Հզօրանալ է պէտք
04 Մայիս 2020 ՀՅԴ 33-րդ Ընդհանուր ժողովի յայտարարութեամբ ասւած է, որ Արցախի հանրապետութեան անկախ պետականութեան կարգավիճակը եւ տարածքային ամբողջականութիւնն անսակարկելի են։Սակայն վերջերս մտահոգութեան առիթ են հանդիսացել ոչ միայն ՌԴ-ի արտգործ նախարարի կատարած յայտարարութիւնը՝ Արցախի կապակցութեամբ, այլեւ Հայաստանի իշխանութեան կողմից նշւած արտայայտութեանը լիարժէք պատասխան չտալու փաստը։
Հայ-ռուսական սրւած յարաբերութիւնները եւ կատարւած յայտարարութիւնները ցոյց են տալիս, որ Հայաստանի վրայ Արցախի հարցում ճնշում գոյութիւն ունի եւ ինչքան էլ, որ իշխանութիւնը փորձում է այդ ճնշման առկայութեան փաստը հերքել, այն ակնյայտ է։
Այսօր Հայաստանին անհրաժեշտ է ազգային արժէքների վրայ հիմնւած, այդ արժէքները փայփայող իշխանութիւն։ Գործող իշխանութեան մէջ պատասխանատու պաշտօններ զբաղեցնող տարբեր անձիք անյայրգալից յայտարարութիւններ են կատարում հայ եկեղեցու նկատմամբ, հայկական բանակի հեղինակութիւնն են հարցականի ենթարկում, յաճախ միտումնաւոր, երբեմն նաեւ անմտօրէն հարւածի տակ են առնում մեծ ճիգերի եւ զոհաբերութիւնների գնով արձանագրւած յաջողութիւնները, միասնական մտածողութեան եւ աշխատանաքի շնորհիւ ձեւաւորւած ազգային գաղափարներն ու նպատակները՝ Հայոց Ցեղասպանութեան պահանջատիրութեան, Արցախի հարցի լուծման, անգամ ազգային եւ պետական խորհրդանիշերի ուղղութեամբ, խաղ են անում ամբողջ ազգի յիշողութեան եւ պահանջատիրութեան որպէս հաւաքական կամքի դրսեւորում՝ «Յիշում եմ եւ պահանջում» կարգախօսի հետ ու ցաւօք որեւէ պատասխանատւութեան չեն ենթարկւում դրա համար, հարցականի տակ են տանում ընտանիքի արժէքը, անտարբեր են երկրում հաստատւող քրէական մթնոլորտի նկատմամբ եւ բազմաթիւ այլ ապազգային գործողութիւններ ու մօտեցումներ, որոնց անդրադառնալն այստեղ հնարաւոր չէ։
Այսօր մեզ պէտք է հզօր Հայաստան ու հզօր բանակ եւ դրանց հասնելու համար առաջինը պէտք է միասնութիւն, ազգային ու համահայկական մտածողութիւն եւ համերաշխութիւն՝ առանց սեւի ու սպիտակի բաժանելու։ Այդպիսով մենք կը կարողանանք դիմագրաւել երկրի դիմաց ծառացած մարտահրավէրները, վերացնել արտաքին ուժերի ճնշումը եւ յատկապէս յաջողութեան հասնել Արցախի բանակցային գործընթացում։
Իզուր չէ, որ Աւետիք Իսահակեանը 1905 թւականին տեսնելով, թէ կեանքի ընթացքում կայ միայն տէր լինելու կամ տիրոջը պատկանելու ճշմարտութիւնը, գրում է հետեւեալ տողերը.
Կեանքն է պայքար՝ գոռ ու դաժան
Ճզմի՛ր մարդուն եւ թռիր վէր
Իրաւունքը ուժն է միայն
Վա՜յ յաղթւածին, հազար վայեր
Տէր կամ ստրուկ պիտի լինիս
Ճշմարտութիւ չկայ ուրիշ…
Եւ ահա այս իրողութիւնից ելնելով՝ այսօր անհրաժեշտ է հայ ժողովրդին ունենալ հզօր Հայաստան, եւ դա է այն հրամայականը, որի շուրջ մեր ուշադրութիւնն ու ռեսուրսները պէտք է կենտրոնացնենք։
Իսկ Արցախի հարցով՝ հարկաւոր է օր առաջ կնքել Հայաստանի ու Արցախի հանրապետութիւնների միջեւ ռազմա-քաղաքական դաշինք, Արցախի իշխանութեանը մասնակից դարձնել բանակցային գործընթացին եւ ամէն ճիգ գործադրել՝ միջազգային մակարդակում այլ պետութիւնների կողմից Արցախի անկախութիւնը եւ ինքնիշխանութիւնը ճանաչելու ուղղութեամբ։
Վահէ Թորոսեան
