Սա իշխանության կռիվ չէ, այլ ազգայինը պահելու
11 Նոյեմբեր 2019 Նիկոլ Փաշինյանը խորը թյուրիմացության մեջ է, եւ այս գործընթացի խորքային պատճառը չի ըմբռնել կամ առնվազն իրեն զեկուցել են մակերեսորեն: Այս մասին, այսօր՝ նոյեմբերի 11-ին, ԿԳՄՍ նխարարության դիմաց Դաշնակցության կազմակերպած բողոքի ակցիայի ժամանակ լրագրողների հետ զրույցում նշեց ՅԴ ԳՄ անդամ Արծվիկ Մինասյանը՝ անդրադառնալով նախարար Արայիկ Հարությունյանի հրաժարականի պահանջին:Նրա խոսքով, սա պայքար է ազգային եւ ապազգային երեւույթների միջեւ. «Երկրորդ, Նիկոլ Փաշինյանը չի կարող իրեն վերագրել նախարարության գործառույթներ: Օրենքը հստակ սահմանում է, կառավարության անունից՝ ոլորտի քաղաքականությունն իրականացնում է ԿԳՄՍ նախարարությունը: Օրենքով հստակ է ձեւակերպված, թե ինչ քաղաքականություն պետք է իրականացվի, այն, ինչ իրականացնում է այս նախարարությունը՝ նախարարի գլխավորությամբ, հակասում է օրենքին: Այսինքն հակաօրինական ընթացքի մեջ է:
Երրորդ, ակնհայտ է, որ Արայիկ Հարությունյանը եւ իր խորհրդատուները, եւ եթե վարչապետն էլ միանա, ուրեմն նաեւ ինքը, ակնհայտորեն փորձում են ապակողմնորոշել այս ընդվզումը, որ առաջացավ երիտասարդության շրջանում: Այո, ՀՅԴ-ն հանդես է գալիս ազգային պահպանելու դիրքերից եւ գտնվելու է ցանկացած շարժման կողքին, որը ազգայինը դուրս մղելու գործողություն է իրականացնում»,-ասաց Արծվիկ Մինասյանը:
Արծվիկ Մինասյանը տեղեկացրեց, որ ՀՅԴ երիտասարդական կազմակերպության հայտարարությանն են միացել 20-ից ավելի երկրների երիտասարդներ. «Սա խոսում է այն մասին, որ հարցը համազգային է դարձել: Օտարածին օրակարգերը սպասարկելու փոխարեն ժողովրդի բացարձակ մեծամասնությունն ստացած ցանկացած իշխանություն պարտավոր է ազգային դիմագիծը պահել: Սա իշխանության կռիվ չէ, այլ ազգայինը պահելու: Աշխարհում մրցակցող են լինելու այն ազգերը, որոնք իրենց արմատների զուգակցմամբ են զարգանում: Եթե վարչապետ Նիկոլ Փաշինյանը, որ միշտ այդ դիրքերից է հանդես եկել, հանկարծ փոխել է իր դիրքորոշումը, ապա դա շատ վատ է: Դա նշանակում է, որ նա ժողովրդի տված քվեն օգտագործում է ի չարս»:
ՀՅԴ ԳՄ անդամը նկատեց, որ Նիկոլ Փաշինյանը եկել, փորձում էր Արայիկ Հարությունյանի ապազգային վարքագիծն իր վրա վերցնել. «Եթե իրեն թվում է, որ ինքն այնքան ժողովրդավար է, որ կարող է այդ տիպ հարցեր առաջ տանել, սխալվում է: Այդ հարցերում մեր ազգը զգայուն է եւ չի հանդուրժի անգամ հերոսին, եւ նրան էլ կտապալի, եթե տեսնի, որ սպասարկում է օտարի օրակարգը:
Հրաժարականի պահանջը դեղին քարտերի մեր քաղաքականության համատեքստում է եւ արդեն կարմիր քարտէ կոնկրետ անձի: Սա կարմիր քարտ է Արայիկ Հարությունյանին, որ հեռացվի դաշտից»,-ասաց նա:
Նիկոլ Փաշինյանն իրավունք չունի կրթության, գիտության, մշակույթի եւ սպորտի նախարարության ֆունկցիան վերցնի իր վրա կամ կառավարության վրա, նշեց Արծվիկ Մինասյանը՝ անդրադառնալով նախարար Արայիկ Հարությունյանի հրաժարականի պահանջին եւ վարչապետի այն հայտարարությանը, թե կրթության, մշակույթի ոլորտում քաղաքականության պատասխանատուն կառավարությունն է:
«Իսկ եթե Նիկոլ Փաշինյանը հայտարարում է, որ այս ապազգային օրակարգի տերն ու հեղինակն ինքն է, ուրեմն ինքն էլ պետք է հեռանա: Բայց առայժմ կա հնարավորություն, որ այդ քաղաքականությունը փոխի: Մենք չենք ուզում այս մոտեցումը սեւ ու սպիտակի բաժանել հասարակությունը, բայց եթե այդ դաշտ են մղում, պետք է բացատրեն իրենց հակազգային պահվածքը, թիրախը, ուղղորդումը որտեղից է գալիս»,-ասաց նա:
Անդրադառնալով Արայիկ Հարությունյանի հայտարարությանը, թե ՀՅԴ երիտասարդների բերած դատարկ արկղերը լցնելու է կրթության ոլորտում ՀՅԴ-ի գործունեության հետ կապված քրեական գործերով եւ հետ ուղարկի, Արծվիկ Մինասյանն ասաց. «Մենք պահանջել ենք, որ Արայիկ Հարությունյանը, եթե կան այդպիսի հանցագործություններ, ներկայացնի, հակառակ դեպքում՝ պետք է քրեական պատասխանատվության ենթարկվի սուտ մատնության համար: կամ առնվազն հասարակությունը պետք է իմանա, որ սրանք քաղաքական հնարքներ, մանիպուլյացիաներ են: Նա պարզապես օդում հայտարարություններ է անում, որպեսզի ցույց տա, թե իբր կա լուրջ բան եւ այլն»:
