Նա մեջբերեց ՀՀ Սահմանադրության 83 և 86-րդ հոդվածները, որոնք հստակ ամրագրում են, որ երկիրը պիտի ունենա պետական աջակցություն բազմազավակ ընտանիքներին: «Դա իմ ցանկությունը չէ, ոչ էլ այսօր Հայաստանում ապրող բազմազավակ մոտ 15 ընտանիքների ցանկությունն է, այլ Սահմանադրության պահանջն է, որ օրվա կառավարությունները՝ հերթական կամ արտահերթ, պետք է տրամադրեն այդ աջակցությունը, որը պիտի ամրագրված լինի օրենքով, պետական բյուջեում հստակ գումարներ պիտի նախատեսված լինեն, այդ ընտանիքները պիտի ունենան արտոնություններ, և, վերջին հաշվով, նաև բազմազավակ ընտանիքի մոդելն է, որ բերելու է ծնելիության ավելացման»,- ասաց մեր զրուցակիցը:

Թադևոս Ավետիսյանը նշեց, որ, 2 երեխա ունենալով, վերատադրությունը չի ապահովվում. նաև այդ պատճառով է, որ մեր երկրում ծնելիությունը նվազել է: Սա հաշվի առնելով էլ՝ պետք է խրախուսել ոչ թե 2-րդ, այլ 3-րդ երեխայի ծնունդը:

«Մենք այս տարվա առաջին 6 ամիսներին ունեցել ենք մոտ 16 հազար ծնվածներ. թիվը մոտավորապես 150-160-ով պակաս է, քան նախորդ տարվա 6 ամիսներին: Մահացածների թիվը 500-600-ով ավելացել է: Բնակչության թիվը նվազել է 8 200-ով՝ համեմատած նախորդ տարվա նույն ժամանակահատվածի հետ. նախորդ վատ տարվա, վատ իշխանությունների, վատ Հայաստանի համեմատ՝ այդ նույն ցուցանիշները վատացել են, հիմա սրանք պիտի բացատրվե՞ն, թե՞ ոչ»,- ասաց Թադևոս Ավետիսյանը:

Նրա համոզմամբ՝ միանվագ գումար վճարելով՝ լինի 50, թե 150 հազար, չափը այնքան տարբեր չէ, որ ազդի մարդկանց որոշումների վրա:

«Գործող իշխանություններն անցած տարի բարեփոխում բերեցին՝ երկրորդ երեխայի ծնվելու համար վճարվող միանվագ նպաստը 50 հազարից դարձրին 150 հազար, կառավարության մի ամբողջ նիստ նվիրեցին դրան, անունը դրեցին՝ դարակազմիկ փոփոխություն: Այն ժամանակ էլ մենք մտահոգություն էինք հայտնում, որ պետական բյուջեից այս լրացուցիչ ծախսը անելով՝ լրացուցիչ արդյունք չեք ստեղծելու, դրա փոխարեն կան այլ ուղղություններ. դուք պիտի թիրախավորեք երրորդ երեխան, երրորդ երեխան է, որ ավելացնելու է մեր բնակչության թիվը: Վերջապես, առաջին և երկրորդ երեխաների թիվը շատ ավելի անխոչընդոտ է լինում և երրոդ երեխան պիտի խրախուսվի»,-ընդգծեց տնտեսագետը:

ՄԱԿ-ի բնակչության հիմնադրամի կանխատեսումները, նրա խոսքով, շատ ավելի վատն են. լավագույն ակնկալիքներով՝ 2050 թ-ին 2,5 միլիոն մարդ կարող է լինել Հայաստանում. «Եվ այդ կանխատեսումները եթե մենք ուզում ենք փոխել, նշանակում է, որ առաջանցիկ այս ցուցանիշները պիտի բարելավենք»:

Տնտեսագետը հիշեցնում է, որ վարչապետն կառավարության ծրագրում գրել էր, որ 2040-ին ունենալու ենք 6 միլիոն բնակչություն, մինչդեռ հիմա եւս 10 տարի երկարացրել են ժամանակը և 1 միլիոնով իջեցրել թիրախը՝ 2050-ին՝ 5 միլիոն. «Իհարկե, այս տեմպերով եթե գնանք, 2 ու կես միլիոն կդառնանք. եթե իհարկե օրվա իշխանությունները, Աստված չանի, շարունակեն մնալ մինչև 2050 թվականը»:

Մանրամասները՝ տեսանյութում:

https://youtu.be/v7NOWtqSLXU

Վարչապետը մանիպուլացնում է թվերը՝ 60 հազարը նոր աշխատատեղեր չեն և չունեն սոցիալական ազդեցություն

Մենք ունենք ընդամենը 6,8 տոկոս տնտեսական ակտիվության ցուցանիշ՝ նախորդ տարվա 9,1 տոկոսի փոխարեն՝ մտահոգություն հայտնեց Թադևոս Ավետիսյանը:

«Դրական է ցանկացած աճ, բայց չի կարելի մանիպուլացնել վիճակագրական թվերը: Բոլորս ուզում ենք, որ մեր երկիրը դրական զարգացում ունենա և ունենանք սոցիալական խնդիրների լուծումներ, բայց 2018 թ-ին նախորդ կառավարությունը, որին մերժեց մեր ժողովուրդը և հույս ուներ, որ ավելի արագ պիտի զարգանանք, ավելի ներառական լինենք, տնտեսական զարգացումը բոլորին պիտի վերաբերվի, պետք է ստվերը կրճատվի, պետության եկամուտներն ավելանան, թոշակներն ավելանան և այլն, փաստերը հակառակն են վկայում»,-նշեց տնտեսագետը:

Նա բացատրեց, որ տնտեսական ակտիվությունը կարևոր է, որ գործազուրկների համար նոր աշխատատեղեր ստեղծվեն, մարդը գնա՝ աշխատի, իր քրտինքով ընտանիքը պահի: Բայց, այս պարագայում պատկերն այլ է. «Կա տնտեսական ակտիվության ցուցանիշ, վարչապետն էլ տարեսկզբին ասում էր, որ 2018 թ-ին 60 հազարով ավելացել է վարձու աշխատողների թիվը: Հետո, մենք հակափաստարկներ էինք բերում, որ այդ 60 հազարը նոր աշխատատեղեր չեն, դրանք ստվերից դուրս եկած աշխատատեղեր են: Դրանք, իհարկե, դրական են այն առումով, որ ստվերը կրճատվում է, բայց չունեն սոցիալական ազդեցություն»:

Տնտեսագետը ասվածը հիմնավորեց թվերով. 2019 թ.-ի առաջին 7 ամիսներին 16 հազարով ավելացել է գործազուրկների թիվը՝ 234 հազարից դառնալով 250 հազար: Գործազրկության մակարդակը 21 տոկոսից դարձել է 22 տոկոս: Այսինքն, շարունակում է չլուծված մնալ ներառական զարգացման խնդիրը:

Նա նաև նկատեց, որ ստվերի կրճատումը նոր իշխանություններին վերագրելը ճիշտ չէ, քանի որ դա նախկինում սկսված գործընթաց է՝ նշված 60 հազարից 40 հազար աշխատատեղը օրինական դաշտ են եկել 2018-ի առաջին 4 ամիսներին, երբ դեռ իշխանափոխություն չէր եղել:

Թադևոս Ավետիսյանը հիշեցրեց իշխանությունների խոստումը Հայաստանի ՀՆԱ-ն յոթնապատկելու և այս տարվանից երկնիշ տնտեսական աճ ունենալու մասին. «Խոսում է, որ մրգային գինիների արտահանումը աճել է 40 տոկոսով: Լավ է, որ աճել է, բայց մրգային գինիները մեր արտահանման մեջ ի՞նչ տեսակարար կշիռ ունեն՝ 1 տոկոսի չեն հասնում»:

Արտահանումը 2019 թ-ի առաջին 6 ամիսներին 0,5 տոկոսային կետով նվազել է, այն դեպքում, որ 2018-ի նույն ժամանակահատվածում ունեցել ենք 25 տոկոս աճ. տնտեսագետը սա բացատրում է արտահանման խարխուսման ոլորտում ոչ համաչափ բարեփոխումներով, տնտեսական ռիսկով, քաղաքական անկայունությամբ:

Լուծումների մասին՝ տեսանյութում

https://youtu.be/Bd5AwRdZPqc