Հակակոռուպցիոն համակարգը կայացնելու համար ամենևին պարտադիր չէ քանդել կայացած համակարգը
23 Հունվար 2020 Իշխանությունը ցանկանում է սրանով հնարավոր կոռուպցիոն գործարքները բացահայտել, կոռուպցիայի դեմ պայքարին որևէ մեկը չի կարող դեմ լինել, սակայն մենք գործ ունենք դեռևս չկայացած, հարաբերական ասված, անկախ հակակոռուպցիոն համակարգի հետ և այդ համակարգը կայացնելու համար, ամենևին պարտադիր չէ քանդել կայացած համակարգը: Այս մասին Tert.am-ի հետ զրույցում ասաց ՀՅԴ Հայաստանի Գերագույն Մարմնի Ֆինանսների հանձնախմբի նախագահ Արմեն Գրիգորյանը` անդրադառնալով Ազգային ժողովի կողմից երկրորդ ընթերցմամբ և ամբողջությամբ ընդունած «Բանկային գաղտնիքի» մասին օրենքին:Նա նկատեց, որ նախ հակակոռուպցիոն մարմինը պետք է լինի անկախ, անկողմնակալ, որի հայտարարությունն արժանահավատ լինի հանրային ընկալման տեսանկյունից: «Բանկային գաղտնիքը բանկի իմունիտետի պես բան է, այստեղ խնդիրներ կարող ենք ունենալ»,-ասաց նա:
Արմեն Գրիգորյանը ներկայացրեց, որ ընդունված օրենքի արդյունքում մի շարք միջազգային փաստաթղթերով, համաձայնագրերով ստանձնած պարտավորությունների առումով կարող են խնդիրներ ծագել, նաև Հայաստանի բանկերի և միջազգային բանկերի համագործակցության առումով:
Նա նշեց, որ բանկային գաղտնիքի մասին օրենքով արդեն սահմանված է, որ տեղեկությունն է համարվում բանկային գաղտնիք, իսկ այդ տեղեկության գաղտնիության երաշխավորը հենց բանկն է: «Հիմա այս օրենքով ասում ենք, որ բանկի իրավունքների ու պարտականությունների սահմանագիծն այստեղ ավարտվում է, և այստեղից սկսվում միջամտությունների փուլը. սա խոչընդոտ է հաճախորդի և բանկի հարաբերություններում: Հաճախորդներն սկսելու են բանկերի հետ զգուշորեն աշխատել․ կլինեն ներդրողներ, կլինեն մարդիկ որոնք ունեն ավանդներ կամ գործարքներ են անում»,-ասաց նա:
Արմեն Գրիգորյանի կարծիքով օրենքի հետևանքով կարող է անուղղակի փոխանցումների թիվը նվազել և ավելանա ուղղակի փոխանցումները, ինչն էլ իր հերթին է պարունակում կոռուպցիոն ռիսկեր: «Դրամական միջոցների արտահոսք է հնարավոր, քանի որ մարդիկ կարող են մտածել, որ մտնելու են իրենց հաշիվների մեջ և ինչ-որ բաներ անեն, որի հետևանքով կսկսեն Հայաստանից իրենց փողերը հանել»,-ասաց նա և նշեց, որ դրա համար պետք է Կենտրոնական բանկին նոր գործիքներ տալ:
«Ես չեմ կարող կռահել, թե կողմ քվեարկած պատգամավորներն ինչ են մտածում այս օրենքի վերաբերյալ, սակայն իշխանություններն այլընտրանքային կարծիքներ չեն լսում»,-հավելեց նա:
