Տնտեսագետի պնդմամբ՝ վառելիքի շուկայում գների միասնական անկումն ու բարձրացումը պայմանավորված է մենաշնորհով: Այն վերջին երկու տարիներին ոչ միայն չի վերացել, այլև ավելի է ամրապնդվել:

«Մենաշնորհ դիրքը պահպանում են «Ֆլեշ», «Սիփիէս օիլ» և «Մաքս Պետրոլ» ընկերությունները, որոնք 2019-ի տվյալների համաձայն՝ տիրապետում են շուկայի 100 տոկոսին: Միասնական գների իջեցումը և բարձրացումը խոսում է այն մասին, որ այս շուկայում հակամրցակցային ռիսկ կա: Իրականացնում են համաձայնեցված գնային քաղաքականություն: Որևէ բան մեր շուկայում չի ուղղվել, հակառակը՝ ավելի է խորացել»,- ասաց տնտեսագետը:

Սուրեն Պարսյանին անհանգստացնում է նաև այն փաստը, որ այս տնտեսվարողներին է պատկանում բենզալցակայանային ցանցի մեկ երրորդը, իսկ ցածր գների պայմաններում մյուս բենզալցակայանները, որոնք այս երեք խոշոր տնտեսվարողներին չեն պատկանում, դուրս են մնում շուկայից:

«Դարձյալ տուժելու են փոքր և միջին ձեռնարկատերերը: Այս դեպքում՝ փոքր և միջին բենզալցակայանները»:

Մեր հարցին, թե դեռ որքա՞ն կիջնի բենզինի գինը, տնտեսագետը պատասխանեց.

«Ինչպես արդեն նշեցի, դա մի շարք գործոններով է պայմանավորված: Նավթի գնի կտրուկ անկում, չեմ կարծում, որ լինի, բայց ռուբլու գնանկում հնարավոր է: Սա կարող է ազդել մեր շուկայի վրա, բացի այդ, երբ հայկական դրամն արժեզրկվի, ինչն արդեն տեղի է ունենում, ապա գների բարձրացում տեղի կունենա: Հայկական դրամը կարժեզրկվի այնքան, որ կհավասարվի ռուսական արժեզրկմանը: Այդ դեպքում բենզինի գինը կբարձրանա մոտ 400 դրամ, այսինքն՝ իր նախկին գնին կվերադառնա»:

Մեր հարևան երկրների մեծ մասում վառելիքի գինն ավելի էժան է, քան մեզ մոտ, պնդում է տնտեսագետը:

«Վրացական լարին շատ ավելի է արժեզրկվել, քան հայկական դրամը, հետևաբար՝ գները պահպանվել են, էլի իջել են, բայց ոչ այնքան, որքան մեզ մոտ: Ադրբեջանում միշտ էլ ավելի էժան է եղել, քան մեզ մոտ, նրանք արդյունահանող, արտահանող երկիր են: Իրանական ռիալի արժեզրկման պայմաններում վառելիքն իրենց մոտ 5-6 անգամ ավելի էժան է, քան մեզ մոտ: Թուրքական լիրան ևս արժեզրկվել է, ավելի շատ, քան հայկական դրամը, այնտեղ ևս նվազել են գները»,- ասաց տնտեսագետը: