«Մտահոգությունս շատ ավելի է, որովհետև խոսքը վերաբերվում է կյանքի դժվարություններում հայտնված երեխաներին: Գիշերօթիկ հաստատությունները, առանց մինչև վերջ մտածելու փակեցին: Հիմնավորումն այն էր, որ այդ հաստատությունները պետք է փոխարինվեն առավել ժամանակակից ծառայությունով՝ ցերեկային կենտրոններով և նպատակը՝ երեխաներին իրենց ընտանիքներին ավելի մոտեցնելն էր և ավելի մեծ թվով շահառու երեխաներ ներգրավելն այդ նույն միջոցներով»,- ասաց նա:

Ավետիսյանը նշեց, որ, ընդհանուր առմամբ, ոչ մասնագիտական հանրային ընկալման տեսանկյունից բավականին հաճելի լսվող և ուրախացնող բարեփոխման մասին էր խոսքը, բայց կար տարեցների տուն ինտերնատների լուծարման օրինակը: «Դեռ տարեցների տուն ինտերնատների լուծարման ժամանակ ասել էինք, որ երբ հարցը մարդկանց խոցելի խմբի սոցիալական պաշտպանությանն է վերաբերում, չի կարելի դրան նայել մատների արանքով, որոովհետև եթե մինչև վերջին քայլը չմտածված փոփոխություն է կատարվում, ապա ռիսկերը շատ են ու իրական: Հիմա թե տարեցների տուն ինտերնատների, թե երեխաների գիշերօթիկ դպրոցների լուծարման դեպքում»,- ընդգծեց նա:

Ավետիսյանի խոսքով՝ փաստորեն ցերեկային կենտրոնների դեպքում էլ բարի նպատակը մնացել է թղթի վրա, իսկ իրականությունն առնչություն չունի այն նպատակի հետ, որը հնչեցվել էր: «Գիշերօթիկ դպրոցներում մի քանի հարյուր երեխաներ էին դաստիարակություն, խնամք ստանում, այդ երեխաները, փաստորեն, ունեին ծածկ գլխներին և հոգատար վերաբերմունք, որը չէին կարողնում իրենց ընտանիքներում ստանալ տարբեր պատճառներով, հիմա այդ հնարավորությունից զրկված են»,- հայտարարեց նա:

Բանախոսն ընդգծեց, որ ցերեկային խնամքն իր բովանդակությամբ նույնը չէ, ինչ-որ գիշերօթիկում էին ստանում այդ երեխանեը. «Բացի այդ, ակնհայտ երևում է ոչ համակարգային վերաբերմունքը, ոլորտի այս թափթփված կառավարումը և, այսպես կոչված, բարեփոխումները հանգեցրել են նրան, որ իրականում պետական բյուջեից վճարումներն իրականացվում են, բայց փաստացի այդ խնամքն իր բովանդակությամբ գոյություն չունի»:

Ըստ նրա՝ այն ինչ հիմա արվում է, դա բացառապես ձևական բնույթ ունի: «Ես հորդորում եմ պատկան մարմիններին, որ հետամուտ լինեն և այս հարցը պահեն խիստ ուշադրության և մոնիտորինգի տակ, որովհետև մենք խոսում ենք երեխաների մասին: Հանկարծ այնպես չստացվի, որ մենք անունով ունենանք երեխաների ցերեկային խնամքի կենտրոններ, իսկ բովանդակությամբ՝ այլ բան կամ չունենանք ընդհանրապես ոչինչ»,- ընդգծեց նա:

Թադևոս Ավետիսյանը մի քանի հարցադրումներ հնչեցրեց և ընդգծեց, որ դրանք հարցեր են, որոնք պետք է լինեն ուշադրության կենտրոնում և ունենան պատասխաններ: «Արդյո՞ք այդ ցերեկային կենտրոնն իր բովանդակությանը համապատասխանում է, արդյոք դրանցում կան բավականաչափ մասնագետներ, որովհետև պետական բյուջեից, ի վերջո, այդ ֆինանսավորումը գնում է: Արդյոք կա՞ն այն քանակով այդ կենտրոններից, որքան որ նախատեսված է: Եվ վերջապես, արդյոք այդ կենտրոններն այդ նույն ծառայության համար ֆինանսավորվում են միայն պետությունից, թե այլ միջազգային կազմակերպություններից և դոնորներից ֆինանսավորում կա, որովհետև այդ կազմակերպությունների մի մասը նաև նմանատիպ ծառայություններ մատուցում էր նախկինում և ուներ ոչ պետական ֆինանսավորում»,- նշեց նա:

Ավետիսյանը կարևորեց այն հանգամանքը, որ ցերեկային խնամքի կենտրոնները պետք է գործեն այն նույն բովանդակությամբ, ինչը հռչակվել է օրվա նախարարի կողմից: «Չմոռանանք, որ պետական բյուջեից շուրջ 170 մլն դրամ գումար է ծախսվում այս ծրագրի վրա և այդ գումարները պետք է արդյունավետ լինեն, որովհետև այդ գումարները վերցրել են գիշերօթիկ դպրոցներից, վերցրել են այն երեխաներից, որոնք ունեին օբյեկտիվ անհրաժեշտություն, գտնվում էին կյանքի դժվարին իրավիճակում և շատ կարևոր է այդ երեխաների համար այդ աջակցությունը: Գիշերօթիկ հաստատությունների երխաների մեծ մասը, կարելի է ասել, զրկված են ընտանեկան խնամքից»,- նկատեց նա:

Նա կարևորեց նաև հարցը՝ արդյո՞ք շենքային և գույքային պայմանները բավարարում են, որ կենտրոններում անհրաժեշտ ծառայություններ մատուցվեն: «Եթե այդպես չէ, փաստացի ստացվում է, որ այս կամ այն չափով հիմնավորված ծրագիրը, որ տարիներ շարունակ գործում էր և ուներ շահառուներ, այդ ծրագիրը չունենք այլևս, այդ աջակցության ձևը վերացվում է և դրա փոխարեն անհայտ մի բան է ստեղծվում, որի բովանդակությունը պարզ չէ, այդ ծառայության մատուցման մանրամանսերը պարզ չեն»,- ընդգծեց բանախոսը:

Ավետիսյանի խոսքով՝ այստեղ չկա նաև թափանցիկություն: «Լիազոր մարմինն իր բարեփոխում կոչվածի մասին ինչո՞ւ տեղեկատվություն չի տրամադրում, քանի՞ երեխա, ո՞ր մարզում, ո՞ր քաղաքում, ինչպիսի՞ խումբ շահառուներ, ի՞նչ ծառայություններ են ստանում, որքանո՞վ է դրա որակը բավարարում: Այս ամբողջը պետք է լինի հանրային լայն ուշադրության կենտրոնում»,- նշեց նա:

Նրա խոսքով՝ ակնհայտ է՝ նախապատրաստական աշխատանքները ձախողված են, բայց գոնե այս փուլում պետք է համատեղ ջանքերով բոլոր խնդիրները վեր հանվեն, հակառակ պարագայում, այս ծրագիրը կլինի առանց կենտրոնների, առանց մասնագետների, այնքան որ թղթերով, կատարողական ակտեր ներկայացնելով: «Արդյունքում կփոշիանան այն ֆինանսական միջոցները, որով կոնկրետ խնդիր էր լուծում մի քանի հարյուր երեխայի համար. այս ծրագիրը կվերանա, միջոցները կծախսվեն և չենք ունենա դրան համարժեք որևէ արդյունք, չնայած նրան, ամպագորգոռ խոսվում և նշվում էր, որպես հարյուր քայլի բարեփոխում: Եվ ցավով ասեմ, որ այսպիսի վերաբերմունքով, այդ երեխաները եթե չեն ստանում գիշերօթիկ խնամք, հիմա էլ չստանան համարժեք աջակացություն, վաղը հայտնվելու են մանկատներում: Այսինքն մենք ունքը սարքելու փոխարեն աչքն ենք հանելու»,- եզրափակեց նա: