Ընտրություն պետք է կատարել ոչ թե ոգևորության ալիքի վրա, այլ սթափ մտքով
05 Դեկտեմբեր 2018 Yerkir.am-ի զրուցակիցն է 1990-ից ՀՅԴ անդամ, ազատամարտիկ, բժիշկ Սոկրատ Հախվերդյանը: Նա ՀՅԴ վարկանիշային ցուցակով պատգամավորության թեկնածու է առաջադրվել թիվ 5 ընտրատեղամասում:-Պարո´ն Հախվերդյան, ի՞նչ խնդիրներ եք բարձրացնելու, եթե ընտրվեք ԱԺ պատգամավոր:
-Մերօրյա քաղաքական իրավիճակում հատկապես կարևորում եմ ազատագրված Արցախի խնդրին հետամուտ լինելը՝ ԶԱՐԳԱՆԱԼ, ՀԶՈՐԱՆԱԼ` ԱՌԱՆՑ ԶԻՋԵԼՈՒ: Ցավոք, կարիք ունենք ազգային արժեքների պաշտպանության: Նաև չափազանց կարևորում եմ սոցիալական արդարության հաստատմանն ուղղված օրենսդրական գործունեությունը:
-Ինչո՞ւ է անհրաժեշտ, որ ՀՅԴ-ն անպայման ներկայացված լինի օրենսդիր մարմնում:
- Վերը նշված խնդիրները Դաշնակցության ծրագրային դրույթներ են: Բնականաբար, օրենսդիր մարմնում ազգային ազատագրական պայքարի բովով անցած, աշխարհասփյուռ, ազգային գաղութներում հայապահպանության բազմամյա փորձ ունեցող, ընկերվարական կուսակցության ներկայությունը պարտադիր է, քանի որ կարող է գործուն մասնակցություն ունենալ երկրի համար կենսական նշանակություն ունեցող խնդիրների լուծման գործում: Օրինակ` կարևորագույն հարց եմ համարում երկու հայկական պետությունների անվտանգությունը: Դաշնակցության նվիրումն այս հարցին չեն համարձակվում վիճարկել նույնիսկ մոլի հակադաշնակցականները:
Հիմնահարց է երկրի տնտեսության զարգացումը, տնտեսության դիվերսիֆիկացումը, գիտության ժամանակակից նվաճումների վրա հիմնված գյուղատնտեսության և արդյունաբերության զարգացումը: Հատուկ հոգածություն է պահանջում ռազմական արդյունաբերության զարգացումը, ինչը խթանելու է այլ տնտեսական ուղղությունների ծավալումն ու զարգացումը:
Սոցիալական արդարության վերականգնման լուրջ հարց եմ համարում «Կուտակային կենսաթոշակների մասին» ՀՀ օրենքի չեղարկումը և սերունդների համերաշխությունը վերականգնող կենսաթոշակային համակարգի մասին նոր օրենքի մշակումը:
Կենսական կարևոր խնդիր եմ համարում գյուղմթերք և արդյունաբերական ապրանքներ արտադրողների օրենսդրական պաշտպանության հարցը:
-Ինչպե՞ս եք պատկերացնում Դաշնակցության փոխհարաբերություններն այլ քաղաքական ուժերի հետ, մասնավորապես` խորհրդարանական գործունեության ընթացքում:
– Այլ քաղաքական ուժերի հետ համագործակցությունը հնարավոր եմ համարում մեր կուսակցության հավատամքին և տեսլականին համապատասխան հարցերի շուրջ: Ցանկացած կառուցողական առաջարկ, ուղղված Հայաստանի և հայության բարօրությանը, կարող է դառնալ քննարկման առարկա:
-Այսօր ՀՅԴ-ի հասցեին տարբեր կողմերից հնչում են քննադատություններ, ինչպե՞ս եք վերաբերվում դրանց, ինչպե՞ս եք գնահատում այս երեւույթը:
– Դաշնակցությունը ստեղծման օրվանից եղել է անբարյացակամ անձանց ու կազմակերպությունների թիրախ, քչերն են այդ գործին լծվել թյուրիմացաբար: Ոմանք իրենց անբարյացակամությունը, երբեմն վայրահաչությունն արտահայտում են` անընդունելի համարելով ազգային գաղափարախոսությունը: Այս մասը, հիմնականում, գտնվում է արտաքին ուժերի ազդեցության տակ: Վերը նշվածը չի նշանակում, որ մենք մեր գործունեության ընթացքում չենք ունեցել սխալներ, ի վերջո, չի սխալվում միայն անբանը, ոչինչ չանողը: Բայց ցեխ շպրտողներին հիշեցնեմ, որ ցեխը շպրտողին է կեղտոտում: Կա ևս մի հանգամանք՝ մեր ընդդիմախոսներին անհանգստացնում է այն հանգամանքը, որ Դաշնակցությունը ամենակազմակերպված կուսակցություններից է, եթե ոչ` ամենափորձառուն ու կազմակերպվածը:
-Հաշվի առնելով երկրում առկա իրավիճակը` հեղափոխություն, հետհեղափոխական էյֆորիա, դժվար չի՞ լինի ընտրողի կողմնորոշումը:
– Մեր քաղաքացիներին մաղթում եմ բարեկեցիկ Հայրենիք, որտեղից արտագաղթելու մասին միտք անգամ չի կարող ծագել: Այս ապագան ունենալու համար պետք է կատարել ճիշտ ընտրություն, ոչ թե ոգևորության ալիքի վրա, այլ սառը, սթափ մտքով` բաղդատելով յուրաքանչյուր քաղաքական ուժի որդեգրած արժեքներն ու նպատակները:
Մ.Մ.
