«Գյուղատնտեսությունը եկամտով է ապահովում հարյուր հազարավոր մարդկանց, այն նաև պարենային ապահովության հիմնական երաշխավորն է, սակայն, առաջարկվող միջոցառումները բավարար չեն, իսկ որոշ դեպքերում կարող են նաև ռիսկեր պարունակել»,-ասաց Խաչատրյանը:

Անդրադառնալով Կառավարության որոշմանը՝ զրոյացնել գյուղատնտեսական վարկերի տոկոսները, Խաչատրյանն ասաց, թե Կառավարության կողմից վերանայված ծրագրերի կատարողականը դեռ անցած տարի բավականաչափ ցածր է եղել, հետևաբար առաջնահերթ պետք է հասկանալ, թե ի՞նչն է դրա պատճառը, և եթե խնդիրը ոչ ձեռնտու տոկոսադրույքով վարկերի տրամադրումն էր, ինչի պատճառով գյուղատնտեսները խուսափում էին վարկ վերցնել, ապա այդ դեպքում կարելի էր մտածել վարկերի տոկոսադրույքներն իջեցնելու մասին:

«Սակայն եթե պատճառն ավելի լուրջ է, ապա միայն վարկի տոկոսադրույքները զրոյացնելով որևէ էական արդյունք չի գրանցվի: Կարևոր է հասկանալ՝ արդյո՞ք գումարի պակասը այսօր գյուղատնտեսության առջև ծառացած հիմնական խնդիրն է: Այժմ բազմաթիվ տնտեսվարողների արգելվում է մթերքի արտահանում անել, և այս պայմաններում պետությունը պետք է երաշխավորի, որ կգնի գյուղմթերքը, մասնավորապես՝ հացահատիկն և հատիկաընդեղենային մշակաբույսերը, կարտոֆիլը: Նշված մշակաբույսերի համար, պետության կողմից երաշխավորված գնման դեպքում, պետք է գարնանացանի ոռոգման ջուրը, պարարտանյութը և սերմերը տրամադրել անհատույց»,-ասաց նա՝ ընդծելով նաև, որ ժամանակն անցնում է, և եթե գարնանացանի ընթացքը բաց թողնվի, հետևանքները կարող են ողբալի լինել:

Նրա գնահատմամբ՝ շուկա պարզապես փող մտցնելով և բոլոր տեսակի բնամթերքների արտադրությունը խրախուսելով հնարավոր է նույնիսկ վտանգավոր հետևանքներ առաջացում: «Որոշ բնամթերքներ մենք ավելի շատ ենք արտադրում, քան կարող ենք երկրում սպառել, իսկ այսօր, երբ մարդկանց ու բեռների շարժը սահմանափակված է անորոշ ժամանակով, մեր արտահանումներին էական վտանգ է սպառնում: Ավել արտադրելով, հնարավոր է, չկարողանանք ամբողջ մթերքը վաճառել ո՛չ ներքին, ո՛չ արտաքին շուկաներում: Այդ դեպքում գյուղատնտեսը կկանգնի և՛ չվաճառված բերքի, և վարկը մարելու խնդրի առջև»,-ասաց Արթուր Խաչատրյանը: