգային հեղինակավոր կառույցների կողմից տրված կարմիր քարտին:

– «Իշխանության բոլոր ճյուղերը պետք է գործեն իրավունքի գերակայության սկզբունքին համապատասխան և հարգեն այն իրենց գործողություններում և խոսքերում, ներառյալ՝ անմեղության կանխավարկածի սկզբունքը»: Ըստ Ձեզ` համազեկուցողների այս դիտարկումը ո՞ր կողմին է վերաբերում:

– Այսօր երկրում ունենք մի իրավիճակ, երբ բազմակուսակցական ժողովրդավարության անվան տակ հաստատված է միակուսակցական իշխանություն և մեր երկրի վարչապետին դա էլ է քիչ ու նա ձգտում է միանձնյա իշխանության հաստատման: Եվ այդ ճանապարհին նա ոչ մի քայլի առաջ չի ընկրկում: Իր նպատակին հասնելու համար նա բազմիցս արդեն խախտել է սահմանադրական կարգն ու շարունակում է խախտել այն տարբեր գործողություններով ու հայտարարություններով: Նա իր տարբեր ելույթներով տարբեր մարդկանց մեղավոր է նշանակում, իսկ օրենսդիրի ու գործադիրի իր կուսակից ընկերները՝ կամա թե ակամա, հասկանալով թե չհասկանալով, ընդունելով թե չընդունելով, բայց իրար հերթ չտալով խոսում ու գործում են այնպես, որ իրենց ղեկավարի ախորժակը բավարարեն: Եվ այդ պարագայում էլ ինչպե՞ս հարգեն անմեղության կանխավարկածի սկզբունքը: Համազեկուցողների՝ Ձեր մեջբերած դիտարկումն առաջին հերթին, իհարկե, հենց օրենսդիրին և գործադիրին է վերաբերում: Սակայն այն հավասարապես վերաբերում է նաև դատական մարմիններին: Նրանով փաստվում է, որ իրավունքի գերակայութան սկզբունքը պետք է գործի բոլոր դատավարական գործընթացներում, և դատավորներն ու դատարանները չպետք է ընկրկեն իշխանությունների ցանկությունների առաջ:

– Տիկին, Կյուրեղյան, մյուս կողմից իշխանության ներկայացուցիչները՝ սկսած արդարադատության նախարարից, ողջունում են համազեկուցողների արձագանքը: Ստացվում է, որ ընդդիմությունն ընդգծում է, որ պետք է զգուշանալ այս արձագանքից, իշխանությունը հակառակը՝ ողջունում է: Ի՞նչ պետք է անել այս դեպքում:

– Այո, իշխանության ներկայացուցիչները, սկսած արդարադատության նախարարից, ողջունում են համազեկուցողների արձագանքը: Գիտեք, կա՛մ այդ մարդիկ իսկապես չեն ընկալել, ի վիճակի չեն ընկալելու, կա՛մ չեն ուզում ընկալել ԵԽԽՎ Մոնիթորինգի հանձնաժողովի արձագանքի բուն էությունը: Ինձ թվում է, որ նրանք ամեն ինչ լավ էլ ընկալել են, պարզապես միակողմանի ներկայացնելով, թաքցնելով ԵԽԽՎ զեկուցողների մտահոգությունները, փորձում են հանրությանը շեղել գործադիր իշխանությանը՝ խելքի գալու ԵԽԽՎ կոչերից:

– Կարծիք կա, որ իշխանության ներկայացուցիչները խմբագրել են և միայն արձագանքի դրական մասն են ներկայացնում, ինչո՞ւ:

– Այն, որ իշխանությունները խմբագրել են և ԵԽԽՎ Մոնիթորինգի հանձնաժողովի արձագանքի միայն դրական մասն են ներկայացնում հանրությանը, դա փաստ է: Բայց ասեմ, որ իզուր էլ խմբագրել են: Ինչո՞ւ, որովհետև հասարակության այն մասը, ում իրենք կարող են մոլորեցնել, բոլորովին չի էլ կարդալու այդ տեքստը, լինի այն խմբագրված, թե չխմբագրված: Իսկ հասարակության գիտակից զանգվածը, որը վաղուց արդեն հանրության մեծ մասն է, ի վիճակի է տարբերելու և գնահատելու խմբագրված և իրական տեքստերը, իսկ խմբագրման փաստն ինքնին արդեն նպաստում է իշխանությունների գործունեության գնահատականի նվազմանը:

– «Մենք արդեն իսկ ընդգծել ենք, քաղաքական դերակատարների կողմից այնպիսի գործողություններից և հայտարարություններից ձեռնպահ մնալու անհրաժեշտությունը, որոնք կարող են ընկալվել որպես ճնշման գործադրում դատական համակարգի վրա»: Ինչպես կմեկնաբանեք համազեկուցողների այս դիտողությունը:

– Նույն փաստաթղթում համազեկուցողները դիմել են իշխանության բոլոր ճյուղերին և կոչ արել քաղաքական դերակատարներին՝ զերծ մնալ այնպիսի գործողություններից և հայտարարություններից, որոնք կարող են ընկալվել որպես ճնշման գործադրում դատական համակարգի վրա: Ակնհայտ է, որ միայն շատ մեծ ցանկության դեպքում կարելի է չտեսնել, չհասկանալ, որ կոչն ուղղված է իշխանության գործադիր և օրենսդիր ճյուղերին: Եվ ես հույս ունեմ, որ Հայաստանը ժողովրդավարության բաստիոն հայտարարող իշխանավորները ճիշտ դասեր կքաղեն ԵԽԽՎ հանձնաժողովի արձագանքից և կհրաժարվեն իրենց որդեգրած հակաժողովրդավարական, հակապետական, հակասահմանադրական գործելաոճից և, վերջապես, կմտածեն հանրային կյանքի բոլոր ոլորտներում ազգային անվտանգության ռազմավարությունների մշակման և իրականացման ուղղությամբ, եթե իհարկե, դեռ հնարավոր է:

Հեղինակ Ամալյա Առաքելյան