Հանրաքվեն կեղծ օրակարգ է
14 Փետրվար 2020 ՀՅԴ Գերագույն մարմինը հայտարարություն տարածեց, որում մասնավորապես ասվում է. «Կոչ ենք անում ՀՀ քաղաքացիներին` մասնակից չդառնալ իշխանությունների կողմից նախաձեռնած հերթական ապօրինությանը, անտեսել ապրիլի 5-ին նշանակված հանրաքվեն` հստակ ուղերձ հղելով իշխանություններին, որ ժողովուրդն այլեւս հոգնել է պոպուլիզմից, արհեստածին օրակարգերից, հասարակությունը «սեւերի» ու «սպիտակների» բաժանելու քայքայիչ քաղաքականությունից, արդեն շարունակական դարձած ցնցումներից, որոնք այդպես էլ չնպաստեցին հանրային բարեկեցության աճին եւ իրական ժողովրդավարությանը»: Սահմանադրության փոփոխությունների հանրաքվեն, հիշեցնենք, տեղի կունենա ապրիլի 5-ին: Այս եւ այլ հարցերի մասին iravunk.com-ը զրուցել է ՀՅ Դաշնակցության Հայաստանի Գերագույն մարմնի ներկայացուցիչ Իշխսն Սաղաթելյանի հետ:
– Պարոն Սաղաթելյան, ՀՅԴ-ն ամենահին կուսակցություններից է, որքանո՞վ եք ճիշտ համարում ՀՅԴ-ի կողմից հանրաքվեն շրջանցելու կոչը, կարծես թե, այս ամենը խոշոր քաղաքական իրադարձություն է, որը շրջադարձային է լինելու:
– Մենք իրադարձությունները չենք շրջանցում, մենք իրադարձություններին շատ հստակ գնահատական ենք տալիս: Մենք շատ պարզ ասում ենք, որ պասիվ չենք լինելու:
– Ձեր խոսքում նշում եք, որ պասիվ չեք լինելու, իսկ ի՞նչ եք պատրաստվում անել:
– Երբ քարոզարշավը սկսվի, մենք ամեն բան անելու ենք, որ մեր կեցվածքն ու դիրքորոշումը հասանելի լինեն ժողովրդին, պետք է ցույց տանք, որ հանրաքվեն կեղծ օրակարգ է: Հանրաքվեով մեր երկրում բազմաթիվ խնդիրներ չեն լուծվելու, այն բավարարում է ընդամենը օրվա իշխանության ցանկությունները, իսկ իշխանությունները ցանկանում են ունենալ սեփական սահմանադրական դատարան: Մենք ոչ միայն ասում ենք` անտեսեք եւ մի մասնակցեք, այլեւ ճիշտ հակառակը:
– Ի՞նչ եք կարծում, ի՞նչ կտա այս հանրաքվեն երկրին եւ ժողովրդին:
– Դրական ոչինչ չի տա, որովհետեւ դա այն ճանապարհը չէ, որով պետք է երկիրը շարժվի: Մեր երկրից կապիտալը փախչում է, մենք երեկ տեսանք Կենտրոնական բանկի տվյալները, որ 1.5 միլիարդ դոլար գումար է երկրից դուրս եկել, երբ խաղաղ պայմաններում մեկ ամսվա մեջ 12 զոհ ունենք, երբ տնտեսությունն անմխիթար վիճակում է, երբ արտագաղթը շարունակվում է, այսինքն` չանդրադառնալ այս ամենին ու զբաղվել անիմաստ հանրաքվեով, դա որեւէ լավ բան չի տա ժողովրդին:
– Արդեն հայտնի է, որ «Այո»-ի շտաբը ղեկավարելու է Տարածքային կառավարման նախարար Սուրեն Պապիկյանը: Մինչ այժմ չկա «Ոչ»-ի ճակատ: Արդյո՞ք անհրաժեշտություն չկա հակակշիռ ներկայացնող շտաբի ստեղծումը, չնայած նրան, որ Ձեր կուսակցությունը հորդորում է չմասնակցել ընտրությանը:
– Շատ կուսակցություններ գտնում են, որ այս ամենը կեղծ օրակարգ է, եւ չեն ուզում ստանձել «Ոչ»-ի պաշտոնական ղեկավարումը:
ՀԱՅԿ ԳԵՎՈՐԳՅԱՆ
