Նա նկատեց, որ հունվարի 25-ին հրապարակված 100 փաստերում է թաքնված ամբողջ գաղտնիքը, և Նիկոլ Փաշինյանը նշել է, որ 2018թ. մայիսի համեմատ 2019թ. վերջի դրությամբ Հայաստանում ի հայտ է եկել (ստեղծվել է կամ ստվերից դուրս է եկել) 81 հազար 534 նոր աշխատատեղ: «Երբ կառավարությունը «գաղտնազերծի», քանի նոր աշխատատեղ է ստեղծվել, այդ ժամանակ էլ կիմանանք, որքան է կազմել իրական աճը, որքան է 120 մլն ավելի տպված ՀԴՄ կտրոնի արտացոլումը»,-ասաց նա:

Արթուր Խաչատրյանը նկատեց, որ տնտեսական աճ ապահովելու համար պետք է մեծացնել տնտեսության պոտենցիալը, դրա համար պետք են պետական և մասնավոր ներդրումներ: «Ցավոք, մենք տեսանք, որ 2019թ. բյուջեի կապիտալ հոդվածները թերակատարվեցին, պետությունը ձախողեց պետական ներդրումները և զարգացմանը միտված թիրախային ծրագրերը: Արտասահմանյան ներդրումներ մենք էլի չենք տեսնում, հետևաբար, առանց կարողության մեծացման հստակ քաղաքականության, ես կարծում եմ, որ այդ 8-9 տոկոսը կմնա ուղղակի՝ որպես բարի ցանկություն, ճիշտ այնպիսին, ինչպիսին 2050թ. տնտեսության 15 անգամ մեծացնելու ուտոպիան: Ավելին` ասեմ, որ մեր տնտեսության վրա էական դրական ազդեցություն ունեցան 2019թ. մեքենաների ներմուծումն ու արտահանումը, դա էլ որ «ցամաքեց», ես չգիտեմ, թե ինչպես է ապահովվելու նույնիսկ 2020թ. բյուջեով նախատեսվող 4,9 տնտեսական աճը»,-ասաց նա:

Նա նշեց, որ ամեն դեպքում, եղած տնտեսական աճը քաղաքացու վրա էական ազդեցություն չի ունեցել: «Աճի մի մասն արդեն կար: Նախկինում քաղաքացիների մի ստվար զանգված աշխատավարձի մի մասը ստանում էր կանխիկ, մի մասը՝ փոխանցումով: Հիմա այդ կանխիկը ներառել են օրինական աշխատավարձի մեջ: Սակայն ակնկալվող գազի գների բարձրացումը, ինչպես նաև հունվարի մեկից ուժի մեջ մտած ԵԱՏՄ կարգավորումները, կբերեն գների աճի: Հիմա ինչ-որ «փորձագետներ» համարում են, որ դա կունենա ընդամենը կես տոկոսի աճի ազդեցություն, սակայն, եթե հաշվի առնենք, որ մեր հայրենակիցների զգալի մասը սոցիալապես ծանր պայմաններում է ապրում և եկամուտի ամենամեծ մասը ծախսում է սննդամթերք գնելու վրա, ապա առաջնային սննդամթերքի գների բարձրացումը շատ ավելի մեծ բացասական ազդեցություն կունենա»,-ասաց նա:

Անդրադառնալով գյուղատնտեսությունը՝ նախկին նախարարը նախ նշեց. «Գյուղատնտեսությունը որպեսզի զարգանա, պետք է ունենալ հզոր կառույց` նախարարություն, որը պետք է զբաղվի գյուղատնտեսության իրական զարգացմամբ: Մեր ՀՆԱ-ի մոտ 18 տոկոսը գալիս է գյուղատնտեսությունից, եթե դրան գումարենք վերամշակումը, ապա կլինի 25 տոկոսի կարգի: Օրինակ՝ Հայաստանի ամենամեծ հարկատուն «Գրանտ տոբակոն» է, որը գյուղատնտեսության վերամշակմամբ է զբաղվում: Գյուղատնտեսությամբ զբաղվող կառույցը պետք է ունենա, գործիքակազմ, հստակ գյուղատնտեսական քաղաքականություն, որը չկա: Պասիվ սուբսիդավորումներով ակնկալել գյուղատնտեսական աճ՝ կարծում եմ, որ իրատեսական չէ»,-հավելեց նա: