Անդրադառնալով քաղաքի մյուս ենթակառուցվածքների խնդիրներին՝ Ժիրայր Ռեիսյանը տեղեկացրեց, որ ջրամատակարարման ուղղությամբ զգալի աշխատանք է կատարվել: Կան թաղամասեր, որտեղ գրեթե 24 ժամ ջրամատակարարում է ապահովվում, մյուսներում էլ այդ ուղղությամբ աշխատանքները շարունակվում են: Էլեկտրաէներգիայի հետ կապված խնդիրը դեռ ամբողջությամբ լուծված չէ, օրվա մեջ մի քանի ժամ են ունենում, սակայն այդ բոլոր հարցերը իշխանությունների անմիջական ուշադրության կենտրոնում են: Ամեն ինչ արվում է արագ տեմպերով` բնականոն էլեկտրամատակարարում ապահովելու համար:

Հալեպում հայ համայնքի կառույցների վերականգնման ուղղությամբ ևս աշխատանքներ են նախատեսված: Ժիրայր Ռեիսյանը նշեց, որ դպրոցների հարցն առաջնահերթ է եղել, այս ընթացքում ոչ մի աշակերտ առանց դասերի չի մնացել: Ամեն հնարավորն արվել է հայկական դպրոցները աշխատեցնելու ուղղությամբ: Ներկայում կանոնակարգված բոլոր դասընթացները կայանում են, երեխաներն ակտիվորեն մասնակցում են կրթական գործընթացներին: Ինչ վերաբերում է եկեղեցիներին, ապա Ժիրայր Ռեիսյանը նշեց, որ այս ընթացքում Հալեպի Մայր եկեղեցին վերանորոգվել է և այժմ իր հոգևոր ծառայության մեջ է: Օրակարգում Սուրբ Գևորգ եկեղեցին է, որը տարիներ առաջ հրկիզվել էր: Այն գտնվում է Հալեպի հայաշատ Նոր Գյուղ թաղամասում: Ժիրայր Ռեիսյանը տեղեկացրեց, որ այդ հատվածում գտնվում է նաև Սուրբ Գրիգոր Լուսավորիչ եկեղեցին, որը ներկայում գործում է:

Ինչ վերաբերում է հայերի տեղաշարժերին, ապա Ժիրայր Ռեիսյանը նշեց, որ շատերը վերադարձել են Հալեպ, շատերը դեռ գալիս են տեղի պայմաններին ծանոթանալու և դիտարկում են հիմնովին վերադառնալու տարբերակները: «Ամեն դեպքում մեր ցանկությունն է, որ համայնքի բոլոր զավակները վերադառնան իրենց տները, վերականգնեն գործը»,-ասաց նա:

Այս օրերին Հալեպի ազատագրմանը զուգահեռ ևս մեկ կարևոր իրադարձություն տեղի ունեցավ Սիրիայում: Երկրի խորհրդարանը պաշտոնապես ճանաչեց Հայոց ցեղասպանությունը: Ի՞նչը հիմք հանդիսացավ նրա, որ Սիրիան ճանաչեց Հայոց ցեղասպանությունը. այս հարցն ինչ-որ տեղ զարմացնում է Ժիրայր Ռեիսյանին, որովհետև իրականության մեջ Սիրիան իր հողով ու ժողովրդով վկան է եղել Հայոց ցեղասպանության: Բնաջնջումից փրկված շատ հայեր հանգրվան են գտել հենց Սիրիայում:

«Սիրիան պետականորեն ճանաչեց Հայոց ցեղասպանությունը: Այստեղ կարևոր ուղերձն այն է, որ միասնաբար, ձեռք ձեռքի տված պայքարենք, կանխարգելենք ոճրագործությունները»,-ասաց Ժիրայր Ռեիսյանն՝ ընդգծելով, որ այսօր էլ Սիրիան ենթարկվում է այդ նույն ջարդարարների ոճրային արարքին:

Աննա Գզիրյան