– Դուք մեկնելու եք Արցախ՝ մասնակցելու «Պրո Արցախ» համաժողովին: Ինչպես եք գնահատում ինքնորոշվելու և ինքնուրույն պետություն ստեղծելու՝ Արցախի ժողովրդի կամքը:

– Մենք եկել ենք՝ ներկա գտնվելու համաժողովին Արցախում: Ես պատկանում եմ եզդի համայնքին և հպարտ եմ Արցախի ճնշված ժողովրդին պաշտպանելու համար, ինչպես մեծ պապս՝ Համմո Շեռռոն, 1915 թ.-ին Իրաքում պաշտպանեց հայերին:

Մենք պատիվ ունենք ներկա գտնվելու այս համաժողովին, որն առնչվում է ոչ միայն հայ, այլև ճնշված բոլոր ազգերին, որոնք ենթարկվել են ցեղասպանությունների, տեղահանությունների: Մենք բացարձակապես դեմ ենք ռասիզմին, մենք՝ եզդիներս, խաղաղասեր ազգ ենք, բայց դա պատճառ է դառնում, որ մեր ազգի հանդեպ ահաբեկչական գործողություններ կատարվեն:

– Ինչպե՞ս եք գնահատում Թուրքիայի գործողությունները հայ ժողովրդի հանդեպ՝ նաև զուգահեռներ տանելով եզդի ժողովրդի ճակատագրի հետ:

– 1915 թ.-ին շատ հայեր՝ Ցեղասպանությունից փրկված, հասան Իրաք: Մոտ 20 հազար հայ մեծ պապիս հովանու տակ հաստատվեց եզդիական շրջաններում, ինչի պատճառով Օսմանյան կայսրությունը ճնշումներ սկսեց նաև իմ մեծ պապի դեմ: Օսմանյան կայսրության փլուզումից հետո Իրաքի կառավարումը ստանձնեց Մեծ Բրիտանիան, և իմ մեծ պապը դարձավ իշխան ու օգնեց հայերին՝ նրանց տրամադրեց հողատարածքներ Սինջար շրջանում: Եվ ինչպես մենք օգնեցինք հայերին, նրանք էլ մեզ են օգնում. ՀՀ-ն օգնում է եզդիներին և նրանց քաջալերում: Եզդիներն էլ Թուրքիայի ձեռքով ցեղասպանություն տեսած ազգ են՝ ինչպես նախկինում, այնպես էլ ներկայում:

https://youtu.be/QvPfeNTZWTc