«Իսկ արդյունքում՝ մարդկանց մոտ ձևավորված այս իշխանություններից սպասելիքները բնականաբար չէին կարող իրականանալ: Մարդիկ սպասում էին իրենց սոցիալական խնդիրների լուծման, նոր աշխատատեղերի ստեղծման, աղքատության մակարդակի նվազեցման, բնակարանային խնդիրների լուծման և նմանատիպ այլ հարցեր: Բայց պարզվեց, որ աշխատատեղերի բացման հարցում պետությունը ոչ մի պարտավորություն չունի, իսկ աղքատությունը հենց այդ մարդկանց գլուխներում է, և իրենք պետք է այն հաղթահարեն»,-նշեց Կյուրեղյանը:

Նրա խոսքով՝ բնակարանային խնդիրների լուծման համար քաղաքացիները պետք է օր ու գիշեր, 24 ժամ աշխատեն, ինչպես երիտասարդ ժամանակ աշխատել է Նիկոլ Փաշինյանը:

«Լավ, եթե կառավարությունը նման հարցեր լուծելու որևէ պարտավորություն չունի ՀՀ քաղաքացիների առաջ, ապա այդ ինչ հիմքով են կառավարության, ԱԺ ներկայացուցիչները հենց այդ նույն քաղաքացիների հարկերի հաշվին այդքան բարձր աշխատավարձեր ու պարգևավճարներ ստանում, աշխատանքի այդ ինչ արդյունավետության համար»,- ասաց նա:

Կյուրեղյանն ընդգծեց, որ իշխանության եկած թիմն այսօր մեծամասնություն է ԱԺ-ում, ընդ որում, այնպիսի մեծամասնություն, որ մեկ կուսակցության 88 մանդատներով կարող են փոխել նույնիսկ սահմանադրական օրենքներ, այդքան քննադատվող հանրապետականը նման հնարավորություն չուներ, և որևէ սահմանադրական օրենք փոխելու համար նրան անհրաժեշտ էին թե կոալիցիոն գործընկերոջ և թե ընդդիմության ձայներ:

«Հիմա էլ այդ թիմը ուզում է փոխել Սահմանադրական դատարանի կազմը և քանի որ շատ լավ գիտակցում է, որ վաղ թե ուշ օրենքի առաջ պատասխան է տալու նման հակասահմանադրական քայլի համար, փորձում է այդ հարցի լուծման պատասխանատվությունը նույնպես դնել ժողովրդի վրա՝ հարցը դարձնելով հանրաքվեի հարց: Կարելի է ասել, որ այս իշխանությունները երկրի առջև ծառացած խնդիրները լուծելու անկարողությունը փորձում են կոծկել՝ դրանց պատասխանատվությունը դնելով իրենց բոլոր լիազորություններով օժտած ժողովրդի վրա»,- նշեց նա:

Կյուրեղյանի կարծիքով՝ հիմա էլ կորոնավիրուսի՝ համաշխարհային համաճարակի, դեմ պայքարի հարցում է նույն վերաբերմունքը: «Կառավարության պատասխանատու անձը հայտարարում է, որ այդ վիրուսը խիստ վտանգավոր չէ և հատուկ միջոցառումների կարիք չկա: Այն մարդիկ էլ, որոնք անվերապահորեն վստահում էին իրենց, հավատացին, որ վիրուսը, իրոք, վտանգավոր չէ, և այդ դեպքում ինչու ինքնամեկուսացվեին: Ստացվում է, որ մեր քաղաքացին է մեղավոր, որ չի հասկացել, թե Իտալիայից ժամանած ինքնաթիռից իջնելուց հետո տուն չպետք է գնալ, այլ միանգամից Ծաղկաձոր՝ «Գոլդեն Փելես»»,- ընդգծեց նա:

Այնինչ, ըստ Կյուրեղյանի, քաղաքացին միամտորեն հավատում էր, որ այդ վիրուսը վտանգավոր չէ, հակառակ դեպքում մեր երկրի վարչապետը՝ նման կարևոր խնդրի լուծման թիվ մեկ պատասխանատուն, ինչու պետք է գնար արձակուրդ և դեռ ավելին՝ քարոզարշավ իրականացներ իր ընտանիքի անդամներով, տնից տուն գնար, քաղաքացու անձնագիր փոխանցեր ձեռքից ձեռք, բազմամարդ (թեկուզ մինչև 100 մարդ) հավաքներ կազմակերպեր:

«Ստացվում է, որ քաղաքացին է մեղավոր, որ հավատացել է վարչապետին ու կառավարությանը, ովքեր ձեռնոց էին նետել Առողջապահության համաշխարհային կազմակերպությանը, արհամարհել էին նրա հորդորները՝ միջոցներ ձեռք առնել վիրուսի տարածման դեմ: Ստացվում է, որ քաղաքացին է մեղավոր, որ չի կարողացել ճիշտ գնահատել կորոնավիրուսի իրական վտանգները, չի հասկացել, որ 15-25 օր ինկուբացիոն ընթացք ունեցող վիրուսի դեմ պայքարելու համար ընդամենը մեկ շաբաթ դասերից ազատված դպրոցականներին, որպես ՀՀ հպարտ քաղաքացիներ, չի կարելի մասնակցել քարոզարշավի դուրս եկած վարչապետի հետ հանդիպումներին: Ոչ, իհարկե ոչ: Մեղավորը հենց կորոնավիրուսն է, որը ոչ մի կերպ չհասկացավ, թե Հայաստան մտնելով, կխանգարի հակասահմանադրական կարգով նշանակված հանրաքվեի քարոզարշավին: Բոլորը, բացի այդ վտանգի դեմ պայքարելու առաջնային պարտավորություն ունեցողներն են մեղավոր սկզբունքով, մեր երկիրը լուրջ վտանգների է ենթարկվում»,- նշեց նա:

Վերջում Կյուրեղյանը լրջանալու կոչ արեց: «Լրջացեք և գործ արեք, եթե իհարկե, համապատասխան կարողություն, պատասխանատվության զգացում ու քաղաքական կամք ունեք, պարոնայք իշխանավորներ: Հետո չասեք՝ ժողովուրդն էր մեղավոր, չէ որ մենք ժողովրդավարության բաստիոն ենք»,- եզրափակեց նա:

Հեղինակ Ամալյա Առաքելյան