Իշխան Սաղաթելյանը՝ ամփոփելով իշխանափոխությունից հետո 1,5 տարիները, արձանագրեց, որ այն սպասումները, որ հասարակությունն ուներ նոր ձևավորվող իշխանությունից, դեռ չեն իրականացել և գնալով, ցավալիորեն, պակասում են հույսերը, որ առաջիկայում կիրականանան:

«Ինչո՞ւ, որովհետև նոր իշխանությունը, փոխանակ ազգային կարևոր օրակարգեր առաջ բերելու, որի շուրջ հայ ժողովուրդը կհամախմբվեր, հայ ժողովրդի համահայկական ռեսուրսը այդ խնդիրների լուծմանն ի նպաստ դնելու, սկսեց հասարակությանը բաժանել սևերի և սպիտակների, հեղափոխականների և հակահեղափոխականների և երկրում իրական համակարգային բարեփոխումներ անելու փոխարեն երկիրը շարունակեց պահել անցյալում»,-ասաց նա:

Երկրի հիմնական օրակարգերին անդրադառնալով՝ Սաղաթելյան ասաց, որ դատական համակարգը բարեփոխելու անվան տակ տեղի են ունենում գործընթացներ, որոնք Դաշնակցության համար անընդունելի են, քանի որ այդ անվան տակ փորձում են յուրացնել դատարանները. «Հիմա էլ քննարկում են ՍԴ նախագահի լիազորությունները դադարեցնելու հարցը, որը մեզ համար անընդունելի է: ՍԴ-ն այս ճանապարհով տապալելը կեղծ օրակարգ է, քանի որ մղումը իրական բարեփոխումները չեն, այլ սեփական դատական համակարգ ունենալը»:

ՀՅԴ-ն, նրա խոսքով, խնդիրները բարձրաձայնելով, դրանց լուծման ճիշտ ճանապարհը ցույց տալով՝ նպաստելու է, որ այդ խնդիրները լուծվեն: Նույն՝ իշխանությունների զգոնանալու, նպատակին էին ուղղված նաև «Լրջացեք»-ի և «Դեղին քարտերի» ակցիաները:

«Մենք ոչ միայն քննադատել ենք, այլև հստակ թղթածրարներ ենք պատրաստել, առաջարկել ենք լուծման տարբերակներ, ցույց ենք տվել ուղղություններ: Դժբախտաբար, իշխանությունը շարունակում է ձախողել»,-ասաց ՀՅԴ ԳՄ ներկայացուցիչը:

Դաշնակցությունը խնդիրները բարձրաձայնել է լուծման ակնկալիքով, քանի որ գտնում է, որ իշխանությունից սպասումներն այնքան մեծ են եղել, որ հիասթափությունը արտագաղթի պատճառ կարող է դառնալ:

ՀՅԴ-ի ու ժողովրդի միջև առաջացած անջրպետի մասին Իշխան Սաղաթելյանն ասաց, որ ժամանակի ընթացքում ժողովուրդը հստակ տարբերությունը կտեսնի պոպուլիստների և գործ անողների միջև և էյֆորիան անցնելուց հետո գնահատական կտա:

«Անցնող ժամանակահատվածում հսկայական աշխատանք ենք արել հայրենիքում և աշխարհում, բայց չենք կարողացել մեր ժողովրդին դա պատշաճ ներկայացնել, այդ է եղել պատճառը, որ ընտրություններին 5-6-7 տոկոս քվե տալով՝ ժողովուրդը մեզանից ունեցել է մեծ ակնկալիքներ, մեծ սպասումներ»,-ընդգծեց նա:

Սխալներ ևս եղել են, որոնք ՀՅԴ-ն քննարկել է հաշվետու ժողովների ընթացքում և հիմա, Իշխան Սաղաթելյանի խոսքով, ավելի բաց ճակատով է ժողովրդի հետ աշխատում:

«Բայց երբեք Դաշնակցությունը չի զբաղվել պոպուլիզմով, երբեք մեր ժողովրդին չենք տվել սուտ խոստումներ՝ քվե ստանալու համար, և երբեք մեր առջև խնդիր չենք դրել դառնալ զանգվածային կուսկացություն, ինչպես շատերը, որ հայտարարել են 100-200 հազարի մասին, բայց ընտրություններին հավաքել են շատ քիչ քվե»,-ասաց նա:

Դաշնակցության կայուն գաղափարական ընտրազանգվածը եղել է կայուն, բայց ոչ բավարար՝ բարեփոխումներ իրականացնելու համար. «Հիմա մենք հետևողականորեն աշխատում ենք մեր ժողովրդի հետ՝ մեր ծրագրերը նոր մոտեցումներով, նոր մեթոդներով ներկայացնելու և մեր շուրջ համախմբում ստեղծելու համար»,-ընդգծեց Իշխան Սաղաթելյանը:

Անցյալին վերադարաձ չկա, որովհետև ժողովուրդը դուրս է եկել դրա դեմ՝ ասաց Իշխան Սաղաթելյանը, բայց փոխարինողը դրանից վատը չպետք է լինի:

Իշխող ուժի՝ «-իզմեր» չունենալու հայտարարությունը, նրա համոզմամբ՝ գաղափախոսություն և արածի համար պատասխանատվություն չունենալու համազոր խոսք է. «Իշխանությունը տառապում է փորձառու, պատրաստված, գրագետ կադրային բազայի բացակայությամբ»:

Արցախի հարցում Դաշնակցության դիրքորոշումն է, որ ազգի պառակտումը, ժողովրդին մասնատումը, նոր բաժանարար գծեր առաջ բերելը ընդունելի չեն, մինչդեռ այդպիսի կոչեր հնչում են հիմնականում Հայաստանից:

«Իշխանությունը խրախուսում է հայ ավանդական արժեքների, եկեղեցու, ընտանիքի դեմ արշավանքը, որովհետև իշխանության ներսում ապազգային զանգված կա, իսկ իշխանությունը ոչ միայն դրա դեմը չի առնում, այլև խրախուսում է: Նաև փորձում են դա ամրագրել կոնվենցիաներով, լավագույնը՝ Ստամբուլյան կոնվենցիան է, որն ընդունելու գործընթացում, հանդիպելով ժողովրդի դիմադրությանը, հետ են քաշվել: Որքան փորձեն՝ այդ վտանգը մեզ չի սպառնում, քանի որ կան Դաշնակցության նման առողջ ուժեր, որոնք պայքարելու են դրանց դեմ»,-ասաց Իշխան Սաղաթելյանը:

Սփյուռքի նախարարության վերացումը ևս ՀՅԴ-ի համար անընդունելի է եղել: Դաշնակցությունն առաջարկել է, եթե անգամ մտադիր են դա փոխարինել հանձնակատարով, գոնե հանձնակատարը պետք է ունենա կարգավիճակ՝ առնվազն փոխվարչապետի պաշտոն, որպեսզի լայն լիազորություններով կարողանա կարգավորել խնդիրները:

«Մենք լսեցինք նաև հեղափոխությունը Սփյուռք տեղափոխելու կոչեր: Սփյուռքը վաղուց իր հեղափոխությունն արել է՝ իր մշակութային կետրոններով և այլն: Նման հայտարարություններ անողները, հավանաբար, չեն ճանաչում Սփյուռքը»,-ընդգծեց ՀՅԴ Հայաստանի ԳՄ ներկայացուցիչ Իշխան Սաղաթելյանը:

ՀՅԴ Հայաստանի ԳՄ նախագահ Սիմոն Սիմոնյանը նեկայացրեց, որ երբ Դաշնակցությունը ականատես եղավ Սփյուռքի նախարարության լուծարմանը, կազմակերպեց հանձնախումբ, որը կզբաղվի հայրենադարձների խնդիրները կարգավորելով, կդիմավորի նրանց հայրենիքում և գործուն քայլեր կկատարի նրանց ինտեգրման ուղղությամբ: Դաշնակցությունը նոր իրողությունների պայմաններում աշխատում է մասնագիտական 12 հանձնաժողովներով, որոնք տարբեր ոլորտնեորւմ իրենց տեսակետն են մշակում և մոտ 300 էջ փաստագրված մասնագիտական կարծիք ունի, որը տարածվել է տարբեր լրատվամիջոցներով: Այս հարցում ՀՅԴ-ն օգտագործում է նաև Սփյուռքի կառույցի հնարավորությունները:

«Սա կարող է նոր մոդել լինել ապագա կառավարման ժամանակ. եթե օրերից մի օր Դաշնակցությունը հասնի իշխանության, այդ մոդելը կարող ենք ցույց տալ»,-ասաց Սիմոն Սիմոնյանը:

Իշխանությունները, նրա համոզմամբ, անփորձ են նաև Սփյուռքի հետ աշխատանքի հարցում. Գաղթօջախները տարբեր են և բոլորի հետ աշխատելու լավագույն փորձն ունեն Դաշնակցությունն ու Հայոց կաթողիկոսարանը: Մինչդեռ ներկա իշխանությունները, Սիմոն Սիմոնյանի խոսքով, երբ Սփյուռքում հեղափոխության կոչեր են անում, ալեկոծում են բոլորին:

«Դաշնակցական գործիչները, հատկապես Հայաստանից դուրս գալով, երկրի ներքին խնդիրները բացելու խնդիր չունեն, միասնականության կոչեր են անում: Բայց իշխանությունները անփորձ են, անում են հայտարարություններ, որ միասնականությանը հարվածում է»,-մտահոգություն հայտնեց նա:

Սիմոն Սիմոնյանն ընդգծեց, որ «անցյալի բարքերին վերադարձ չկա» համոզումը վերաբերում է նախկին բոլոր՝ 3 նախագահների ժամանակշրջանին, մինչդեռ, դժբախտաբար, իշխանության մեջ այսօր կա որոշ խավ, որն անցյալի անցյալի անցյալից է:

https://youtu.be/ZvD83_KP11Y