«Մենք մեր ազգաբնակչությանը պետք է պատրաստենք, որ այս տարի ունենալու ենք լուրջ ֆինանսատնտեսական ճգնաժամ, և զուտ մեկ ամիս մարդկանց գումար տալով՝ այս տարվա խնդիրները չեն լուծվելու: Այս տարի նույնիսկ կարող են կասկածի տակ դրվեն պետբյուջեով նախատեսված մի շարք ծրագրեր: Մենք ուզում ենք արդեն մայիս ամսին մեր գումարները բաժանե՞լ, իսկ հաջորդ ամիսներին ի՞նչ ենք անելու: Ամեն ամիս հո չե՞նք կարող 100 միլիարդ գումար գտնել: 300 միլիարդի պահոցը մեր սև օրվա գումարն է, իսկ սև օրերը դեռ չեն եկել: Դրանք դեռ առջևում են, մենք նախատեսել ենք 142 միլիարդ դրամի լրացուցիչ վարկեր վերցնել: Մենք այս տարի հարկերի թերհավաքագրում ենք ունենալու, և գումարների մի մասը գնալու է թերհավաքգրված հարկերի փակմանը:

Այնպես որ, նման կարճաժամկետ և պոպուլիստական մոտեցումներով տնտեսությունն ուղղակի կարելի է քանդել: Խորհուրդ կտամ, որ պարոն Մարուքյանը ձեռնպահ մնա նման պոպուլիստական խոստումներից», – ասաց տնտեագետը:

Սուրեն Պարսյանի խոսքով՝ եթե, օրինակ, որևէ գյուղացու պետությունը 100 հազար դրամ օգնություն տրամադրի՝ իր տնտեսությունը զարգացնելու համար, առավել հավանական է, որ ստեղծված իրավիճակում նա ստացած գումարը ծախսի կենցաղային նպատակներով: Այդ է պատճառը, որ պետք է ավելի երկարաժամկետ ծրագրեր մշակել, մարդկանց ոչ թե ձուկ, այլ կարթ տալ:

«Սա է փիլիսոփայությունը: Եթե մեկ ամիս քաղաքացուն 100 հազար դրամ տանք, նա մեկ ամսում այդ գումարը կուտի-կվերջացնի, հետո՞: Ինչ վերաբերում է կենսաթոշակառուներին ևս գումարներ տրամադրելուն, ապա պետք է հիշել, որ տարեցները բնակվում են ընտանիքներում: Ստացվում է՝ մեկ ընտանիք կարող է ստանալ 200 հազար դրամ, իսկ միայնակ ապրող որևէ թոշակառու՝ 100 հազար», – նկատեց տնտեսագետը։