Երբ դիվանագիտությունը չի աշխատում, աշխատում են թնդանոթները
07 Հոկտեմբեր 2019 Սահմանին իրավիճակից մենք պետք է հետևություն անենք, մտահոգիչ է 3 օրում 1 զոհ, 3 վիրավոր ունենալը: Այս մասին Tert.am-ի հետ զրույցում ասաց ՀՅԴ Ազատամարտիկների հարցերով հանձնախմբի ղեկավար, ԶՈւ ԳՇ կազմզորահավաքային վարչության պետի նախկին տեղակալ Արտաշես Մխիթարյանը:«Մանավանդ, որ իրավիճակը սրվեց վարչապետի հայտարարությունից հետո, դրան պատասխանեց Ալիևը․ մենք պետք է հետևություններ անենք, որ Ադրբեջանի հռետորաբանությունը չի փոխվել: Վարչապետ Նիկոլ Փաշինյանի ասած բանաձևն այն մասին, որ Ղարաբաղյան խնդրի կարգավորումը պետք է ընդունելի լինի թե՛ Ադրբեջանի, թե՛ Հայաստանի, թե՛ Լեռնային Ղարաբաղի ժողովուրդների համար, անիմաստ է, քանի որ պարզ է՝ Ադրբեջանը միշտ էլ ձգտելու է իրեն ենթարկեցնել Արցախը»,-ընդգծեց Արտաշես Մխիթարյանը:
Պահեստազորի գնդապետը նշեց, որ Ադրբեջանն այժմ դիմում է սադրանքների, սակայն հանկարծակիի չգալու համար պետք է պատրաստ լինենք պատերազմի:
«Պետք է այնպես անենք, որ պատերազմը սկսի և ավարտվի հակառակորդի տարածքում: Դիվանագիտությունը կաղում է, խնդրի լուծումը տեղափոխվում է ռազմական տիրույթ: Ստացվում է՝ երբ դիվանգիտությունը չի աշխատում, աշխատում են թնդանոթները: Սադրանքներով հրահրում են ավելի կոշտ լուծումների, որպեսզի հետո միջազգային հանարության առաջ, կոպիտ ասած, մաքուր դուրս գան: Մենք ազգովի պետք է պատրաստ լինենք ազգովի, բանակը հզորացնենք, բանակի հզորցման համար ներդնենք մեր ամբողջ ներուժը: Իմ կարծիքով՝ ԶՈւ Գլխավոր շտաբն այդ ուղղությամբ աշխատում է բավականին հաջող, մնում է միայն քաղաքական ղեկավարության քայլերը»,-ընդգծեց նա:
Անդրադառնալով հարցին, թե ինչո՞ւ էին օրերս ՀՅԴ պահեստազորայինները հավաք անցակացրել Բյուրականում, արդյո՞ք մտահոգություններ կան մոտակա ժամանակահատվածում սահմանին իրավիճակի առավել սրման, պատերազմական գործողությունների, Արտաշես Մխիթարյանն ասաց, որ հավաքի նպատակն անձնակազմի համալրվածությունն ստուգելու համար էր:
«Պահեստազորային այս գումարտակը՝ իբրև առանձին հրաձգային ստորաբաժանում, կազմավորվել է 2017-ին՝ ՀՀ ԶՈւ ԳՇ պետի հրամանով, ԶՈւ զորամասերից մեկում, բայց 2018-ին կազմալուծվել էր: ՊՆ Գլխավոր շտաբը կրկին առաջարկել է վերականգնել գումարտակը: Երբ գումարտակը գրանցվի, վարժանքները կներառվեն ԶՈւ պատրաստության պլանում, և պարապմունքները կկազմակերպվեն ԶՈւ կազմում և միջոցներով»-նշեց նա:
Արտաշես Մխիթարյանի խոսքով՝ գումարտակը կիրառվելու է ակտիվ մարտական գործողությունների վերսկսման դեպքում:
