Մի շարք ապրանքների մասով մենք ունենալու ենք բարձր մաքսատուրքեր
28 Նոյեմբեր 2019 ԵԱՏՄ-ում Հայաստանը 2018-ին ստացել է ավելի շատ, քան տվել է: Տրված մաքսատուրքերի և ստացածի դրական սալդոն 2018-ին կազմել է ավելի քան 37 մլն դոլար:Երևանում անցկացվող ԵԱՏՄ բարձրագույն հաշվեքննիչ մարմինների կոլեգիայի համատեղ նիստի շրջանակում այս մասին լրագրողների հետ զրույցում ասաց ՀՀ հաշվեքննիչ պալատի անդամ Արա Նռանյանը:
«Ռուսաստանի Դաշնությունն ու Բելառուսը վճարում են ավելի շատ մաքսատուրք, քան ստանում են դեպի իրենց բյուջեներ: Հայաստանի, Ղրղզստանի և Ղազախստանի դեպքում հակառակն է՝ վճարում ենք ավելի քիչ մաքսատուրք, քան ԵԱՏՄ-ից ստանում ենք: 2018-ին Հայաստանի դրական սալդոն կազմել է 37.6 մլն ԱՄՆ դոլար»,-ասաց Նռանյանը:
Նա նշեց՝ Հայաստանը 2018-ին, 2017-ի համեմատ, մոտ 25 տոկոսով ավելի է գանձել: 2019-ի տվյալների հաշվեքննությունն իրականցվելու է 2020 թվականին:
«Մեր տնտեսությունը պետք է պատրաստ լինի աշխատել նոր պայմաններում, որոհետև մի շարք ապրանքների մասով մենք ունենալու ենք բարձր մաքսատուրքեր։ Բայց մյուս կողմից սա տնտեսական քաղաքականության խնդիր է։ ԵԱՏՄ-ում գործում է այլ տնտեսական քաղաքականության փիլիսոփայություն, որը մենք ունեինք մինչև ԵԱՏՄ։ Եթե մեր մոտ մաքսատուրքերը տարիներ շարունակ հանդիսանում էին զուտ գործիք ԵԱՏՄ-ում իրենք հանդիսանում են կարգավորման գործիք։ Պետք է կարողանանք մեր տնտեսական քաղաքականությունը վերաիմաստավորենք»,- ասաց Արա Նռանյանը։
