Պարզ է, որ Անգարայի կողմէ կրօնական հանգամանքի շահարկումը համատարած ռազմավարական կէտ է: Իսլամական աշխարհը համախմբելու եւ սիւննիական տարբեր վարչակարգերու հետ մրցակցելու իր պետական քաղաքականութեան մէջ քրիստոնեայ հայեր-իսլամ թուրքեր կամ ընդհանրապէս իսլամներ հակադրութեան սուր շեշտեր կը տրուին:

Այստեղ զգայնութիւն ցոյց կու տան Լիբանանի քրիստոնեայ համայնքները: Կը յիշուին ո՛չ միայն հայերու, այլ նաեւ ասորիներու, քաղդէացիներու, յոյներու կրած տառապանքները: Նոր ռազմավարութիւն կը վերամշակուի Լիբանանի սովամահութիւնը կանխամտածուած ցեղասպանութիւն նկատելու ուղղութեամբ:

Զուտ քրիստոնեայ Լիբանանին կողմէ նման առաջադրանքներու ընդգծումները կրնան անուղղակիօրէն սատարած ըլլալ Անգարայի թելադրած խաղի կանոններու որդեգրման ծուղակին: Լիբանանը իր բոլոր համայնքներով զոհ գացած է Օսմանեան կայսրութեան ցեղապաշտական եւ համաթրքացման քաղաքականութեան եւ մայիս 6-ը այդ բոլորի ամէնէն խօսուն վկայաթուականն է:

Այս խորհուրդի վերաիմաստաւորման խնդիրն է, որ պիտի դնեն լիբանանեան բոլոր կողմերը: Այդ առումով ՀՅԴ-Փաղանգաւոր կուսակցութիւն միացեալ օրինագիծի առաջադրումը անպայման պէտք է ստանայ համալիբանանեան համաձայնութիւն եւ դառնայ համայն Լիբանանի կողմէ յարգուող յիշատակի պաշտօնական օրուան վաւերացում:

Մայիս 6-ի խորհուրդի վերաիմաստաւորման եւ ապրիլ 24-ի յիշատակի օրուան համայն Լիբանանի կողմէ ընդունման հիմք կը ծառայէ Լիբանանի խորհրդարանին կողմէ Հայոց ցեղասպանութեան ճանաչման եւ դատապարտման բանաձեւը:

Մայիս 6-ի վերականգնումը կը շրջէ Անգարայի ճշդած խաղի կանոնները եւ կը նախանշէ Թուրքիոյ կողմէ գործադրուած տարբեր ժողովուրդներու ցեղասպանական քաղաքականութեան շարքի համալրումը:

aztagdaily.com