Նա ընդգծեց, որ նախագծի նպատակ է նշվում՝ ժամանակակից էլեկտրոնային և թվային տեխնոլոգիաների կիրառմամբ համաճարակի կանխարգելման նոր մեխանիզմի միջոցով ստացված տվյալների մշակման և վերլուծության հիման վրա հնարավորություն կստեղծվի կանխորոշել և սահմանափակել անձանց տեղաշարժման և շփումների շրջանակը, տարածման ուղղությունները և առավել արդյունավետ հսկողություն իրականացնել անձանց տեղաշարժի սահմանափակման ռեժիմի պահպանման նկատմամբ:

«Ըստ իս, նշված նպատակն ու նրան հասնելու համար առաջարկված միջոցը համաչափ չեն և այդ միջոցի իրականացման արդյունքում, մենք կունենանք հանրապետության ողջ բնակչության տոտալ վերահսկողություն: Եթե միայն դիտարկենք այսօր իրականացվող հեռավար ուսուցման շրջանակներում հեռախոսային ուղղակի և անուղղակի կապերի, ինչպես նաև էլեկտրոնային տարբեր ծրագրերի իրականացման ծավալները, ապա այն կընդգրկի գրեթե բոլորին, ողջ հանրապետությունը: Այս ամենը հանրության մեջ կարող է ստեղծել ավելորդ լարվածություն»,- ասաց նա:

Կյուրեղյանը նշեց, որ մտահոգիչ է նաև անձնավորված տվյալների ոչնչացման երաշխավորության հարցը: «Արդյո՞ք կարող է վստահություն լինել այդ հարցում, եթե ամեն օր հանդիպում ենք կոռուպցիայի դեմ պայքարի անվան տակ հեռախոսային գաղտնալսումների փաստերի: Բոլորովին այլ բան է, եթե նախագիծը ենթադրեր միայն հեռախոսի միջոցով անձանց տեղաբաշխման ֆիքսում: Բացի այդ արդեն ունենք 500-ին մոտ դեպքեր և առաջարկվող միջոցն արդեն ժամանակավրեպ է»,- շեշտեց բանախոսը և հավելեց.

«Ես չեմ կարողանում հասկանալ կապը հեռախոսազրույցի տևողության, ժամանակի, հեռախոսազրույցի երկու կողմերի տեղաբաշխման մասին ինֆորմացիայի տիրապետման և վարակի տարածման կանխարգելման միջև: Նման կապ որոնելն անտրամաբանական է»:

Նա նշեց, որ այս միջոցը կա՛մ ընդամենը գործ անելու տպավորություն թողնելու նպատակ ունի, կա՛մ այլ նպատակ, որի մասին չի բարձրաձայնվում: Երկու դեպքում էլ, մտահոգվելու բան ունենք:

«Նախագծի իրացումը ենթադրում է նախ մեծ ֆինանսական ծախսեր: Խոստացել են սմարթֆոններ տրամադրել նրանց, ովքեր չունեն: Պատկերացնում եք, չէ՞, թե քանի մարդ կարող է իրականում չունենալ, և քանիսը կհայտարարի, որ չունի: Նախ պետք է ճշտել այդ ցանկը, ձեռք բերել անհրաժեշտ քանակությամբ սմարթֆոն. ի՞նչ մեխանիզմով և ումի՞ց, սա էլ պակաս կարևոր հարց չէ, հետո նրանց տրամադրել սմարթֆոններ: Այդ ամենն արդյունքում մեծ թվով ուղղակի շփումներ է ենթադրում: Դա նման է այն դեպքին, երբ մեր վարչապետի կինը փողոցում ձեռքով, նույնիսկ առանց ձեռնոցների, թղթային տարբերակով բնակիչներին բաժանում էր տպագրված նյութեր այն մասին, թե ինչպես պետք է պահպանել համաճարակից պաշտպանվելու կանոնները»,- ասաց նա:

Անդրադառնալով ծրագրային ապահովման ծախսերին՝ նա նշեց. «Այդքան ժամանակ և այդքան ֆինանսական միջոցնե՞ր: Այսօր յուրաքանչյուր վայրկյանի և յուրաքանչյուր լումայի արդյունավետ օգտագորումը խիստ կարևոր է մեր երկրի համար, ուստի, համաճարակի տարածման կանխարգելման ավելի անարդյունավետ ճանապարհ հնարավոր չէր մշակել»:

Դիմելով կառավարությանը՝ Կյուրեղյանն ասաց, որ նրանք պետք է ուսումնասիրեն խորհրդարանական ընդդիմության և արտախորհրդարանական տարբեր ուժերի, անհատների, կազմակերպությունների կողմից ներկայացրած առաջարկությունները, ընտրեն դրանցից արդյունավետներն ու իրատեսականները, դրանք քննարկեն հենց այդ ուժերի հետ և սկսեն օր առաջ կյանքի կոչել այդ ամենը:

«ՀՅ Դաշնակցությունն օրեր առաջ կառավարությանն է ներկայացրել համավարակի պայմաններում արտակարգ դրության ապահովման և դրանից բխող հակաճգնաժամային կառավարման վերաբերյալ առաջարկությունների ամբողջական փաթեթ: Դրանցից որոշները սկսվել են կյանքի կոչվել, որոշները՝ բարձրաձայնվել, իհարկե, չնշելով, որ դրանք Դաշնակցության առաջարկներն են, թեև կարևորը դրանց իրականացումն է: Հարգելի կառավարություն, մի խուսափեք փորձառուների առաջարկները լսելուց, նրանց հետ քննարկումներից, նրանց առաջարկներից: Վտանգի առաջ մեր բոլորի երկիրն է, հայրենիքը, մենք՝ բոլորս»,-եզրափակեց նա: